Yam tal jalan lac ba negar drei jeng negar hu jien mek tame kuhria rah tapa glaong di thun 2030 saong jeng negar patagok di thun 2045, tien si Nguyễn Trí Hiếu, Gah Jien padai – gilang pariak, di jabat Roh duah patagok jien padai saong taneh riya sang danaok, lac tinh Ca Mau brei hu jalan ngak cambaih laih patagok kinh te katut panak tukvak jeng ye brei ka atah dhua.

Ca Mau brei padang gah jabat ngak bruk piah roh duah, thau ka bruk nyu caga tavak saong ba tabiak jalan langyah pandar AI tame gah pasak yau ye kinh te tasik, gah ngak nong saong jirah rivang. Yaom lac yau nan, AI tok hu bruk daong min oh salih ka menuac urang hu. Tien si Nguyễn Trí Hiếu pachreih, kadha katih bruk cakrok di Ca Mau brei gam gam haong bruk karo kajap:

“Meyah khol drei tok nduac tui bruk cakrok, nduac tui dom lek taka yau ye GDP thun ini brei mek hu tanut ini atau tanut diah, min asar siam cakrok ye oh hu; alam langik dak harei dak njom nerak, urang ngak bruk dak harei dak kurang, bruk daok dang mbang ngui oh hu khik kajap, ye bruk cakrok nan tok lac bruk ngak ka hu saong thuan tuy ka gah dua lek taka so. Kayua nan, cakrok glaong saong cakrok karo kajap brei lac dua gah di sa baoh jien, tuk halei jeng nao haong gauk”.

 Tien si Lê Hùng Cường, Tong Yam ndok FPT Digital ye taong yaom, piah ka Ca Mau mek hu cakrok dua lek taka, ilamo kong nghe brei mek hu bruk dui ba meng di 4 gah kein lagaih di tinh dalam nan hu: ha tang pambuak gauk, kinh te tasik, gah ngak nong hacih sa-at saong jitvu – jirah rivang.

Tien si Lê Hùng Cường taong yaom lac, bruk pandar AI, salih taka so tapak tame bruk raong glang, ngak kaya kan tasik – lac dom gah hu prein khang di Ca Mau brei daong pasang iek catang asar siam akaok tame, palagaih jien buh tabiak ngak saong paglaong prein meraik gauk di kaya ndap nda. Urang pandar saong gah ngak mbang pablei salih brei srap gap pandar, pandar bhian haong AI piah paglaong siam lagaih bruk ngak tui tukvak.

“Piah peih ngak bruk patagok mai meng ilamo ngak kong daok dalam jalan ngak pakat negar, njauk ndom tal lac salih lek taka so, tinh Ca Mau brei padang sa danak dak ngak bruk cambaih laih. Dalam nan, tinh brei ngak cambaih laih dom kadha tah katih ka bruk buh jien tame, bruk pasang iek ilamo kong nghe tri tue nhan tao (AI), meng nan njauk hatai ba tabiak jalan langyah peih ngak AI sa bruk tantu saong cambaih laih”.

Lambaok vakil ka gah jabat pasang iek karja di bhum palei, ong Phạm Thống Nhất, Phaok Yam ndok So Ilamo Khoa hoc saong Kong nghe Ca Mau brei thau, tinh biak kham merat dalam bruk mek ilamo khoa hoc kong nghe ngak kein lagaih ka bruk cakrok drah samar:

“Ca Mau brei mboh ilamo khoa hoc – kong nghe, salih bahrau saong salih taka so ieu lac bruk daong prein luac jalan piah ngak bahrau dom bruk cakrok, cakrok samar saong yam tal jalan ngak patagok dua lek taka so. Tapa nan, salih kein lagaih ka kinh te tasik, kaya tasik, gah ngak nong hacih sa-at saong jirah rivang. Dalam luac jalan ini, gah ngak mbang pablei salih lac pasak, rahra lac urang ngak po, daok karja ye khik bruk brei kein lagaih saong dui ba”.

Dom panuac buh abih hatai tian saong jalan langyah di dom urang ilamo yau nan oh lac tok peih tabiak mata maong taong abih jang ka salih lek taka so saong pandar IA tri tue nhan tao, blaoh daok lac co so piah tinh Ca Mau padang jalan ngak patagok kinh te. Bruk mek gah ngak mbang pablei salih ngak pasak, rahra ngak po saong patagok mai meng nrn tang ilamo khoa hoc – kong nghe karo kajap brei daong Ca Mau ngak jalan ngak cakrok “duah lek taka so” dalam tukvak daok meng anak./.