Jaik 60 trieu ndong patak pataom hu hadei di tukvak atah palei nao ngak, diuk pasang sa-ai Lâm Thị Ngọc Hoa, urang bangsa Khmer daok di puk Xẻo Cốc, xa Lai Hòa, ban Can Tho, hu buh jien tame raong ikan hadang ia meteh mbak meteh taba ngan haong hatai caong pasiam veik, tani tanat raidiuk. Min, kayua rilo makna, bruk raong hadang oh jeng, sang laik tame bruk lahik abih. Oh daok phun jien piah ngak mbang, dua diuk pasang luac thun nao ngak apah piah hu jien cai pandar dalam raidiuk. Bahrau ini, sang sa-ai hu pasang iek brei daong bruk raong glang pabaiy hu pagap yau sa “gal vah duah jien”, peih tabiak kein lagaih mbeik drei yam tagok tani tanat raidiuk. Sa-ai Lâm Thị Ngọc Hoa brei thau:

"Ndua dhar phol oh abih, thun ini hu daong sa yau pabaiy ine ngak pajaih. Urak ini kham merat sangka iek glang piah hadei ini parilo tapol, hu kinh te tani tanat, patak pataom piah padang sang. Urak ini, dahlak yuak hareik yaok harei, daok sang drei ye nao khik danao hadang ka urang, tuk daok pasang ye hu daong sangka iek glang pabaiy."

Daok ong Diệp Phước Nghĩa, phuong Mỹ Xuyên, mai meng hu mesraiy phun jien tui sarak 50 trieu dong tapa 2 mbang mesraiy, hu buh jien tame pala njam patam di angaok 4 kong taneh. Ong daok buh jien tame ngak jamraik pruh ia tui jalan patak pataom, pandar ilamo ky thuat saong pandar jamraik tame ngak mbang, nan ye kein laba mek hu 50 trieu dong yaok thun. Meng bruk daong di Karja gam haong hatai ta-eng uak drei patagok, ong hu padang hu sa baoh sang praong laneing lanoi saong patruh eik patrun kathaot di thun 2024.

"Urak ini pala njam patam oh daok lahik rilo prein tuk pandar jamraik majam pruh ia sit sit, pandar mo-te njuk ia tuh, patakik hu rilo jien buh tabiak. Langiu di nan, jalan mbak hu padang nao tal apuh nan gah ikak kaiy pataom blei hu kein lagaih. Mikva hu taneh jaik gauk jeng jak ba gauk sangka piah mek hu sa mbang pala hu laba glaong."

Ban raya Can Tho hadei di tuk pagam hu jaik 495.000 mikva bangsa takik, dalam nan rilo abih lac bangsa Khmer gam saong labaih 411.000 urang. Dom thun tapa, dom danak dak jalan ba tabiak ngak pakat negar, danak dak saong sarak brei ka bhum mikva bangsa takik hu dom pakat, dom gah sangka peih ngak saong mek hu jak jeng siam mekre.

Ralo di nyu dalam nan hu lac, dalam thun blaoh, ban raya hu peih ngak siam lagaih Danak dak jalan ngak pakat negar ka bruk patagok kinh te – xa hoi bhum urang bangsa takik, ngan haong taong abih phun jien labaih 305 ty dong. Tapa di nan, rilo danak dak jalan mbak, pato megru, iek glang prein yava hu buh jien tame; sang daok saong phun jien hu daong brei mesraiy, daong ka rahra patagok bruk ngak mbang, dak harei dak tani tanat raidiuk. Tal ini, dom baoh sang kathaot dalam bhap bini bangsa Khmer di dalam ban trun daok jaik 1.900 baoh sang. Ong Lê Trung Tuấn, Phaok Akaok UB Bhap bini xa Thạnh Thới An, ban raya Can Tho brei thau:

“Langiu di bruk peih ngak dom sarak ngan haong bhap bini bangsa takik, xa daok sangka iek praong bruk pato pakai bruk ngak tapa tal bac pasram ilamo ky thuat raong glang, pachreih bruk ngak nong, pato bruk ngak… Tapa di nan daong ka rahra paglaong ilamo bruk ngak, duh bruk patagok kinh te atau nao ngak bruk di dom kongti piah duah jien sangka ka sang danaok..

Tukvak meng anak, ban raya meda patui bruk pasang iek cambaih saong peih ngak siam lagaih dom sarak di Ndang saong Karja ka bruk ngak brei ka urang bangsa, abih di nyu nan lac Sarak ka 19 di Ban Bi thu ka bruk patagok bruk ngak di bhum urang bangsa Khmer dalam jaman bruk bahrau. Gam haong nan, bhum palei brei ngak gam gam dom bruk ngak, ba tabiak jalan langyah piah patagok kinh te – xa hoi; jhul samar tukvak ngak dom danak dak di dom danak dak bruk ngak pakat negar; khik kajap rahra hu mbang tui ginup, dil samu dom sarak tui adat, tapa di nan dak harei dak paglaong raidiuk./.