Sang bac Tieu hoc Nguyễn Du, xa Ea Wer, tinh Dak Lak hu labaih 85% anek saih urang bangsa takik, dalam nan hu rilo adei anek urang baoh sang kan kandah. Piah khik tani tanat, sang bac brei thau tanat ka baoh sang dom adei saong srap gap jak ba anek saih nao bac.

Anai H’Thong Thíp, gru pato sang bac, khau tin, meng akaok bilan 8, langiu di pathau khan tapa mang xa hoi Zalo, Facebook, gru pato daok nao tal yaok baoh sang, rilo meng lac dom baoh sang kan kandah brei thau khau tin, piah jak ba amaik ame ba anek nao tal sang bac.

“Yaom mada hu brei lac pathau khan di angaok Zalo, Facebook, min rilo di ini lac mikva bangsa takik nan amaik ame takik sangka tal. Dom baoh sang oh thau ka khau tin angaok mang, gru pato bangsa takik di labik brei nao tal sang jak ba amaik ame buh harak gal saong khan tukvak, labik piah dom adei nao tal sang bac.” 

Thun bac jaik mai tal, Sang bac Pho thong gam daok gam bac Tieu hoc – THCS Buôn Đôn, tinh Dak Lak yam tame thun bac akaok meti tui bruk pambuak pakat, hu labaih 40 tal bac saong brei ka labaih 1.100 anek saih. Yaom lac kaya ndap nda hu buh tame ngak ginup, laneing lanoi, dom anek saih tal bac 1 tal 3 di mbon palei Drang Phôk jeng daok kan kandah tuk nao tal sang bac bahrau, kayua meng sang tal sang bac atah 15 tal 20 km. Ong Thái Văn Lộc, Akaok sang bac, ndom ka bruk daok rah tabiak, meng ndom meyai haong amaik ame, sang bac daok ba tabiak jalan kuhria daong radaih pajeng ba dom anek saih.

“Sang bac jeng hu nyaom biai haong UB Bhap bini xa dan saong pakat tinh likau daong jien piah hu radaih pajeng ba dom adei: page nao meng mbon palei Drang Phôk saong biar harei raok mai meng sang bac pho thong gam daok gam bac, piah dom adei hu bac megru, pasram di dalam labik biak salamat, praong laneing lanoi, ginup kaya saong ginup dom gah piah sangka dom adei hu siam makre jang.”

Dom kadha di dom sang bac bhum kan kandah brei mboh, kan kandah tuk nao bac oh sa janih nih ndih dalam kein lagaih kinh te blaoh daok di bruk atah labik daok, bruk thau ka khau tin saong kein lagaih daok dang di yaok baoh sang. Kayua yau nan, srap gap ka thun bac bahrau mai meng bruk thau njauk ka yaok kan kandah piah hu jalan langyah njauk lagaih.

Ong Lương Nguyễn Minh Triết, Uy vien Trung uong Ndang, Bi thu Tinh uy Dak Lak caong khin dom bhum palei khik kajap sang bac, gru pato, tapuk siphau saong dom kaya duh bruk bac megru, rilo meng lac di bhum atah bayah, bhum urang bangsa takik, bhum tapen negar.

“Khik kajap ginup kaya ndap nda, sang bac, tapuk siphau, kaya ndap nda pato megru saong dom kein lagaih njauk hu duh ka thun bac bahrau. Patui pasang duah iek glang, taong yaom lagaih asar siam brei ka bac megru saong pato megru; hu jalan langyah cambaih laih paglaong asar siam brei ka pato megru bhum mikva urang bangsa takik, bhum atah bayah, bhum tapen negar; dui katut dom bhum; patrun bruk anek saih klak bac, nao tal bruk oh hu anek saih klak bac kayua baoh sang kan kandah”.

Meng sa blah siphau, ao tarapha tal radaih pajeng ba, do, bruk daong kaya ndap nda lagaih daok daong anek saih bhum kan kandah Dak Lak hu kein lagaih nao tal sang bac. Gah likuk bruk srap gap ka sa thun bac bahrau oh lac dom baoh sang bac hu pasiam pakajap, blaoh daok lac kham merat piah oh hu anek saih halei klak bac kayua sang kathaot atau daok atah di sang bac./.