Langik tasik salih karei ngak ka hajan ia ndik ia sua dak harei dak kan si thau dahlau, ngak brei kan kandah tal bruk ngak mbang di urang ngak nong bhum taneh dhaong di Tay Ninh, daok di tinh Long An klak. Amuk Trần Thị Hồng, urang dalam Kapul pambuak ngak tabiak padai 15/10 di puk palei Võ Văn Be, xa Vĩnh Châu brei thau:

“Tok Kapul pambuak bruk hu labaih 50 urang. Bilan ia ndik ia sua thun blaoh, kayua ia ndik ia sua mai tal aval yau nan ye labik ini jeng laik tame kan kandah. Ia ndik ia sua mai ngak ka amuk oh meda ngak tabiak kajap 2 mbang pala drak dalam thun. Meyah hu Karja buh jien tame beik ar pacang caga piah ngak 3 mbang pala drak dalam thun ye dalam gavang ar pacang ini hu 350 baoh sang, mikva mada hu sahnang hatai saong biak chreih chrai sambai meyah hu salah blaoh aval drah”.

Ấp Cả Nổ, xa Tân Hung daok di bhum akaok halau dan haong bhum dhaong, bhian duh ndua kan kandah kayua ia ndik ia sua. Bruk kanjah trak ralo abih di nyu mboh hu lac di bilan 10.2025, tuk bruk kan kandah jaleih braong dalam taneh tapa ar pacang gah Pur ribaong kenh 1/5 ngak ka ia saiy tame taneh hamu, ngak brei ka labaih 100 ha padai gam haong rilo taneh njam patam phun bangu, phun mbang baoh njauk ia dauk, urang ngak nong lahik abih patih kaok dua plak tangin.

Hu labaih 7.000 ha taneh ngak nong, majam ar pacang taneh ia ndik ia sua di xa Tân Hưng urak ini hu pacang mbang pala drak ka bilan Hè Thu. Min, piah pacang caga saong ia sua tagok glaong dalam mbang pala drak di bilan Thu Đông, dom labik laman lamuac brei patui veik hu paglaong dnak dak saong pakhip kandauk ar binek nde pacang. Ong Nguyễn Cao Đẳng – Phaok Akaok UB Bhap bini xa Tân Hưng (dahlau diah lac huyen Tân Hưng, tinh Long An) brei thau:

 “Gam haong dom danak dak bineik ribaong piah khik kajap taneh ngak tabiak jeng yau dom gavang ar nde pacang pakhip wil taom dal nyu, khol dahlak sangka dua asal kadha. Ka sa, khol dahlak paglaong danak dak di dom gavang ar nde pacang ini, khik kajap pacang ia sua dalam bruk ia sua mai aval drah. Asal kadha yang ka dua di nyu lac khol dahlak pambuak khang ka mbaok ar nde pacang piah khik kajap bruk nao mai lagaih ka mikva rahra dalam bhum palei, jeng yau pajeng kaya kan, kaya ngak nong hadei di tuk yuak kuak saong pablei nyu”.

Oh sa janih di xa Tân Hưng, rilo labik karei di xa Vĩnh Châu jeng daok dalam bruk yau nan tuk jalan ribaong kenh 30/11 oh ka wang wil hu. Kuhria dalam bilan ia ndik ia sua thun 2025, dalam labik hu 7 jalan ar pacang nde atah labaih 40km daok dang anak mbuan si talah.

Tui jalan kuhria tal thun 2030, Tay Ninh ba tabiak jalan ngak jeng 114.000 ha taneh pala padai siam glaong, tathuak nerak biar, dalam nan bhum Dong Thap Muoi dang ngak asal pasak. Kayua yau nan ye, bruk dahlau di abih ieu lac buh tame ka bineik kraong ribaong, beik wang wil kajap nde ar pacang caga ieu lac bruk jhul khang bruk ngak jamraik, peih bruk ngak pataom tame saong pandar jalan pala drah hadah bahrau. Ong Mai Văn Cảm – Phaok Akaok UB Bhap bini xa Vĩnh Châu brei thau, takai di dom danak dak hu buh jien tame ngak salah blaoh dalam thun 2025 saong akaok thun 2026. Min tapi, piah majam paglaong abih bruk di nyu, bhum palei jeng khin hu ralo prein buh tame:

 “Piah ngak siam lagaih jalan ngak nao tal njauk ralo akaok mbram, khol dahlak brei bruk daong ralo jang di tinh piah ngak khang mbaok ar nde pacang, khik kajap ar karo salamat, gam haong di nan brei kein lagaih ka mikva pajeng ba ndap nda kaya mbang, kaya kan blei salih saong nao mai hu lagaih jang di angaok majam ar nde caga pacang. Jalan ngak tal thun 2030 Khol dahlak brei pasang iek hamu meng ilamo khoa hoc ky thuat, hu radaih cơ giới, ahaok par duh ka bruk ngak mbang.

Meng dom ar nde laman lamuac, oh ka pakhip wil di Tay Ninh daok hu samar drah brei ngak salah blaoh majam bineik ar nde rilo jalan kuhria. Dom danak dak ini oh lac sa blak khin pacang ia ndik ia sua, blaoh daok peih tabiak labik ngak tabiak bahrau, khang kajap ka bhum padai siam glaong, tathuak nerak biar di bhum taneh Dong Thap Muoi./.