Ong Nguyễn Phước Lộc, sa urang tuai damuai mai meng Ban raya HCM mbang akaok mereip yam takai tal labik Inem mek bimon kalan Pô Sah Inư, di tinh Lam Ndong, min bruk prong glaong saong kadha meng kan di dom baoh bimon ini ngak ka ong mboh hatai iek prong.

Ong Lộc brei thau, dahlau di tuk palih ruah Lam Ndong piah nao jirah, ong jeng caong khin duah thau ka baoh bimon sahanak ginreih ini. Saong abih di nyu lac tukvak harei Katê thun ini.

“Mbang akaok mereip dahlak mai ini, dahlak mboh pak ini biak anit ranam biak siam laghaih saong bhap bani ini thei jeng mbuan sahnang jaik taphia, thei jeng bui sambai. Labik bimon kalan di ini dahlak duah thau angaok review, dahlak duah mai ini jeng kayua hu sa hatai jia. Dahlak tabiak ini piah uan ka Po dalam bimon ini. Dahlak jeng caong khin hu gilac mai labik ini rilo mbang jang”.

Dom harei akaok bilan 10, mai tal bhum palei Cam di 2 tinh Lam Dong saong Khanh Hoa (Bình Thuận saong Ninh Thuận klak), thei jeng mboh hu ar thak bui sambai cahreih chai karei jang bhian harei. Bhap bani Cam di labik ini daok yaom tame harei Katê – harei roya meng kan prong abih, ginreih abih dalam thun hu peih ngak dalam harei akaok bilan 7 saka Cam. saong thun 2026 ini, harei roya hu peih ngak meng harei 9 – 12/10.  

Dua tapen jalan palei, jalan pamhuak xa hu rilo bhap bani bangsa Cam, tagok tal mbuan ceik Bà Nà – labik padaok bimon Po Sah Inư (Phường Phú Thuỷ, tinh Lam Ndong); mbuan ceik Trầu labik hu bimon Po Klong Garai (Phường Đô Vinh, tinh Khanh Hoa)… hu bingu hala hadah tanjak.

Hu mbaok di bimon kalan Pô Klong Garai, amuk Hoàng Thị Hồng Thu, tuai damuai mai meng ban ine Hà Nội brei thau, yaom lac daok 3 harei tra meng rah tabiak harei Katê thun 2026, min ar thak harei roya hu pambak prong grauk labik mai meng bruk pathau khan.

“Dahlak mboh tame dalam hatai oh war hu haong baoh bimon kalan ini, bein ilamo kien truc di urang Cam meng kan. Yau nan ye dahlak mboh biak chreih. Saong ini lac sa labik tuk dahlak duah thau hu dom khaw tin bo dom urang tuai bhian nao, yau nan dahlak caong khin hu mai tal ini”.

Bimong kalan Po Klong Garai saong Pô Sah Inư, nan lac dom inem mek kien truc, agama saim gheih di bhap bani Cam daok hu khik ramik biak tamo. Ngan haong kien truc ilamo biak karei, bimon Pô Sah Inư hu brei angan lac Inem mek pakat negar. Ta-eng bimon Pô Klaong Garai hu brei angan lac Inem mek pakat negar biak karei.

Saong harei Katê nan lac inem krung ilamo oh mboh di meta pakat negar, kayua yau nan ye raya harei Katê pachreih biak rilo tuai damuai dalam saong langiu negar.

Yam takai tal dom baoh bimon kalan meng kal yau Pô Sah Inư atau Pô Klong Garai dalam dom harei ini, tuai damuai jirah mboh biak tatuak drei anak bruk bak manuac urang min mboh biak praong glaong. Ala takai bimon tamuh bimao hijao, dom kadha adaoh bhap bani Cam, sap Saranai yava tagok tui sap Ghi-năng, Ba-ra-nưng chreih chai raok daa.

Di bimon kalan Pô Sah Inư, amuk Nguyễn Thị Tuyết, sa urang tuai mai meng Ban raya HCM brei thau, amuk mboh biak la-an dalam hatai gam haong dom ndap nda hu ngak meng tangin daok parang pablei di labik ini. Oh lac tok mek meta ngan haong sambo di jih dalah blaoh daok lac bruk salut mbut gheih ghang mai meng palak tangin di urang ngak gaok glah lan am.

"Harei biak biai lac harei akaok mereip pang hu dom sap pling, blaoh dom ragam tamia di dom adei daok pak ini mboh biak karei saong biak mek mata. Khaol dahlak mong mboh hu dom kadha nan saong mong mboh hu kadha siam gheih di ilamo bangsa Cam."

Tanut praong di harei Katê thun 2026 nan hu lac Harei roya lan am Hamu Craok di xa Ninh Phuoc, tinh Khanh Hoa. Abih di nyu, bruk tabiak website palei ngak saong hu pandar ilamu thuc te ao (VR) piah meyaih khan bruk rivang ma-in di Hamu Craok.

Tuk sap Ghi-năng yava tagok din dang laamang ndaih, sap Saranai njoh njac yava tagok ye brei thau ka sa bilan Katê cei sil, selamat haniem phol.    

Tuk labik jirah rivang ma-in hu pambuak pagam catang: Bimon kalan Po Klong Garai – palei lan am Hamu Craok – Palei menyim jih dalah Caklaing di tinh Khanh Hoa; Bimon kalan Pô Sah Inư – kalan Pô Mơ Nai, Gilang peih inem krung ilamo Hoang toc Cam, Palei ngak gaok glaj Binh Đuc di tinh Lam Ndong, tuai damuai meda hu rilo siam laghaih jang piah ma-in iek, duah thau, rik daong ba mai yaom jien mek tame tapak ka dom baoh sang ngak bruk ngak meng kan saong jit vuk di dom palei Cam.