Hadiuk pasang sa-ai Dương Phước Thi daok di Bình Thạnh B, phường Long Bình hu 3 urang anek, oh hu taneh piah pala drak, oh hu bruk ngak mbang karo kayua yau nan ye rai diuk di gait gaok biak rilo kan kandah. Atah di ini dom thun, sa-ai gilac njauk bala angaok jalan mbak kayua yau nan ye pren yava oh daok khang yau dahlau ngak ka rai diuk di baoh sang saai hu ralo kan kandah njauk kan kandah jang. Kayua yau nan ye, tuk hu alin hadiah brei baoh sang Prong gul pataom salih ka baoh sang klak jaleih tambleng meng rilo thun ini mai, hadiuk pasang sa-ai biak drut druai. Sa-ai Dương Phước Thi khan lac:

 "Sang dahlak meng krem meng hala la-a, tal hajan mai nyu nerah blaoh dom cei meng brei tol mai tak. Dahlak mboh biak bui sambai saong biak thau dhal phuan tal Ndang, Karja hu brei ka dahlak hu baoh sang yau harei ini. Baoh sang dahlak oh daok huac kanda ka hajan angin, aia nrah, hadiuk pasang dahlak jeng hu labik mbang, labik daok tani tanat, oh daok nao daok kandaok di sang urang, oh daok huac angin hajan tra. Meng nan adei kham merat ngak mbang piah hu jien mek tame cak rok patagok."

Barau Meng blaoh di phuong Long Bình, Uy mban Mat tran Negar Viet Nam ban Can Tho hu pok jao 200 baoh sang Prong gul paataom saong alin hadiah 4.000 pok hadiah alin brei ka dom baoh sang hu rai diuk kan kandah meng phun jien daong di Mban lambaok Phat giao Hoa Hao ban Can Tho. Ong Nguyễn Trung Chánh – Phaok mbi thu Ndang uy phuong Long Bình drut druai ndom lac, dom baoh sang hu jao brei nan lac dom baoh tabung bak hatai ranam, nan lac labik pambak di rilo baoh sang piah peih ngak hatai caong khin hu sang daok tani tanat, piah padang ngak mbang angui.

 “Phuong Long Bình daok jaik 100 baoh sang kathaot saong 295 baoh sang jaik kathaot. Kayua yau nan ye, khaol dahlak jeng biak caong khin hu daong ba di urang pal akaok ban raya, dom urang pablei salih, dom urang ngak pahla piah dak harei dak hu rilo danak dak, bruk ngak hu mboh di meta piah ka bhap bani hu rai diuk kan kandah mbang tui."

Dalam dom thun tapa, Uy mban Mat tran Negar Viet Nam ban Can Tho tuk halei jeng patagok bruk ngak di drei nan lac pasak pataom, patagok pren khang gul pataom taong abih bangsa; kham merat jak ba dom kapul nyaom, urang pablei salih, urang ngak pahla dhar phol saong dom kapul nyaom agama sa tangin rik daong haong gauk piah peih ngak bruk daong ba rah ra, sangka iek glang tal rai diuk di bhap bani, abih di nyu lac dom baoh sang kathaot, baoh sang jaik kathaot, baoh sang hu rai diuk kan kandah. Dalam 6 bilan akaok thun ini, Mban Jak ba Kadung jien “Brei ka urang kathaot” dom pakat di ban hu pataom tame bruk peih ngak bahrau saong pasiam jaik 840 baoh sang Prong gul pataom brei ka baoh sang kathaot, baoh sang jaik kathaot, baoh sang hu rai diuk kan kandah, ngan haong yaom jien jaik 49 ty ndong. Ong Trần Văn Chính – Phaok akaok Bhian iek Uy mban Mat tran Negar Viet Nam ban Can Tho.

 “Ban Can Tho jeng brei thau lac bruk sangka iek glang tal baoh sang kathaot, baoh sang jaik kathaot, baoh sang hu rai diuk daok kan kandah, grap tanat bruk mbang angui ka rah ra nan ieu lac sa bruk ngak chinh tri bhian ngak, bruk ngak asal. Dom jabat di ban hu pataom tame peih ngak biak khang, jak ba taong abih pren khang di rah ra piah peih ngak mek hu rilo baoh jeng siam mekre piah sangka iek glang ka bhap bani rah ra hu rai diuk siam makre jang.”

Meng dom baoh sang taik tahak tal dom baoh sang khang karo kajap tani tanat, nan lac vaktu masa di sa bruk klah rabha saong abih hatung hatai haong bhap bani. Dom baoh sang prong gul pataom oh lac daong ka bhap bani kathaot trun meneng kan kandah blaoh daok pabak jang hatai jia, pren khang piah ka dom baoh sang grap tanat dalam bruk ngak mbang. Dom bruk ngak biak hu makna nan patui hu bruk brei mboh ilamu meng kan nan lac "hala madom maom hala tahak taik", hatai gul pataom di bangsa saong kham merat di ban Can Tho dalam bruk peih ngak jalan ngak sangka iek glang tal rah ra, piah oh hu sa urang bol halei njauk klak gah likuk di jalan cak rok patagok nagar palei./.