Canah jalan Hải Thượng Lãn Ông di phuong Đồng Xoai, Ban Dong Nai (dahlau diah lac TP. Đồng Xoài, tinh Bình Phước), hu mboh angaok dom blah cih vak quy hoach. Yau nan min harei ini, sa canah jalan prong atah jaik 2km praong tal 28m daok brei mboh hu ngak jeng.

Piah danak dak hu peih ngak, puk palei njauk peih paha labih 5,14ha mblang taneh, pambak tal 98 mblang taneh. Mai meng bruk pathau khan, jak ba "nao tal pabah, kataoh yaok sang ", hadei di sa tukvak panak jak ba, 54 baoh sang halar hatian alin brei jaik 3,6ha taneh. Tui kuhria, yaom darak pasar di mblang taneh nan labaih 16 ty ndong. Ong Mai Thế Tám, sa urang ndang dalam phuong Ndong Xoai jeng halar hatian yah klak baoh sang pakat 4, hala paga khang kajap gam haong jaik 120m² taneh piah ngak jalan bharau. Ong Tám khan brei thau:

"Jalan ini dahlau diah daok dalam quy hoach. Tuk hu dom mban nganh kapul nyaom jak ba, mboh peih jalan daong brei siam laghaih ka bruk nao mai, pajeng ba yau nan ye khaol dahlak halar hatian alin brei taneh ka Urang buh jien tame ngak."

Hadei di labaih 20 thun ba tame pandar, canah jalan Nguyễn Thái Học (phuong Trảng Dài, ban Ndong Nai- dahlau diah lac ban Biên Hòa, tinh Ndong Nai) mboh mbaih mboh biak rilo. Tuk hu jalan ba pasiam veik canah jalan, peih prong, jaik 300 baoh sang njauk pambak njauk hatai pachreih tui, ta-eng drei peih talaih dom kong trinh, ba kadul tame dalam piah brei taneh ka bruk ngak jalan. Ong Phạm Văn Xuân saong ong Nguyễn Quang Minh, urang daok taphia canah jalan Nguyễn Thái Học brei thau:

"Oh ta-eng drei baoh sang dahlak, blaoh taong abih mikva daok jaik taphia angaok canah jalan Nguyễn Thái Học. Kadha caong khin abih di nyu hu lac ngak habar piah ka Karja buh jien tame ngak brei ka jalan hu siam mekre, nao mai mbuan lagaih jang. Taong abih kadha bo karja caong khin, dalam nan hu bruk alin brei taneh, ye dahlak halar hatian piah ngak ka jalan hu siam gheih di abih."

Langiu di bruk ramik siam jalan mbak, Dong Nai daok pataom pren peih ngak rilo danak dak jalan mbak prong pambuak pagam bhum saong dalam ban, peih prong mbaok meta mblang taneh piah cak rok patagok kinh te - xa hoi.  

Brei thau ka bruk peih paha nan lac bruk njauk ngak dahlau, pambuak tal bruk peih talaih phun jien karja, urang dang akaok puk palei pandar dom so, nganh pal kajap dom hagait rah tabiak di pak ala, langyah tani tanat dom tavak tave piah ba brei mbang taneh hacih. Piah ngak hu bruk ini, ong Nguyễn Văn Út, akaok UBND Ban Dong Nai khang panuac lac, jalan ngak siam di abih nan lac grap tanat dom hatai caong khin njauk, brei thau ka cambaih laih sarak pabak ba-yar jien di karja saong daong panduan salih bruk ngak brei ka bhap bani. Jalan ngak prong hu ong ba tabiak nan lac “Labik daok bahrau hu nao dahlau sa yam”, di labik nan pataom hu abih sang bac, balai iek ruak, ha tang ky thuat saong dom labik ma-in ka bhap bani. Ong Nguyễn Văn Út brei thau:

"Tuk danak dak gam haong jalan iek ginup prong, dom thiet che ha tang saong dom kadha brei ka rai diuk di bhap bani jeng hu paataom tame padang ngak samu gauk. Bhap bani di labik daok bahrau meda taduan mek hu abih dom siam laghaih, hu sa labik diuk rai khang kajap saong chat luong rai diuk siam jang. Ini lac kadha asal piah ngak jeng bruk njauk hatai dalam bhap bani, meng nan patrun ap luc saong grap tanat tuk vak peih paha mblang taneh.”

Tuk jalan ba di Ndang njauk hatai bhap bani, tuk sarak pabak ba-yar jien, ba brei labik daok bahrau hu biak biai mek chat luong rai diuk di bhap bani ngak pasak, taong abih hala paga pacang cakak jeng meda hu peih talaih abih. Dom canah jalan bahrau daok hu padang ngak oh lac sa janih pambuak pagam dom bhum kinh te, ramik siam veik mbaok meta ban blaoh daok pagam atah bruk ngak di drei, gam dak padag sa Ndong Nai cak rok patagok, khang kajap saong bak pren diuk rai./.