Taneh tuh jaleih di palei Sa Phô, xa Đất Mới oh daok lac kadha bahrau blaoh nyu daok dui suai atah lavik dak harei dak khang catang. Di jalan kraong Pabah Praong - Cửa Lớn bahrau atah labaih 500 met-labik pataom dom labik raong hadang, aring pajaih-hu ciuk tal 4 mbang taneh tuh jaleih meng akaok bilan hajan tal ini.

Baoh sang ong Phạm Văn Tý mai daok di labik ini raong hadang pajaih meng di thun 2018. Hadei labaih 8 thun ndam gam haong bruk ngak, ong hu mboh kraong ia “mbang” tame dalam taneh riya labaih 15m, luan abih ar kraong karo kajap saong taneh riya di sang gait.

 "Dahlau abih taneh tuh jaleih ye urak ini lac baoh sang dahlak hulin oh hu sang piah daok. Dahlak hulin raong gam daok di sang mikva palei pala. Dalam ini dahlak lac hadang pajaih nan taneh tuh jaleih ngak kan kandah tal bruk ngak mbang di sang dahlak rilo lo. Labik ini ye dom thun dahlau jeng jaleih di ini di diah min di thun ini ye jeng di 4 labik paje nan. Taneh tuh jaleih biak samar”.

Jeng dreih yau nan, baoh sang ong Đỗ Văn Em pagam haong bruk pabam padang, aring pajaih meng thun 2000, jeng hu 2 mbang taneh tuh jaleih ngak kan kandah tal sang danaok. Malam 17/7 bahrau meng blaoh, baoh sang gilac hu sa mbang nduac tabiak tuk baoh sang di urang adei likei atah di nan tok dom pluh met katuak jaleih trun ia nduac gaving tame jaik tuk 2 subuh page.

Tui ong Em, dahlau diah tuk jaik si jaleih taneh bhian rah tabiak dom inem talah tanrac sit yau ye brei khan dahlau, min jaik ini dom mbang taneh tuh jaleih rah tabiak biak katuak. Khat lahik ka drap ar jien padai biak praong min rahra di ini ngak bruk dom pluh thun, panduan nao labik karei ye oh thau ngak hagaik piah duah jien yau nan ye jeng daok di labik ini, tok caong khin hu jalan langyah karo kajap piah sahnang hatai ngak mbang.

 "Duh hatai abih lac jalan jaleih pajen. Di labik ini langiu di bruk daok dang mikva daok ngak mbang pablei salih pajaih anek raong glang. Ngak mbang pablei salih, pajeng ba hadang, aring pajaih nyu kan kandah. Urak ini jeng caomng khin karja palei daong, piah pakajap pakaro taneh tapen kraong blaoh brei ka nyu khik hu taneh di labik raong anek pajaih”.

Ong Tô Tự Nguyện, Phaok Akaok UBMT negar xa Đất Mới taong yaom labik taneh tuh jaleih tapen kraong Cửa Lớn biak trak, kadung jien di bhum palei oh ginup piah pakajap taneh tuh jaleih piah pakajap mbaok ar kraong. Meng akaok bilan 5 tal ini, dalam bhum xa daok tamuh 14 labik taneh tuh jaleih karei. Yaok tuk rah tabiak bruk khang kajap, kapul urang karja gam haong mikva rahra hu patagok hatai daong gauk, daong taoh talaih, panduan drap ar ndap nda. Min, piah daong rahra hu tani tanat dui suai atah, bhum palei biak khin hu bruk buh jien tame ka majam ar kraong khang kajap karo meng di dom pakat, dom gah karja.

 " Tui di bhum palei, tukvak masa tapa jeng srap gap kadung jien di bhum palei piah meyah tamuh taneh tuh jaleih rah tabiak ye brei pasiam nyu. Min, bruk ngak brei padang ngak anak meta oh meda hu pakajap abih hu. Xa brei panuac ndom ka tinh, hu bruk daong samar chip piah pasiam pakajap, jeng yau ngak gilac dom jalan tayah trak piah hu ka mikva nao mai”.

Bruk rah tabiak taneh tuh jaleih di xa Đất Mới brei mboh ka bruk daok rah tabiak di dalam tinh Ca Mau. Meng akaok thun tal ini, dalam tinh hu rah tabiak 91 mbang taneh tuh jaleih gam haong taong abih atah labaih 2,4km, ngak khat lahik 84 baoh sang, 66 tan sara saong ha tang di 1 Balai Pasang iek Bien phong. Bruk samar drah peih ngak dom jalan langyah danak dak oh hu sa janih lac brei pacang khik hatang jalan mbak, blaoh daok piah ka yaok rituh baoh sang rahra bhap bini daok di tapen kraong Cửa Lớn pacang khik drap ar jien padai, khik kajap bruk ngak mbang suai atah./.