Taduan raok khaol dahlak dalam baoh sang bahrau, amuk Ngô Thị Thung, umur 77 thun, urang bangsa Khmer daok di palei Âu Thọ A, xa Vĩnh Hải drut druai khan mayai lac: meyah oh hu bruk sangka, daong ba di Karja, ye tal harei ini amuk jeng daok dalam baoh sang taik tahak, angin yuk la-ar hajan laik nerah. Meng phun jien daong 60 trieu ndong di Danak pakat negar, gam haong phun jien tak pataom hu di baoh sang, amuk hu padang ngak baoh sang bahrau siam gheih, khang kajap. Urak ini, amuk tok daok thau ngak bruk di sa labik ngak akaok lasun tim piah hu jien dalam rai diuk.

“Dahlau diah sang danaok taik tahak, oh daok hagait, sang kathaot yau nan ye oh hu jien piah brei pasiam. Urak ini hu karja daong brei jien padai, dahlak padang ngak sang bahrau, uan rilo. Yaok harei, dahlak jeng nao ngak apah piah duah jien, kuhri kuhria ka rai diuk.”

 Meng phun jien di danak dak pakat negar, xa Vĩnh Hải hu buh jien tame ngak jalan mbak nao mai, daong ngak sang danaok, palaghaih piah ka bhap bani cak rok patagok bruk ngak mbang pala drak, paglaong rai diuk. Gam haong di nan peih ngak rilo bruk ngak daong ka bruk ngak mbang pala drak laghaih haong langik tasik taneh riya bhum bhaok yau ye raong kaya ikan dalam aia, pala drak, raong glang, pablei salih sit saong pato bruk ngak brei ka urang ngak di palei pala urang ngak nong.

Ong Bùi Duy Hiện, daok di palei Huỳnh Kỳ, sa di dalam dom baoh sang khang hatai panduan salih tapa pala tamakai pablak haong pala akaok lasun tim angaok mblang taneh tapain tasik. Hadei di mbang pala cammareip akaok lasun tim, ong pasiam veik taneh piah pala 2 mbang tamekai yaok thun. Mai meng laghaih di taneh riya, gam haong bruk pandar ilamu pala drak tame bruk mong iek, rilo thun tapa bruk ngak ini ba mai rilo baoh jeng siam mekre, jien ye jien mek tame hu biak glaong. Mai meng bruk panduan salih ini, hu daong biak rilo urang ngak nong di puk palei hu jien mek tame tani tanat. Ong Hiện brei thau:

“Sa kong kuhria rah tapa mek hu jaik 5 tan baoh tamakai, njauk mbang mada paik hu labaih 6 tan. Yaom pablei meng 5.500 tal 7.000 ndong/kg tui yaom di darak pasar. Yaom jien buh tabiak ngak meng 10 tal 12 trieu ndong, kein laba mek tame dalam baoh sang hu labaih dua pluh trieu ndong.”

Amuk Kim Thành Trúc, Phaok akaok duk Ilamo – rah ra xa Vĩnh Hải brei thau, dalam vaktu 2021 - 2025, xa hu peih ngak siam danak dak pakat negar cak rok patagok bruk ngak mbang kinh te – rah ra bhum urang bangsa takik gam haong taong abih phun jien labaih 8,4 ty ndong. Meng pren khang di ini, xa hu daong brei taneh daok, sang daok, panduan salih bruk ngak ka 221 baoh sang; daong ba brei aia pandar ka 30 baoh sang kathaot, jaik kathaot, daong ka mikva grap tanat rai diuk. Mai meng bruk ngak nan, puk palei daok peih nngak rilo bruk ngak karei cak rok patagok bruk ngak mbang pambuak pagam haong yaom jien mek tame, ngak brei patagok jien mek tame, patrun kathaot khang kajap. Langiu di nan, bruk pato tacei bruk ngak, daong brei mesre phun jien jeng hu sangka peih ngak, daong ka bhap bani cak rok patagok kinh te baoh sang.

“Hadei di tuk peih ngak karja dua pakat saong hu jeng labik daok dalam ban, xa hu sangka buh jien tame ngak rilo jang, ngak jeng pren khang cak rok patagok kinh te – rah ra taong abih gah. Tal harei ini, rai diuk di bhap bani bangsa takik dak harei dak cak rok patagok; baoh sang kathaot, jaik kathaot patrun jang yaok thun. Urak ini dalam xa daok 82 baoh sang kathaot saong 32 baoh sang jaik kathaot.”

Mai meng bruk sangka di Ndang, Karja gam haong hatai gul pataom, kham merat yam tagok di rahra bhap bani, xa Vĩnh Hải harei ini dak harei dak salih bahrau. Jia lac, meng takai ini oh lac tok ngak brei cak rok patagok rai diuk ka bhap bani blaoh daok ngak jeng pren khang piah ka puk palei patui cak rok patagok khang kajap dalam tukvak mai meng anak daok tal./.