Kuhria tal harei 31/7, dalam tinh hu ngak salah blaoh bruk pasang iek prein yava brei ka labaih 1,4 trieu urang, hu 65,5% rahra daok dalam sarak pasang iek. Ngak hu bruk ini, tinh Ca Mau daok dang akaok dalam gah ngak danak dak di dalam negar. Gam haong di nan gah Y te hu peih bruk padang saong pabak labaih 547.000 Harak prein yava meng ndien tu, mek hu labaih 25%. Tapa nan hu dom bac si duah mboh dil samu ka dom ruak yau tagok darah, me-ik saradang, arak baoh hatai, ruak jalan thuak yava… Dom labik y te hu dil samu langyah ka bruk ngak, bruk mbang huak siam gheih, gam haong nan ba urang ruak tame sarak pasang iek saong taong ruak tui yaok tukvak. Ong Châu Văn Tạo, rahra 75 thun nao pasang iek prein yava halang di xa Đầm Dơi blei thau:

"Rup dahlak praong thun, gilac bhian ruak hakik. Meng hu pasang iek blaoh paje, dahlak mboh biak sambai hatai. Dahlak hulin jeng caong khin dom labik y te jaik taphia yau ini piah kein lagaih nao pasang iek ruak. Danak dak ini hu angan makna biak praong, brei mboh bruk sangka di Ndang ngan haong rahra. Khol dahlak meyaom brei ka bruk peih ngak pasang iek ruak taong ruak yau ini, biak lagaih ka urang praong thun. Nao gilai tal ini hu jaik, meyah nao atah jang ye dahlak oh hu kein lagaih piah nao”.

Yaom mada mek hu bruk ngak lagaih, min mboh bruk peih ngak di pakat bhum palei jeng daok rilo kan kandah. Di xa Trần Văn Thời, tok bahrau pasang iek prein yava ka labaih 8.000 urang, mek hu labaih 20% jalan ngak. Tui ong Trịnh Việt Khái, Phaok Akaok UB Bhap bini xa makna lac kayua bhum palei hu mbaoh tangin xa salamat labik, 100% mikva daok hu bao hiem y te. Langiu di nan, mikva daok khik hu sahaneng lac bruk pasang iek di xa tok mek hu bruk akaok meti. Piah talaih kan kandah, UB Bhap bini xa pandar dom kapul pasang iek ruak trun tapakl yaok palei, brei kein lagaih siam abih ka rahra. Ong Trịnh Việt Khái, Phaok Akaok UB Bhap bini xa Trần Văn Thời brei thau:

 " Anak bruk lagaih brei ka rahra mai tal labik y te pasang iek ruak daok biar, xa hu pato tacei balai y te pathau khan tukvak pasang iek cambaih laih saong peih bruk pasang iek ruak tapak di yaok palei. Bruk ngak ini piah brei kein lagaih siam abih, daong mikva oh nao atah blaoh jeng hu sangka prein yava akaok meti hu siam abih”.

Langiu di bruk kanda nao pasang iek ruak di dom urang, ye bruk karung halau prein gah y te jeng lac bruk kan kandah di dom balai y te xa. Ong Hồ Thiên Chúa, Phaok Akaok UB Bhap bini xa Khánh Hưng brei thau, danak dak akaok meti hu daong salih bruk randap di bhap bini meng bruk “taong ruak” tuk rah tabiak bruk brei mboh tapa “caga ruak” hu srap gap caga. Min, biak nao balai y te xa urak ini oh ka hu srap gap caga ginup dom kaya njauk hu saong jeng kurang kapul bac si hu ilamo dalam piah ngak bruk ini.

 "Kapul y te, bac si pasang iek halang brei khik hu kajap ilamo, brei hu ginup bac si chuyen khoa piah khik kajap bruk pasang iek ruah jeng yau pato tacei jaik lam sang njauk lagaih. Langiu di nan, radaih gilai duh ka bruk pasang iek ruak halang jeng oh ka srap gap ginup. Lac dom kaya njauk hu mbuan mbiah abih yau jamraik dut iek ndien tam atau jamraik sieu am jeng daok kurang”.

So Y te Ca Mau jeng maong mboh dom kan kandah ini saong tacei tabiak bruk gal tavak ka kong nghe khau tin, urang ngak bruk patame du lieu gam kurang gam brei taduan khau tin biak praong ngak ka tukvak pabak Harak prein yava ndien tu suai. Njauk ndom tal lac, kan kandah praong abih urak ini lac oh ka hu bruk di jien padai tani tanat ngan haong bruk pasang iek prein yava tui tukvak.

Piah danak dak pasang iek prein yava taong abih rahra hu peih ngak suai atah, gah Y te hu ba panuac tagok UB Bhap bini tinh Ca Mau, likau Mentri Y te aval drah ba tabiak sarak jien padai saong tacei ba bayar jien pasang iek prein yava yaok tukvak meng Kadung jien Bao hiem y te, ngak bruk hukum tani tanat./.