Balai Y te xa Lai Hòa lac sa di dalam dom danak dak hu buh jien tame padang bahrau haong taong abih jien buh tabiak labaih 30 ty dong meng kadung jien karja, ba tame pandar meng bilan 8-2025. Tui danak dak pakat IV, balai y te hu padang laneing lanoi, bahrau, pabak dom tanut chuan di balai y te jalan xa tui adat di Mentri Y te.

Bac si Trạng Minh Trị, Yam ndok Balai Y te xa Lai Hòa, brei thau: gam haong bruk buh jien tame padang co so ha tang, balai daok hu caga srap gap rilo kaya ngui brei ka y te njauk hu piah duh bruk pasang iek ruak, taong ruak yau jamraik sieu am, jamraik dut ndien baoh hatai, bình oxy, kaya pasang iek ruak saong dom kaya duh bruk karei. Dom kaya ini daong paglaong asar siam bruk pasang iek ruak, taong ruak ka urang di balai di labik.

“Kaya ndap nda hu Karja buh jien tame samu gauk, duh siam brei ka bruk pasang iek ruak, taong ruak, daong cap cuu drah samar anak meta saong taong ruak; dalam nan hu taong ruak Dong y saong Tay y, gam haong nan hu caga pabak dom jamraik klauk cham cuu. Tapa di nan, Balai Y te Lai Hòa dak harei dak duh siam jang dalam bruk snagka prein yava ka mikva, daong mikva patakik bruk nao atah, kali kalih jien buh tabiak.”

Balai Y te xa Lai Hoa daok hu caga ginup dom bilik bruk ngak gah y te tui njauk adat yau ye: bilik pasang iek ruak, bilik daok iek, bilik daong capat samar drah di anak meta – daong cap cuu samar chip, bilik klauk vaccine, bilik pasang iek ruak kamei, bilik y hoc tui meng kan saong bilik ndik ndih daok brei ka urang ruak. Majam langyah hareik harom y te saong labik njuel drei jeng hu padang, khik kajap dom tanut chuan ka bruk pahacih sa-at alam langik saong pasang iek bruk njom ruak. Bruk buh jien tame ini hu daong ngak jeng hatai je brei ka rahra dalam bruk sangka prein yava di bhum palei.

Sa-ai Trần Thị La, rahra puk palei Prey Chóp A, brei thau: Balai Y te hu buh jien tame praong laneing lanoi, kaya ndap nda hu caga ginup daong brei ka rahra biak sahnang hatai tuk mai pasang iek ruak saong sangka prein yava. Kapul y, bac si jeng biak buh abih hatai tian, chreih chrai.

“Harei ini dahlak mai tal ini lakau bac si cakak talei mrai, pasang iek prein yava. Daok di ini jaik, bac si jeng buh abih hatai tian.”

Daok di Balai Y te xa Lai Hòa, meng hu buh jien tame samu gauk ka sang danaok yte co so vat chat saong ndap nda kaya, bruk ngak di balai y te dak harei dak hu paglaong. Kuhria rah tapa yaok harei, balai taduan labaih 60-70 mbang rahra mai pasang iek, pathau khan ndom meyai saong taong padam dom ruak njuel. Langiu di nan, daok hu labaih 30 urang ruak mai tal balai pasang iek meng dom jalan yau klauk jarum cham cuu, capat, pa-um papat darah arak …

Phaok Yam ndok Balai Y te Lai Hòa, ong Thạch Đưa, brei thau:

“Y, bac si di Balai Y te Lai Hoa rilo dalam nan thau mayai ndom sap Khmer, kayua yau nan ye khol dahlak hulin mbuan pathau khan ndom meyai tani tanat tantu brei ka urang ruak ka bruk taong ruak, bruk ta-eng sangka prein yava ka bruk caga ruak. Kayua hu yau nan mikva biak sahnang hatai saong je tame piah nao pasang iek ruak di balai.”

Ngan haong bruk sangka buh jien tame padang bahrau, pasiam saong paglaong rilo balai y te xa, phuong, hu dak harei dak salah blaoh majam sang danaok iek ruak di labik, daong rahra hu pandar dom janih sangka prein yava di palei, gam haong di nan patrun ralo bruk ka dom urang brei nao pasang iek ruak tagok pakat angaok./.