Amuk Nguyễn Thị Sương daok di thon Vĩnh Phúc, xa Vĩnh Tân, huyen Tuy Phong, tinh Binh Thuan dahlau diah, urak ini lac thon Vĩnh Tân, xa Vĩnh Hảo, tinh Lam Ndong daok jaik taphia Pasak Ndien luc Vinh Tan brei thau, jaik abih urang daok jaik taphia ini caong khin panduan nao daok di labik karei:

“Panduan ba mikva naok daok di labik karei nao, urak ini labik ini dhul mul, sap yava prong oh bom truh. Urak ini daok yau ini habar daok jeng, abih di nyu lac anek naih, urang taha.

Tui mikva daok di ini, dalam tuk hu angin bilan Barak (meng bilan 11 tal bilan 4 thun hadei), labik ini gam gam hu angin khang, angin ribuk, dhul juk, xam bhian pruh tame sang di bhap bani daok jaik taphia haong pasak Ndien lac Vinh Tan. Ong Phan Cúc, Paok akaok thon Vĩnh Tân, xa Vĩnh Hảo brei thau:

“Tapa pasang iek di taong abih thon Vĩnh Phúc (klak), urak ini nan lac thon Vĩnh Tân, xa Vĩnh Hảo, rilo bhap bani di labik ini caong khin panduan nao daok di labik karei, paatah di labik jaik taphia haong Sang mac Nhiet ndien Vinh Tan”.

Tapa bruk pasang iek jaik 400 baoh sang di palei Vĩnh Phúc ye hu 178 baoh sang (meblah jaik 44%) caong khin panduan nao daok di labik karei. Ong Phạm Duy Linh, daok di palei Vĩnh Tân, xa Vĩnh Hảo brei thau, anak bruk o nhiem ngak pambak tal pren yava, ong jeng yau dom urang karei hu sang daok jaik taphia haong Pasak Ndien luc Vinh Tan caong khin avan hu panduan nao daok di labik karei: 

“Mikva pok sap iew daong tuk daok tinh Binh Thuan klak meng thun 2023 tal thun 2026 jeng oh ka langyah. Urang jakar jeng hu trun mai mong iek, cih vak angan dom baoh sang caong khin panduan nao daok di labik karei, blaoh dak padang to pasang iek dhul mul, blaoh kong an jeng hu mboh tangin tame, thaot binguk, min tal harei ini jeng oh ka langyah ka bhap bani”.

Piah samar drah langyah ka hatai caong khin di bhap bani, meng blaoh, UBND tinh Lam Ndong jaok ka Mbang Khik iek buh jien tame padang ngak ka 2 dang tabiak, pambuak bruk haong dom, UBND xa Vĩnh Hảo saong dom jabat pambuak pagam tal pasang iek duah thau labik, gam haong nan, padang ngak harak gar, bruk kuhria caga padang ngak danak dak tui njauk adat hukum. 

Ong Nguyễn Thanh Sang, Akaok UBND xa Vĩnh Hảo brei thau, puk palei hu pathau khan saong tacei pato Labik daok Động Từ Bi, palei Vĩnh Tiến nan lac labik kuhria caga roh duah peih ngak danak dak. Yau nan min, tui ong Sang bruk duah thau ka labik daok bahrau njauk pambuak pagam haong bruk ngak mbang ngak huak anak meta saong suai labik di bhap bani, abih di nyu lac dom baoh sang taong mek ikan.

“Ndom mayai brei ka labik daok ye meda panduan ba nao daok di labik daok bahrau Động Từ Bi, dahlau diah jeng hu ba brei labik daok bahrau ka dom pluh baoh sang, urak ini mblang taneh di ini jeng daok. Min kadha prong saong njauk ndom tal di abih nan lac ngak habar kuhri kuhria hu bruk ngak mbang brei ka mikva. Kayua yau nan ye urak ini kadha prong di abih nan lac njauk hu phun jien rilo piah gam ba brei labik daok bahrau gam kuhria hu ka bruk ngak mbang ngak huak ka bhap bani piah ka mikva bui hatai ngak mbang”.

Ong Vũ Thanh Hải, Akaok Sang mac Nhiet ndien Vinh Tan 4 brei thau, dom thun tapa, dom sang mac nhiet ndien Vinh Tan jeng kham merat buh jien tame ngak dom danak dak, peih ngak dom jalan ngak piah pacang khik alam moi truong pacang caga, patrun biak takik dom kadha oh siam ngak pambak tal moi truong jaik taphia. 

Yaom mada lac dom jabat hu kham merat pambuak bruk piah peih ngak siam dom kadha pambuak pagam tal alam moi truong, taphia di nan rik daong ka bruk ngak mbang daok dang ka mikwa rah ra, ba brei bruk ngak ka puk palei, yau nan min, biak di nyu brei mboh o nhiem moi truong meng dom sang mac jeng daok pambak tal pren yava saong rai diuk di bhap bani daok jaik taphia nan./.