Dalam dom anek saih tame bac thun akaok meti di Sang bac Ilamo Kong an bhap bani II hu adei angan Y Gió M’lô, anek saih tal bac 10, anak urang bangsa M’Nông, daok di palei Drang Phốk, xa Buôn Đôn, tinh Ndak Lak. Amaik ame di adei lahik abih kayua labuh ruak triak, 5 adei sa-ai tok thau pambak tame gauk piah diuk rai kurang anak kurang lakuk. Sa-ai prong Nguyễn Thị Ngân M’lô njauk padeih bac piah daok di sang raong ba dom adei. Kayua yau nan ye, harei harei adei Y Gió taduan mek hu harak njauk palih tame Sang bac Ilamo Kong an bhap bani II jeng ieu lac harei adei njauk hatai caong khin. Sa-ai Nguyễn Thị Ngân M’lô khan brei thau:

“lah biak rilo. Yaok thun bac nan lac tapuk ba-ar, khan ao, ndap nda bac megru. Kayua lac sang bac pak di ini atah dom pluh mbaik kilomet jalan, nan jeng ieu lac kadha susah cuang kandah ralo abih di baoh sang gait. Drei bac bahrau tal tal bac 9 blaoh padeih hatai caong khin nao bac di drei. Hadei di taduan mek harak palih tame Sang bac Kong an nan oh lac tok hu hatai caong khin di adei blaoh daok lac hatai caong khin di drei, lac hatai caong khin di dalam sang”.

Tui Y Gió, dom harei akaok mereip meti di sang bac nan lac sa yam salih prong. Atah di sang, ngak randap ngak krein haong anai gru, cei gru, ayut cuai sahabat saong labik daok pataom gauk, adei mboh dak iek mboh prong bruk bac megru di drei gam saong dom urang gauk ralo dalam sang danaok.

“Anek mboh anit ranam adei anit sa-ai. Adei kham merat bac megru piah ngak labik pambak pa-eit ka dalam sang di drei”.

Jeng tame bac thun akaok camereip meti di Sang bac Ilamo Kong an bhap bani II, adei Hoàng Ngọc Hoa, anek saih tal bac 10, daok di xa Ea Wer, tinh Ndak Lak hu labik siam lagaih piah brei ka bruk bac megru, sang bac bahrau daok brei pren khang piah ka adei Hoa tui hatai caong khin hu raong ba meng sit mai. Meng hatai caong khin jeng sa urang kong an, adei hu hatai kham merat tuk hu bac megru dalam baoh sang biak karei ini:

“Meng daok di sit anek hu hatai caong khin jeng sa urang kong an, oh thau anek ngak jeng ha oh, min urak ini anek hu tame Sang bac Kong an blaoh paje, anek hu mboh hatai caong khin di drei jaik hu tal mai blaoh, piah ngak labik pambak ka anek ame saong kayua lac anek jeng caong khin palei negar drei tuk halei jeng sron mbuan karo”.

Đại tá Mai Hữu Vạn, Akaok Sang bac Ilamo bhap bani II brei thau, sang bac brei thau dak padang labik pato megru siam mekre, gheih ghang nan lac bruk ngak prong di abih njauk ndom mayai lac hu dom anek saih taduon rilo khat lahik rambah di dalam rai diuk.

“Sang bac Ilamo Kong an bhap bani II kham merat pakacah gauk jeng baoh sang haniem phol – labik dom adei hu mong iek, hu pato pakai, hu pathram saong hu jang hatai jia piah yam tapa rai diuk daok kan kandah”.

Meng dom baoh sang daok rilo cuang kandah tal baoh sang bac megru, mbang ndih tani tanat, kadha dom adei taduan mek hu oh lac sa janih bruk bac megru siam lagaih blaoh daok lac hatai jia piah yam nao gah anek. Sa baoh sang bac bahrau taduan raok dom anek saih akaok camereip, saong jeng lac dom harei akaok meti ngak randap hong anai gru, cei gru, ayut cuai sahabat nan lac dom hatai caong khin daok hu raong ba. Tui Y Gió, nan lac caong khin hu jeng labik pambak ka baoh sang di drei. Tui Ngọc Hoa, nan lac caong khin hu jeng urang kong an. Daok ngan haong rilo baoh sang, caong khin biak mbuan mbiah nan lac anek drei hu bac megru, jeng manuac jeng urang saong hu sa harei hadei siam gheih jang./.