Rilo thun gam haong bhum taneh pala baoh kandiuk di Tay Ninh, sa-ai Lê Minh Trung, yam ndok HTX Jitvu Ngak nong Minh Trung, brei thau bruk “jaoh gai” dalam bruk pambuak ngak mbang jeng daok kandaong.

Tuk yaom di darak pasar tagok glaong, rilo urang ngak nong pablei kaya ka gah ikak kaiy, min tuk laik yaom ye jao kaya ka HTX. Bruk ini jhul taong abih kan kandah ka gah blei abih. Dang di anak dom bruk kadha yau nan, HTX Minh Trung brei salih tapa pataom blei tui yaom darak pasar. Bruk ini daong ka urang ngak nong sahnang hatai jang saong patakik bruk ngak tayah bruk pambuak gauk. Min, HTX lac naong trak dom kateik geik ka jien buh tabiak, jien kak je… Sa-ai Lê Minh Trung brei thau:

“Urak ini HTX tuk halei jeng pagun sanya janji njauk daong urang ngak nong blei ndapnda kaya. Yaom lac takik atau rilo jeng dang tabiak taduan abih, pablei abih ka mikva. Drei meraik tapak haong gah ikak kaiy di darak pasar piah khik yaom, plaih caga bruk kateik geik yaom ka urang ngak nong. Hu HTX dang tabiak ye mikva mboh sahnang hatai biak rilo. Min cagan di nan, HTX gilac naong biak rilo jien buh tabiak.”

Di jalan ba kaya ngak nong Viet Nam tabiak dunya, amuk Ngô Tường Vi, CEO Kongti Pablei tabiak blei tame di amuk hu srap gap ngak bruk tapak saong dom majam darak pasar raya praong saong gah pambuak pablei kaya, njauk ndom mayai lac di nyu nan hu lac darak pasar Trung Quoc, piah duah akaok tabiak tani tanat. Min, bruk pablei tabiak langiu nagar brei ka hu bruk samu gauk saong adat ngak tantu cambaic laic meng di gah ngak mbang pablei salih saong urang ngak nong. Amuk Vi ndom mayai brei thau khang lac, meyah oh salih ilamo ngak mbang saong khik adat ngak njauk di bruk pambuak gauk, urang ngak nong brei samar drah brei tabiak truh bruk pablei tabiak langiu negar:

“Langiu di gah yaom kaom ye mikva brei sahaneng tal bruk tani tanat dalam bruk blei abih kaya blaoh dom labik daok peih ngak ka mikva, ye ini lac bruk bo mikva brei sahneng tal dahlau akaok meti. Khol drei meda pablei hu yaom glaong hu dom tan dalam 1 thun, min mikva brei duah sa labik daong haong drei meng di tuk tame pala tal rilo thun hadei ini… Kayua nan bo brei sahaneng ngak habar piah hu nao atah jang.”

Tui ong Nguyễn Đình Tùng, Tong Yam ndok Vina T&T Group, Phaok Akaok Kapul Njam patam Baoh karaoh Viet Nam, angan je di kaya ngak nong Viet Nam daok hu pasiam karo kajap di darak pasar dunya. Bruk rilo darak pasar kan gam gam peih bambang lac kein lagaih ameh piah pasiam jien mek tame karo kajap ka po bein. Meng di nan, urang ngak nong rah rah klak bruk bhian sahaneng lac pala hagait pablei nan, srap gap pandar dom caong khin brei ka ilamo ky thuat saong ngak tantu ka labik pala piah hu mbaok tame majam pablei tabiak. Jalan langyah blaoh ong Tùng mek hu meng bruk ba drei ngak tapak lac njauk lagaih, nan lac:

“Urak ini khol dahlak oh sa janih ngak bruk haong HTX saong dom kapul pambuak bruk… tuk nan mikva hu mbaok tame ta-eng hu dom adat, maong iek haong gauk. Thei ngak chung ye urang nan njauk brei tabiak, oh lac khin hu gah ngak mbang pablei salih pandar taong bhat atau hagait karei. Khol dahlak tok brei khik kajap lac hu ngak bruk haong dom menuac urang daok ngak biak, ngak njauk saong hu jalan ngak karo kajap dreih gauk piah padang angan je Viet Nam urak ini.”

Tuk dom darak pasar pablei tabiak ba tabiak tanut chuan dak harei dak catang, bruk brei pambuak bruk oh daok lac sa palih ruah blaoh daok jeng sa kein lagaih njauk ngak dahlau. Piah kaya ngak nong Viet hu tabiak hu atah, bruk jum tangin khik ramik pagun sanya saong pabak hatai je atah tukvak di gah ngak mbang pablei salih saong urang ngak nong lac tok lac sa jalan ngak./.