Meng kan dahlau mai, rai diuk di baoh sang ong Mang Phé, urang daok di palei Ham Can, xa Ham Thanh, tinh Lam Ndong pambuak pagam haong bruk ngak hamu apuh. Dom thun jaik di ini, Tuk karja brei mesre phun jien piah raong limo, ong marat hatai peih prong van ro piah raong limo binai ine piah menek saong palimek limo cak rok patagok tui jalan mek ralo pablei, meng di nan jien mek tame kadung sang ong hu rilo jang, rai diuk di baoh sang ong dak harei dak siam laghaih jang. Ong Phé brei thau, Karja hu sarak daong raong limo, ong biak bui sambai saong chreih ngak mbang, raong glang.

      " Raong limo ye drei njauk kham merat, bilan ini urang tame yuak kuak ye drei raong rah di sang, daok bilan pandiak ye drei raong palao, pon nerang daok kandaong talaik dalam hamu ye drei pataom ba mai sang piah brei ka limo mbang, daok bilan pandiak ye drei cakak dhan phun gara thanh long ka nyu mbang, raong limo drei caong khin ka limo nyu menek rilo piah hu jien ba-yar ka Gilang pariak, karja brei ka drei mesre phun jien."

        Atah di taneh raong glang lamo di ong Mang Phé oh atah, baoh sang ong Mang Văn Nui, daok di palei Ham Can, xa Ham Thanh hadei di taduan mek hu 11 drei pabo blaoh gait buh jien tabiak ngak van ro, kham merat raong glang piah ka tapul kabo di drei manek cak rok patagok ralo siam mekre tui njauk ilamu raong glang.

        Ong Nui brei thau, mai meng bruk hu pato pathram ka ilamu raong pabo nan ye ong thau jalan mong iek tapul pabo meng bruk brei mbang, klauk jru pacang caga, juak pagam pajaih ka nyu manek,... jeng hu ong Nui peih ngak siam nan ye tapul pabo di sang ong cak rok khang kadang. Meng 11 drei pabo ine meng camareip, tal ini tapul pabo di sang ong Nui menek tagok jaik 30 drei.  

       Pabo mada ieu lac anek athur raong bahrau di xa Ham Thanh, min tapi tui taong yaom di karja puk palei, bruk raong pabo urrak ini di 7 baoh sang urrang bangsa takik Raglai daok di xa Ham Thanh ba mai siam laghaih, tapul pabo cak rok patagok siam, takik ruak kik saong taong abih pabo binai ine jeng hu menek, meda ba mai yaom jien mek tame tani tanat brei ka dom baoh sang hu raong glang nyu. Ong Mang Văn Trung, lambaok ka Mban khik iek palei Ham Can, xa Ham Thanh, tinh Lam Ndong brei thau:

        "Dahlak mboh dom baoh sang raong pabo biak siam, anek pabo  nyu laghaih haong bhum bhaok labik ini kayua nyu hu balau biak karei, nyu bom randa haong langik tasik, takik ruak, tok hu janih ruak aih craoh biasa bhian ye drei sanang pacang caga hu. Urak ini, pabo cak rok patgaok siam, caih menek jeng rilo."

        Ong Mang Văn Khói, Akaok kapul nyaom urang ngak nong daok di xa Ham Thanh, tinh Lam Ndong brei thau, dut haong dom janih anek athur, menuk ada karei, pabo mbuan sig lang raong, nyu bom randap haong langik tasik thu pandiak bhang jeng ye hareik hala brei ka nyu mbang kurang. Jien buh tame akaok mereip biar, pabo menenek samar drah, caong khin takik pandap mbang… Yau nan min jeng njauk saneng kuhria.

        “Dalau di abih Pasak jeng kuhria tal bruk duah labik pablei ralo tabiak ka urang raong glang, min tal tukvak ini jeng oh ka mboh labik piah pablei tabiak, pabo nan lac anek athur raong glang bahrau di puk palei, yau nan ye dom baoh sang jaik taphia oh ka thau pabo nan lac anek hagait, pabo haong pabe nyu dreih gauk, min asal kadha di drei pabo nyu karei, pabe oh mbang hu dalam aia min pabo nyu mbang hu, nyu mbuan mbang jang anek pabe. Caong khin dalam tukvak masa mai meng anak daok tal, Pasak jeng sangka caik hatai tal bruk raong bahrau ini saong duah labik pablei tabiak brei ka mikva”.

        Langiu di anek kabau saong pabe, bruk raong glang pabo di xa Ham Thanh, tinh Lam Ndong daok caong khin ba mai kadha caong khin brei ka bhap bani urang raong glang, njauk ndom mayai lac abih di nyu lac bhap bani bhum urang bangsa takik. Yau nan min, piah ka bruk raong glang bahrau ini mek hu rilo baoh jeng siam mekre, daong ka mikva patagok jien mek tame, patruh kathaot khang kajap ye labik pablei tabiak brei ka ralo ndap nda blei salih meng anek pabo jeng njauk kuhri kuhria tal./.