Di xa Ngọc Tố, ban Can Tho, sa canah jalan nao mai dalam palei prong 3m, atah labaih 1 km hu brei ngak meng phun jien di Danak dak pakat negar padang ngak palei pala bahrau. Canah jalan ini nao tapa dom labik ngak nong, daong ka bhap bani mbuan laghaih jang dalam bruk nao mai, pajeng ba saong pablei tabiak kaya nong. Ong Thạch Bông, hu hamu apuh labik canah jalan nao tapa, bui sambai khan brei thau:

"Biak bui sambai rilo. Jalan bahrau ngak laneng lanoi, hacih sa-at. Di ini pala baoh karaoh njam patam rilo, meng tuk hu jalan, urang pablei salih mai blei tal labik, bruk pala drak mbuan laghaih. Dahlau diah ar ribaong ini tok hu dom baoh sang meng hala meng krem la-a, urak ini mikva padang ngak sang danaok karo khang kajap, anak tal njauk daok padang ngak rilo jang."

Ban Can Tho urak ini hu labaih 411 ribau urang bangsa Khmer diuk rai. Dom thun tapa, puk palei biak sangka peih ngak gam gam samu dom danak dak, bruk ngak di Ndang, Karja, tapa di nan, hu daong ngak brei salih bahrau rai diuk saong ba mbang angui mai ka mikva.

Hu jalan ngak mbang piah yam tagok, hu baoh sang siam mekre piah daok nan jeng ieu lac janih caong khin di rilo baoh sang kathaot. Dalam baoh sang bahrau ngak blaoh daok pahe iar cur bahrau, sa-ai Sơn Thị Đa Ra Ni daok di xã Lai Hòa, bui sambai khan mayai gilac, sang oh hu taneh pala drak, 6 urang mbang tok pambak tame jien nao ngak mbang pah. Dahlau diah, baoh sang meng hala sit sot taik tahak yaok mbang hu angin hu hajan, manuac urang daok dalam sang thei thei jeng bhian huac kanda. Mai meng bruk daong ngak baoh sang Prong gul pataom, daong ka manuac urang dalam sang oh daok dom melam madeih mbiah dah kayua hajan nerah, angin rabuk yuk la-ar. Baoh sang bahrau yau ye sa labik paet pandia karo grap tanat brei karo dalam bruk ngak mbang.

"Pasang akau dahlak nao ngak pah, thei pah gait ngak nan. Urak ini ngak jang padang sang, yaok harei duah hu jaik 250 ribau ndong, ginup ganap jien mbang huak tapa harei. Dahlak akau daok di sang maong iek anek... Sang klak taik tahak abih paje. Langik hajan ribuk huac kanda brei sang nyu jaleih, biak mblung mabuk rau ri lo. Sang dahlak biak bui tuk hu daong ngak sang bahrau. Likau ndua dhar phol biak rilo kayua hu daong ka sang dahlak hu labik daok tani tanat."

Oh lac sa janih daong sang daok, daong brei ka bruk ngak mbang pala drak, dom danak dak pakat negar daok ngak brei palaghaih jang piah ka mikva taom gaok haong bruk bac megru saong dom jit vu ngak mbang nao mai pablei salih di rahra.

Xa Gia Hòa hu jaik 42% bhap bani lac urang bangsa takik. Urak ini, ty le bhap bani hu blei harak mbao hiem y te saong hu pabak brei taong baih. Mai meng bruk patrun naong trak jien ndo gah y te, mikva kham merat ngak mbang, pala drak, rai diuk dak harei dak patagok; baoh sang kathaot urak daok tok jaik 0,2%. Ong Lâm Hal, Akaok duk jabat ilamo –  rah ra xa Gia Hoa, brei thau:

"Bhap bani mboh bui sambai anak bruk sangka di Ndang saong Karja ngan haong bruk mong iek pren yava, abih di nyu lac bhum urang bangsa takik. Urak ini, bhap bani hu nao pasang iek ruak di rilo labik jeng hu harak mbao hiem y te. Rai diuk di mikva Gia Hòa hu rilo salih bahrau, baoh sang athaot trun mboh di meta, rai diuk dak harei dak trei sil jang."

Meda mboh lac, bruk sangka, buh jien tame ngak di Ndang, Karja oh lac sa janih ngak ka mbaok meta di bhum srok dak harei dak dah dai blaoh daok pabak brei hatai jia, pren khang piah ka bhap bani Khmer yam tagok, dak padang rai diuk dak harei dak trei sil, haniem phol./.