Yam tame thun bac 2026-2027, Sang bac Tieu hoc saong THCS Bình Hoàng Đông, xa tapen negar daok di Bình hòa, tinh Tay Ninh (dahlau diah lac huyen Mộc Hóa, tinh Long An), jeng daok kurang gru pato di dom mon bac.

Sang bac hu 36 urang jakar, gru pato, hu 566 anek saih di dua pakat tieu hoc saong THCS. Tui Akaok Sang bac Nguyễn Thanh Lâm, sang bac daok kurang gru pato dom Katih, Sap Engrik, pato ragam saong Pato Megru ngak manuac urang Rahra… Sang bac ndom biai patagok pakat bhum palei jak ba gru pato meng dom sang bac karei mai daong, harak pambuak bruk ka gru pato brei anak meta hu ginup gru dang tal pato bac min oh ka khik kajap tani tanat.

Bruk khik kajap gru pato dang takai di sang bac biak hu makna tuk sang bac patui peih bruk gam bac gam daok meteh harei ka anek saih dua pakat. Lac labik bhum tapen negar, hu dom baoh sang daok kan kandah, nan gam bac gam daok meteh harei daong anek saih hu kein lagaih bac megru jang saong patrun kateik geik bruk nao mai ka amaik ame. Gru Nguyễn Thanh Lâm brei thau, bruk ramik caga gru pato daong sang bac langyah dom bruk kan kandah anak meta min brei ka di suai atah brei hu jalan ngak tani tanat jang.

"Daok bruk kurang gru pato ini jeng pambuak tal bruk rabha bruk pato saong ramik tukvak pato di sang bac… Anak dom kan kandah ini ye sang bac jeng hu ndom meyai haong karja palei roh duah jak ba ieu da-a veik 2 gru pato di mon pato megru rahra saong hu mbaoh tangin hu 1 gru pato katih."

Dalam tuk nan, di Sang bac uranaih Mam non Bình Hòa, bruk njauk kuhria lac tani tanat kapul gru pato hadei pagam 3 sang bac. Sang bac tame ngak bruk meng harei 1/9, hu 31 urang jakar, gru pato, urang ngak bruk, 11 tal saong 281 uranaih bac. Anai gru Võ Sinh Kiều, Akaok Sang bac brei thau, dom gru pato, urang ngak bruk anak meta pabak hu ka tanut, min bruk ramik caga gru pato di 3 sang bac kan kandah. Sang bac daok rabha bruk pasang iek di yaok sang bac di labik karei, paglaong bruk pabak ilamo saong padang kapul gul pataom, tani tanat bruk ngak hadei pagam saong khik kajap bruk sangka, pato megru uranaih.

“Kan kandah dang nak meta ieu lac tuk pagam 3 baoh sang bac ye drei brei peih ngak, pasang iek anek menuac jakar ngak bruk di dom sang bac. Dom sang bac atah gauk meng 8 tal 10 km nan bruk nao mai, pambuak jeng gaok kan kandah. Daok dom gru pato, urang ngak bruk ye kham merat ramik caga sang bac khik kajap tui tanut.”

Bruk kurang gru pato daok lac sa dalam dom kan kandah di dom sang bac dalam xa Bình Hòa, tinh tay Ninh. Piah khik kajap bruk pato saong bac dalam thun bac 2026-2027, bhum palei daok peih ngak dom jalan langyah anak meta yau harak pambuak bruk ka gru pato, da-a gru pato di dom sang bac jaik taphia atau gru pato padeih tuk bih ngak bruk hu mbaok tame pato.

Tinh Tay Ninh hu sarak daong brei ka gru pato hu palih ruah ka bruk di bhum tapen negar, hu daong 100 trieu dong/urang saong pagun sanya tukvak duh bruk 6 thun. Mintapi lac, tui ong Đăng, sarak ini jeng oh ka hu ginup prein dui pachreih gru pato sit umo mai ngak bruk di dom labik atah, kein lagaih daok kan kandah. Ong Đăng brei thau:

“Daok jalan langyah anak meta, dom sang bac hu pathau khan hatai caong saong Jabat Ilamo – Rahra nyaom biai UB Bhap bini xa ka dom harak pambuak bruk saong gru pato di dom labik jaik taphia, jeng yau dom gru pato padeih hưu piah mai pato. Tapa nan khik kajap hu ginup gru pato, pabak bruk pato saong bac dalam thun bac 2026-2027.”

UB Bhap bini tinh Tay Ninh hu ba tabiak Sarak karja brei pandar pasang iek hatai caong, brei caik dahlau bhum kan kandah, tapen negar; pabak gru pato chuyen mon, pakat bac daok kurang, peih ngak palih ruah, da-a mai pato, pato rilo sang bac. Tinh jeng brei caik dahlau prein pasiam sang bac, kaya saong ha tang taka so./.