Bahrau meng blaoh, daok di phuong Thu Duc hu ba tabiak “Paok asal kadha phuong Thu Duc haniem phol - selamat”. Ini lac bruk ngak iek hu brei ngak tani tanat meng jalan ngak hu ialmo khoa hoc hu bruk pambuak ilamo di Jabat Roh duah patagok Ban raya Ho Chi Minh.

Majam dut iek brei ngak taong abih hu 3 jalan ngak: ndap nda kaya jien padai, hatai glo akaok sahaneng saong ilamo; rabha jeng 10 asal kadha brei mboh ka dom gah raidiuk njauk hu gam haong 50 tanut cambaih laih, tui pagam bruk daok dang yaok harei di rahra. Urang ngak iek lac rahra mengumo 18-70 thun, thau pandar smart phone piah ta-eng drei javap calei.

Tui urang dang akaok bhum palei, jalan ngak di bruk ngak iek ieu lac bruk dut iek bruk haniem phol selamt di rahra di bruk mboh tapak ka kein lagaih daok dang diukrai, raidiuk daok dang me-in, bruk pambuak gauk dalam bhap bini, hatai je saong caong khin ngan haong karja. Hu makna jang, ini lac jalan nao daong bhum palei javap calei kadha sua tangi: rahra caong khin hagait piah diuk rai siam jang, pagam suai jang haong labik drei daok?

Sa-ai Võ Quốc Bảo, sa urang di bhum palei, taong yaom bruk ngak di phuong Thu Duc daong karja saong rahra chiat tame jaik taphia gauk jang.

“Meyah panuac ndom mayai di rahra khol drei hu pang tani tanat cambaih laih ye khol dahlak mboh hu sa banah lac di ban medin, di bhum taneh Ban raya Ho Chi Minh ini saong hatai je tame karja hu paglaong.”

Sa-ai Lâm Thành Phú, labik ban 49, phuong Thu Duc, brei thau sa-ai biak katuak tuk hu palih ruah ngak iek hadei labaih 20 thun diuk rai di bhum palei:

“Dahlak hulin hu mbaok ngak iek saong jeng hu dom panuac ndom ka asal kadha di labik yau alam langik, jalan mbak…Tui dahlak hulin bruk bhian peih mbang roh duah yau ini lac biak siam ka rahra – karja hu sap ndom ka bruk patagok di bhum palei.”

Tui dom urang hu ilamo, bruk dut iek tanut haniem phol selamat di phuong Thu Duc lac bruk ngak bahrau, ba drei ngak dahlau. Min, piah khik kajap bruk lambaok, dom mbang roh duah patui brei patagok bruk di rilo gah piah plaih klak tapa dom urang metui atau dom urang gaok kan kandah dalam bruk pandar ilamo ngak kong angka taka so. Gam haong di nan, brei langyah dalam jang ka bruk karei gauk di dom kapul urang tui jien mek tame, tukvak daok di bhum palei piah ka sarak ba tabiak hu njauk lagaih jang.

Ong Phạm Bình An, Phaok akaok Jabat Roh duah patagok Ban raya Ho Chi Minh, taong yaom ka bruk hadah krah brei tanut haniem phol brei mboh cambaih laih ka bruk ngak “grauk sarak jeng pamaong tal rahra”, gam haong nan lac bruk pasang iek siam lagaih di sarak dalam tuk Ban raya daok peih ngak bruk karja palei dua pakat. Tukvak mai meng anak jaik tal, Jabat brei ba tabiak urang dang akaok bhum palei ka taong abih dalam Ban raya Ho Chi Minh, njauk lagaih haong bruk hu angan di yaok labik.

“Ban raya Ho Chi Minh daok padang sa danak dak biak praong, kham merat tame top 100 ban medin njauk diuk rai ye khol drei di pakat phuong, pakat xa jeng brei hu sa paok tanut haniem phol selamat brei mboh meng rahra tagok. Yau nan cambaih laih lac dom sarak pataom rahra gilac, oh tok lac di panuac ndom pathau khan blaoh daok lac asal kadha biak cambaih laih lac bruk hu mboh di mikva. Saong bruk mboh ini hu dut iek, hu pang yaom, hu pasiam piah daong sarak dak harei dak jaik rahra jang.”

Dom takai yam da drei ngak dahlau yau bruk ngak di phuong Thu Duc daok peih tabiak jalan pandar bahrau: Mek bruk mboh di rahra ngak “bao h kadha du lieu akaok tame” piah ih tabiak sarak. Tuk dom du lieu nan hu pang saong salih jeng bruk ngak cambaih laih, jalan ngak ba Ban raya Ho Chi Minh jeng sa ban medin njauk diuk rai abih oh daok lac kadha daok atah./.