Dang anak baoh sang pakat 4 gheih ghang, pang sap uranaih chreih chrai di mblang, amuk H’Pé Niê daok di Buôn Trí, xa Buôn Đôn, tinh Dak Lak oh padauk hu hatai drut druai tuk pagap haong raidiuk trei sir harei ini haong dom thun bilan mbon palei eik lipa, jalan mbak oh lagaih, raidiuk kan kandah meng yaok var huak jal war. Tui amuk, bruk salih karei harei ini oh lac sa janih hu baoh sang khang kajap atau jalan mbak hu peih praong, blaoh daok lac hu bruk daok sron mbon, je tame tuk rahra hu Ndang, Karja, karja bhum palei sangka saneng kuhria brei ka raidiuk, hu bruk ngak tani tanat. Tapa di nan, dom rahra di tapen negar yau ye amuk H’Pé Niê sahnang hatai pambuak pagam haong mbon palei, khik kajap hatai rahra di bhum taneh tapen negar.

“Urak ini mikva hu diukrai siam gheih lo. Y te, sang bac, jalan mbak… hagait jeng hu, biak bak trei, haniem phol selamat.”

Gam haong bruk patagok kinh te, tinh Dak Lak daok caik hatai sangka iek praong bruk buh jien tame ka gah pato megru, paglaong ilamo piah pakhang pakajap “hatai rahra” di bhum atah bayah, rilo meng lac di labik tapen negar. Di dom xa tapen negar di tinh Dak Lak, rilo danak dak sang bac hu ngak praong daok hu samar chip padang. Tukvak 2025-2030, Dak Lak hu Ndang, Karja buh jien tame labaih 485 ty dong piah padang ngak 5 baoh sang bac pho thong bangsa gam daok gam bac pambuak dom pakat bac.

Ong Lê Thanh Sơn, Phaok Akaok UB Bhap bini xa Buon NDon brei thau, sang bac pambuak pakat di xa hu taong abih phun jien labaih 158 ty dong, pabak hatai caong bac megru ka labaih 1.150 anek saih. Ini oh lac sa janih brei danak dak pato megru blaoh nyu daok lac sarak brei ka an ninh karo kajap hu makna suai atah.

“Danak dak program ini brei kein lagaih ka bac megru siam jang ka anek kamuan urang bangsa takik, gam haong di nan daong brei ka rahra sahnang hatai pagam haong bhum taneh, patagok ngak mbang kinh te gam haong gauk khik siam karo taneh iar di tapen negar.”

Tuk raidiuk dak harei dak hu pasiam karo, hatai je di rahra bhap bini brei ka Ndang saong Karja jeng dak siam karo jang. Di rilo mbon palei, dom ong taha, urang hu angan je hu jeng sa kapul hu makna dalam bruk pathau khan, jak ba rahra paglaong bruk caik hatai caga anak dom kadha ngak mangak ndom jhak mayai kanyah, neh rabha bruk gul pataom di taong abih bangsa dalam negar.

Tui ong Nguyễn Hoàng Giang, Yam ndok So bangsa saong Aguma tinh Dak Lak, dalam tukvak 2021-2025, hu labaih 8.000 ty dong phun jien dom danak dak jalan ngak pakat negar hu rabha ka dom bhum palei dalam tinh (dalam nan hu tinh Phu yen klak). Dalam tukvak 2026-2030, tinh patui peih ngak siam lagaih Danak dak jalan ngak pakat negar, pagam patagok haong khik ramik ilamo khik kajap bruk daok dang mbang ngui di bhap bini rahra.

“Gam tui tinh NDak Lak saong bhum taneh Tay Nguyen, bruk di bangsa saong aguma lac bruk tani tanat di politik rahra bhap bini saong jeng lac bruk daong prein ka bruk patagok karo kajap. Tuk dom sarak hu peih ngak siam gheih di bruk ngak mbang patagok kinh te, khik ramik ilamo saong khik kajap bruk daok dang mbang ngui brei ngak jeng bruk khang kajap piah bhum palei patagok kein lagaih, khik kajap tani tanat saong paglaong hatai je di rahra bhap bini tame jalan di Ndang, Karja.”

Bruk di Dak Lak brei mboh, caik hatai sangka iek glang brei ka raidiuk mikva bhap bini bangsa takik, brei bruk ngak karo kajap ka rahra lac jalan langyah piah khik kajap tani tanat chinh tri politik di labik daok. Ini jeng lac bruk hu makna piah pasiam bruk gul pataom taong abih bangsa dalam negar, padang khang kajap “bruh hatai bhap bini rahra” di labik ceik glai Tay Nguyen./.