Hu dom panuac salam hu jeng bhian randap haong mikva dom bangsa Tay Nguyen luac labaih 30 thun tapa. Mikva daok bhum atah bayah pang tuk nao tagok apuh. Mikva nao jalan pang angaok sruh radaih. Urak ini, hu urang pang jeng daok pang panuac salam nan meng baoh radio klak caik taphia ghing apui, hu urang salih tapa pang meng sa website papar sap.

Dom panuac salam meng sap amaik menek yava tagok gam gam angaok riyak papar sap negar, atau panduan ba nao angaok ar thak taka, samu gauk yau mbaik ghang jameng po sang gandi gandang kreh glai ram ceik glaong, ndung ba thaik binguk dom mbuon palei daok salih bahrau yaok harei; pacang khik saong peih ngak tui jalan ba di Ndang ka bruk dak padang bein ilamo Viet Nam prong glaong, mbak carak asal ilamo bangsa.

Harei 1/7/1993, danak dak sap Ê Đê di Rayo sap ndom Viet Nam di Tay Nguyen hu tagok riyak papar sap negar. Blaoh hadei nan dom danak dak sap Jarai, Ba Na, Sê Đăng, K’ho, M’Nông… jeng dak padang saong patagok, jeng baoh tatua bhian randap haong bhap bani dom bangsa. Min gah likuk dom minit papar riyak yaok harei nan lac sa vaktu bak glaih glar.

Oh lac sa janih brei ka baoh panuac thuat ngu chuyen mon, di angan dom jabat karja, angan je atau angan taneh aia angaok dunya jeng lac kadha cuang kandah brei ka urang ngak bruk rayo. Dom harei bilan akaok mereip papar sap tagok riyak danak dak papar sap bangsa, meyah khik tamo jalan ndom puac yau urang Yuen, ye ty le njim sap Yuan dalam danak dak nan biak ralo prong, ngak ka mikva mboh oh jaik taphia. Meng hagait rah tabiak anak meta nan, dom urang ngak papar sap bangsa di Rayo sap ndom Viet Nam hu ngak bruk yau dom urang gah sap ndom akhar vak: nao duah baoh panuac di bangsa drei.

Yaok mbang nao ngak bruk trun mbuon palei, urang vak cih di Rayo sap ndom Viet Nam jeng hu pandar mek mikva javap jaleiy kadha sua tangi meng sap amaik menek, min rilo mikva tok khin javap jaliey meng sap Yuen, kayua lac sap amaik menek oh hu ganap baoh panuac ndom mayai yau bahsa Viet. Gaok tuk mai, dom mbang duah thau ka adat cambat meng kan, rilo mikva jeng ndom meng sap Yuen, jeng brei thau kayua lac oh hu ganap baoh panuac di nyu.

Oh njauk lac oh hu panuac. Blaoh dom baoh panuac nan dak harei dak duak dalam rai diuk bahrau harei ini. Saong labaih 30 thun tapa, dom urang ngak bruk papar sap bangsa di Tay Nguyen daok jak gauk nao duah gilac dom baoh panuac kadha njauk dauk dalam nan.

Dalam dom danak dak papar sap bangsa, ragu ragam hu labik dang biak karei. Dom kadha adaoh bhap bani, sap kong chieng… yava tagok hadei di yaok khaw tin, dalikan, oh lac sa janih ngak gheih brei ka danak dak blaoh daok ngak jeng bruk pambuak pagam biak dalam haong urang pang. Saong caik hu dom sap yava nan lac sa vaktu ngak bruk abih hatai jai di dom dom urang cih vak danak dak.

Harei ini, papar bangsa di Tay Nguyen daok panduan jao tapa rai rah dom urang cih vak ranaih. Dom urang ini oh lac tok ngak radio. Blaoh daok yam tagok ar thak taka. Dom fanpages, website… hu jeng dom “gah tangin pagam atah” di papar sap bangsa.

Klau pluh thun dahlau, dom urang papar sap bangsa di Tay Nguyen nao duah yaok baoh panuac meng di kreh dom mbuon palei. Harei ini, rai rah urang cih vak ranaih patui nao duah jalan khik ramik sap amaik menek di kreh glai ram thong tin angaok mang. Dua jalan ngak karei di gauk, min gam sa hatai caong khin: Piah sap ndom di dom bangsa par glaong jang; piah tuk halei jeng hu sap ndom, hu sap yava di glai ram ceik glaong Tay Nguyen ralai pagam dalam Sap ndom Viet Nam./.