Mada jeng hu tukvak nao ngak pah tuk ini tuk diah ngak ka raidiuk baoh sang sa-ai Mang Văn Lẵng daok di palei Bal Riya, xa Ninh Hai, gaok biak rilo kan kandah. Atah di ini labaih kurang 2 thun dahlau, dom kan kandah nan dak harei dak trak jang tuk 3 anek sa-ai tal thun nao bac. Min biak patuah jamo kayua tuk ini jeng lac tukvak, sa-ai mesraiy hu phun jien mek laba lap ka baoh sang kathaot meng di Gilang pariak Karja tui Sarak rahra piah buh jien tame ngak mbang, patagok bruk ngak mbang brei ka sang danaok di drei. Sa-ai Mang Văn Lẵng ndom meyai lac:

“Meng nan, 2 diuk pasang jeng padaong gah Gilang Pariak sarak daong drei masraiy blei lamo raong labaih 7-8 drei.”

Oh lac ta-eng di baoh sang sa-ai, di palei Bal Riya, xa Ninh Hải daok hu yaok pluh baoh sang kathaot, jaik kathaot karei hu mesraiy phun jien meng sarak karja ini. Baoh sang rilo abih hu mesraiy hu 100 trieu dong, takik abih di nyu jeng hu 50 trieu dong. Mbuan mboh abih lac hu sa-ai Trương Thanh Lợi, urang akaok palei Bal Riya:

“Meng phun jien Gilang pariak brei mesraiy tui sarak ye di palei Bal Riya mikva hu mesraiy gah Dam dara, urang kamei, urang ngak nong.”

Tal bih bilan 10 thun ini, di xa Thuận Bắc, jien brei mesraiy hu labaih 160 ty dong, hu 2.000 baoh sang hu mesraiy phun jien piah buh tame patagok bruk ngak mbang.

Tui ong Thiên Hoàng Long Phụng, Phaok Yam ndok Jabat Meyao meyit Gilang pariak tui Sarak Rahra Thuận Bắc, tinh Khanh Hoa, gam haong bruk brei mesraiy, bruk salih ilamo khoa hoc – ky thuat jeng hu brei sangka, iek praong, jaik abih dom baoh sang mesraiy phun jien jeng hu salih dalam jalan sahaneng, pandar phun jien njauk bruk, rilo baoh sang buh jien tame ngak mbang, pablei salih lagaih, brei hu jien mek tame, psiam raidiuk baoh sang. Ong Thiên Hoàng Long Phụng ndom mayai lac:

‘’Phun jien brei mesraiy mek laba lap meng Gilang pariak tui sarak karja yau ye gal vah gai kandeih daong ka rilo baoh sang kathaot, jaik kathaot saong dom urang mbang tui sarak karja karei buh jien tame patagok kinh te, paglaong raidiuk karo kajap saong siam lagaih.

Tukvak tapa, Kapul Urang ngak nong tinh Khanh Hoa, hu ngak siam bruk pambuak haong Gilang Pariak tui Sarak rahra tinh Khanh Hoa peih dom sarak karja brei mesraiy jien duh ka bruk ngak nong di palei pala. Tal ini, taong abih jien brei mesraiy di Gilang pariak tui Sarak Rahra hu labaih 2 ribau tik dong, hu labaih 41.300 baoh sang hu mesraiy phun jien. Amuk Phan Thị Ngân Khánh, Akaok Kapul Urang ngak nong tinh Khanh Hoa ndom meyai lac:

‘’Dalam tukvak anak tal, kapul pahasa daok patui ngak siam bruk pasang iek di kapul saong daong urang dalam kapul urang ngak nong piah patagok ngak siam dom jien brei mesraiy, meng di nan daong ka urang dalam kapul hu mesraiy jien, patagok kinh te baoh sang. Tapa dom kapul urang hu mesraiy jien, dom kapul bruk ngak piah raong glang ngakmbang pataom tame tui jalan padang dom danak dak daong ka urang dalam kapul urang ngak nong pataom tame dom phun pala hu pala rilo di bhum palei piah patagok kinh te baoh sang”.

Gam tui bruk pasang iek phun jien yau urak ini hu brei mboh bruk naih gheih karei di Gilang pariak tui Sarak Rahra, patui bruk daong ka jalan patrun kathaot, brei bruk ngak, bruk daok dang mbang ngui. Tuk sarak karja hu ngak njauk saong rahra pandar phun jien mesraiy hu lagaih ye sarak karja hu peih tabiak rilo kein lagaih, uak drei tagok ngak kaya meda ka rilo urang ngak nong di dalam tinh./.