Bilan 4 bahrau blaoh, UB bhap bini Ban raya Ho Chi Minh hu brei jao harak brei angan ka 4 danak dak ngak kong pakat glaong di Labik ngak kong pakat glaong Ban raya Ho Chi Minh gam tui yaom jien labaih 1,23 ty USD, pataom tame brei ka ha tang lek taka so. Dalam nan mboh cambaic di mata hu dua danak dak pasak du lieu praong gam yaom jien phun jaik 1 ty USD. Nan hu Danak dak Evolution DC di Amirik My prein khang 52MW, daong ka ndien toan taginum, tri tue manuac urang dan saong langyah du lieu. Patui di nan hu To hop pasak du lieu raya praong Starmason di Singapore hu kong suat 60MW, daong ka tang brei ka AI dan saong Cloud Computing. 

Langiu di nan daok hu urang buh jien tame peih praong danak dak, padang brei ka sang jamariak. Nan hu Kapul TTI (Techtronic Industries Company Pte.Ltd) di Jeman - Đức buh tame labaih 81 trieu USD padang sang Jammariak - Sang mac Techtronic Tools Viet Nam, ngak tabiak dom janih ndap nda ndie tu hadah krah, co ndien tich hop, bang mach … Ong Trương Văn Bằng, Yam ndok pakat glaong Patagok danak dak Viet Nam di Kapul TTI brei thau lac, moi truong buh jien tame di ini biak siam, urang buh jien buh prein tame ngak hu jabat karja dan saong UB Bhap bini Ban raya Ho Chi Minh daong palagaih brei ka bruk ngak tabiak ndap nda, brei ka btuk ngak mbang blei salih. Tapi min, piah lagaih jang brei ka pablei tabiak langiu nagar di sang mac, ong Bằng khin caong lakau:

"Tui sang mac di kapul TTI Viet Nam, ralo abih brei ka bruk pablei tabiak tapa lamnge tasik. Langiu dom lamnge jaik di Ban raya Ho Chi Minh, ye Pabah lamnge Cái Mép - Thị Vải nyu hu meng lawik. Banraya Ho Chi Minh daok biak caik hatai buh prein brei patagok dom baoh kapal praong piah tame hu. Mboh biak lagaih brei ka urang buh prein buh jien tame."

Kapul G24 di Dom Negari Pahasa Ả Rập Thống Nhất janji buh jien tame 2 ty USD brei ka gah Pasak du lieu di Ban raya Ho Chi Minh. Langiu di nan, sa kapul ngak kong pakat glaong langiu nagar karei jeng khin tuh jien tame labaih khurang 2 ty USD piah peih danak dak yau ye di Labik ngak kong Tân Phú Trung.

Tui Yao siu Nguyễn Kỳ Phùng, Akaok urang pan akaok Ban pasang iek Labik ngak kong pakat glaong Ban raya Ho Chi Minh, lac, anak tal di Ban raya Ho Chi Minh mada hu rayak praong paoh urang buh jien tame brei padang Pasak raya praong, AI pagam saong dom pasak roh duah patagok biak khang. Kayua dom nagar dalam Asia tanggara yau ye: Singapore, Thai Lan saong Malaysia buh tame ka pasak ini awal yau nan ye jeng mboh karo. Daok di Viet Nam bhum taneh daok ralo bruk ngak, prein manuac urang jeng ye kaya ngui taneh riya biak siam glaong. Gam tui di nan, khin brei ka pasalih angka so, pandar AI jeng ye kong nghe khau tin Ban raya Ho Chi Minh biak praong. Langiu bruk brei ka padang ha tang, Labik ngak kong pakat glaong Ban raya Ho Chi Minh jeng daok ba rup jaik tame dom kapul praong brei ka gah ngak kông pakat glaong piah ieu buh prein jien tame.

"Khol drei salih meng daok cang tapa yam drei tame piah ieu urang buh jien tame. Dom labik dom gah jeng ye dom labik ngak kong pakat glaong njauk ndom mayai ba hu dom sarak karja hagait piah yam tagok praong, sarak karja kein lagaih piah ka urang buh prein tame ngak mbang di Thai Lan, Malaysia, Singapore… mai tame jeng ye Viet Nam jeng sa labik buh prein siam lagaih di abih. Khol drei hu ralo sarak kein lagaih siam di abih brei ka kak je taneh, brei ka je, brei ka blei tame ndap nda janih thiet bi."

Bruk ngak hu brei ka bruk buh jien buh prein tame ngak mbang meng masa blaoh mboh cara barau, lagaih tui jalan nao brei ngak cau truc mo hinh patagok di Ban raya Ho Chi Minh. Tui di nan, banraya Ho Chi Minh brei thau lac dom prein patagok barau tui ngak kong pakat glaong dan saong salih dah krah bahrau. Dalam tuk taneh riya daok kurang, bruk ngak mbang patabiak ndap nda kaya ngui oh njauk njauk lac daok kein lagaih jeng ye oh ba mai ralo yaom ka patagok bruk ngak mbang blei salih./.