Harei sang sa-ai K’Long Ha Juil, palei 6, xa Lạc Dương, tinh Lam Dong panduol mai daok baoh sang bahrau, abih palei gam sa baoh bui sambai. Ini jeng lac baoh sang hujung luac abih di dalam 9 baoh sang brei yah sang taik tahak, taong yaom bruk dalam palei oh hu daok sang danaok taik tahak caga jaleih. Raidiuk kurang dahlau kurang hadei, gait oh thau habar duah hu jien padang. Hu sarak karja daong padang bahrau dom baoh sang daok taok tahak kurang anak kurang likuk di Karja nagar, baoh sang di sa-ai buh pabak tame yaom 250 trieu dong, urang dalam gauk hatian ralo darah rik daong jien, urang dalam palei daong prein yava, sang danaok bahrau praong laneing, khang kajap jeng hu ngak blaoh.

“Adei sa-ai amaik ame dalam sang, mikva urang palei daong jien padang sa baoh sang bahrau, hu sang mbaoh biak uan tabuan, karo sanang hatai raidiuk ngak mbang”.

Di palei 6, xa Lạc Dương, labik jaik yau ye taong abih baoh sang hu ugama, hatai anit jum pataom, neh rabha gam saong gauk yau ye jeng baoh siam makre dalam bhap bini. Oh lac sa janih daong yah sang tanjie caga jaleih, urang hu jien daong jien phun, baoh sang kurang manuac ngak jeng mai daong prein, salih prein ngak. Taha angan Lơ Mu Ha Djô, urang hu angan di palei 6, ieu lac sa urang daong ralo prein di drei dalam bruk pambuak pagam gauk. Tapa dom mbang nyom biai jeng ye dom mbang taom, ong jak ba rahra kham marat ngak mbang, panduan salih phun pala, daong gauk tapa truh kan kandah, klak yah tanarakun oh siam jeng ye khik karo kajap palei nagar. Tui ong, hadiuk “siam ka raidiuk, gheih ka ugama” njauk ngak dom bruk njauk ngak, jaik taphia rahra bhap bini dalam raidiuk.

“Dahlak dakvah jak ba ka urang piah thau ein lasei ein ao, daong ka urang baoh sang kurang mbang kurang minyum, piah tahu daok gauk brei ka raidiuk karo”.

Oh sa janih di Lạc Dương, di xa Sơn Điền, tinh Lam Dong ralo urang taha palei, Bi thu Chi bo palei jeng kham marat ba abih hatai jak ba mikva palei “siam ka raidiuk, gheih ka ugama”. Yau ye palei Ka Sá, gam saong jakba pato tacei di taha palei, chi bo dan saong urang iek glang palei, mikva jeng hu kham marat pasalih panduan phun pala anek raong, mbaoh cambaih hu patagok phun kophi, raidiuk dak harei dak salih bahrau. Tui baoh sang ong taha palei angan K’Lãng, ong jak ba mikva palei Ka Sá oh tapa janih dakvah jak ba, nyaom pataom, baloh daok urang nao dahlau ngak iek, mai meng tapak urang dalam sang di drei.

“Di ini, taeng mikva jaik jaik taphia jeng hu nao taom abih, dakvah jak ba tapa dom harei nyaom biai... Drei ngak dahlau. Dahlau abih sang drei ngak dahlau, khik hu ilamu, siam makre di bangsa... pato padar anek kamuac juai war ilamu adat cambat di bangsa”.

Xa Sơn Điền hu 2.000 urang tui ugama Công giáo saong Tin lành. Palei jeng caong dom halau daneng pagam bruk jak ba bruk dakvah urang ugama dalam dom harei bac da-a tam bat sambahyang dalam adit. Ong Vũ Đức Nhuần, Akaok UB Bhap bini xa Sơn Điền, tinh Lam Dong brei panuac lac:

“Khol dahlak mboh lac, piah ngak hu dom bruk yau nan ye bruk di dom halau janeing ugama, urang taha biak praong. Khol dahlak taong yaom glaong dom urang halau daneng urang taha palei biak thau kham marat... Dalam tukvak mai meng anak, xa jeng daok pachreih bruk di urang halau janeing gah ugama jeng ye taha palei, piah ngak yau habar urang halau janeing saong urang taha jeng urang pasak asar di dalam bruk jak ba dakvah bhap bini jammaah, daong mikva ngak siam bruk ngak urang rahra bhap bini urang siam di xa Sơn Điền”.

Meng bruk daong yah klak sang taik tahak, kham marat tapa truh kan kandah padang raidiuk ilamu, dom taha palei, urang hu angan jeng ye dom urang halau janeing urang dalam ugama daok ba prein yava padang raidiuk, pataom padang dom buon palei Lam Dong dak harei dak trei sir, karo kajap.