Di xa Anh Dung, tinh Khanh Hoa, dalam 17 anek saih di Sang bac Pho thong Bangsa gam bac gam daok THCS Phan Đinh Phung tut angan tame palih ruah bac tal 10 thun bac 2026-2027, barau hu 3 adei hu angan njauk palih ruah. Langiu di nan 14 anek saih daok veik daok dang anak oh thau yau habar di dom palih ruah karei di gauk ka bruk bac megru di 

Tut angan tame 2 kadha caong khin tame bac tal 10 min taong abih 2 kadha caong khin jeng oh njauk palih ruah, rilo anek saih di xa Anh Dung oh ka thau palih ruah nao bac megru di sang bac halei yau nan ye njauk gilac sang bac klak tut angan tame bac tal 9 sa thun tra piah patui bac megru saong kuhria caga ka mbang palih ruah di thun hadei.

Dom adei angan Chamaléa Duy, Pi Năng Thị Mai, Ya Lức Vắng daok di xa Anh Dung, tinh Khanh Hoa tapak tape khan brei thau lac:

“Thun blaoh anek tut angan tame dua kadha caong khin saong pakacah laik abih dua kadha caong khin, kayua yau nan ye adei lakau khin bac tal 9 sa thun tra.’’

“Thun blaoh adei tut angan pakacah tame kadha tui hatai caong khin 1 sang bac Pi Năng Tắc, hatai caong khin 2 di sang bac Nguyễn Du, taong abih dua baoh sang bac caong khin nan oh pagam hu. Urak ini adei likau bac tal 9 sa thun tra piah pakacah tame tal bac 10 sang bac Nguyễn Du."

"Adei mboh biak duh hatai kayua oh gam tame hu tal bac 10, gam saong di nan adei jeng oh ginup jien ndo, sang adei jeng daok hu biak rilo bruk, yau nan ye adei padeih bac."

Ini oh njauk lac dom anek saih biak karei ta-eng. Di sang bac Pho thong Bangsa gam bac gam daok THCS Phan Đình Phùng, thun bac 2025-2026 hu 74 anek saih bac tamat blaoh danak dak THCS. Yau nan min, tok hu 17 adei tut angan palih ruah tame tal bac 10, meblah 23%. Dalam nan, hu 3 adei gam, bak hu 17,6%; 14 adei oh gam palih ruah.

Ong Cao Thiên Chương, Akaok sang bac Pho thong Bangsa Gam bac gam daok THCS Phan Đình Phùng, xa Anh Dung, tinh Khanh Hoa brei thau:

 “Dom thun dahlau, di xa Ma Nới klak hu parabha dom chi tieu piah ka anek saih bangsa takik hu brei palih ruah tame tapak sang bac THPT Pi Năng Tắc. Thun ini, tui sarak adat bahrau, bruk palih ruah hu peih ngak samu gauk, kadha meriak gauk glaong jang yau nan ye dom adei gam palih ruah hu nyu biar jang. Sang bac caong khin dom pakat karja mong iek jao brei dom taka chi tieu piah ka anek saih urang bangsa takik di xa Anh Dung, tapa di nan peih tabiak jalan bac megru brei ka dom adei.”

Meyah dalau diah bruk bac megru THPT di anek saih bhum kan kandah hu mbluak di bruk daong ba meng sarak brei ka anek saih urang bangsa takik, ye urak ini tuk jalan palih ruah hu salih karei, ngak brei ka bruk meriak gauk jeng prong jang. Gam saong dom anek saih hu pren bac oh ka karo kajap, jalan tame sang bac THPT karja padang mai meng nan mboh kan kandah jang. Ong Lê Đình Thuần, Phaok akaok So Pato megru Khanh Hoa brei thau:

 “Dom anek saih oh palih ruah hu tame tal bac 10 tui jalan pakacah atau palih ruah, gah pato megru hu peih tabiak dom jalan nao bahrau, dalam nan iek prong tal bruk parabha canah jalan hadei di tamat bac blaoh THCS. Dom adei meda nao tame dom labik pato bruk ngak piah bac, atau gam bac ilamo gam bac bruk ngak. Tuk bac bruk ngak, dom adei hu brei bac thaoh oh mek jien saong hadei di 3 thun jeng daok mbang pakacah piah tamat blaoh danak dak THPT’’.

Tui dom anek saih oh mek hu angan palih ruah tame tal bac 10, tame bac megru bruk ngak ieu lac sa jalan nao njauk saong bruk hu mboh di anak meta. Yau nan min, anek saih bhum ceik jeng caong khin hu daong jien nao mai, jien mbang daok, khaw tin palih ruah saong sarak bac megru bruk ngak, kayua lac jalan nao mai atah bayah saong rai diuk baoh sang kan kandah gaok tuk mai lac hala paga pacang prong. Kayua yau nan ye, gam saong bruk patagok tacei pato bruk ngak, parabha canah jalan avan, saong bac jeng hu caong khin karja puk palei saong dom labik sang bac pato tacei bruk ngak njauk pambuak bruk, ba brei rilo jang kadha palih ruah ka anek saih; gam saong di nan daong jien padai nao mai, labik daok brei ka anek saih bangsa takik njauk nao bac megru atah di sang saong mong iek hu sarak pabak brei taka chi tieu tal bac 10 ka nyu lagaih saong anek saih xa Anh Dung./.