Di mblang dit blaong palei Hamu Tanran, xa Phuoc Huu, dom harei ini, sap pling, sap yaok lai pagam haong dom ragam tamia thaik thaok hu jeng bhian randap. Labaih dua adit tapa, yaok rituh bhap bani hu gam gauk pathram dom kadha adaoh tamia piah uan raok harei Katê 2026. Oh njauk dom urang adaoh tamia bhian ngak, min taong abih hu gam sa hatai saneng: pathram ninat, abih hatai saong abih drei piah hu dom kadha gheih meta dalam harei roya di bhap bani. Sa-ai Sử Thị Dinh - thon Thanh Đuc, xa Phuoc Huu brei thau:  “Dom adei sa-ai kumei, dom dam dara tabiak pasram tamia di mblang hu meteh bilan ini...”

Kapul nyaom urang tamia di dom palei Cam Phuoc Huu binah rilo nan lac anek saih, sinh vien saong urang nao ngak bruk. Kayua yau nan ye, piah hu mbaok tame ginup abih dalam dom van pathram, yaok urang njauk ta-eng drei ramik tukvak ka nyu laghaih. Harei ye tame sang bac, nao ngak; biar harei, melam mai jak gauk pathram. Ngan haong rilo anek saih, bruk hu mbaok tame kapul nyaom urang tamia jeng njauk lac hu sa talei angan tukvak bac megru nyu tapal jang. Yau nan min, kadha bui sambai tuk hu mbaok dalam harei roya daok ngak ka dom glaih glar yau njuan njac jang. Sa-ai Quảng Thị Ngọc Mỹ- daok di palei Huu Đuc bui sambai khan brei thau, harei ye nao bac yau nan ye khaol dahlak njauk pataom gauk tuk melam mai piah pathram.

Di Phuoc Huu, rilo kapul nyaom tamia daok pathram piah kuhrua caga dom kadha duh ka danak dak adaoh tamia di puk palei. Dom kadha hu palih ruah piah ba ngak di bimon Pô Nưgar saong bimon Pôrômê dalam harei Katê thun ini. Kayua yau nan ye, yaok ragam tamia, yaok kapul nyaom jeng hu dom urang adaoh tamia bhap bani ini pathram nao pathram mai rilo mbang. Tapa yaok kadha, dom urang ma-in caong khin meyaih khan tal bhap bani saong tuai damuai kadha siam gheih di bruk adaoh tamia meng kan di urang Cam – sa bineh oh kurang hu dalam harei mbang Katê. Sa-ai Trượng Thị Ngọc Tài brei thau ka hatai caong khin rik daong sa binah sit brei ka harei roya di bangsa…

Yaok urang sa bruk ngak, sa vaktu karei di gauk, min tuk sap pling yava tagok, ye taong abih gilac laik sa ragam. Meng dom kapul nyaom sit, dom kapul nyaom tamia pagam, pathram yaok mbang veih tangin, yaok yam panduan nao mai. Mai meng nan bo bruk pathram dak harei dak chreih chai chang tuk harei roya jaik tal mai. Ong Dương Tấn Đức – daok di palei Huu Đuc brei thau: “Rah likuk di dom kadha adaoh tamia nan lac sa makna prong jang: ba ilamo meng kan mai jaik jang haong rai rah dam dara saong patui veik panduan jao gilac dom yaom hu khik ramik tapa rilo rai rah…”

Katê daok jaik si mai tal. Di Phuoc Huu, kreh dom jan van di bruk ngak saong rai diuk, dom mbang pathram jeng patui rah tabiak meng biar harei tal melam. Sap pling, sap yaok ragam saong dom kadha tamia Cam patui veik angaok mblang pathram. Nan jeng lac jalan ngak piah ka dom yaom ilamo meng kan hu patui veik, khik ramik saong pambak prong. Saong tuk sap ginang Katê yava tagok, ye bhap bani di Phuoc Huu meda yam tame harei roya meng dom ragam tamia hu kuhri kuhria meng hatai bui sambai, kadha chreih chai saong dom melam ba abih hatai pathram./.