Sap yava bahrau meng blaoh di sa vaktu bac papaoh akhar sap Cam di anek saih tal bac 2, Sang bac Tieu hoc Phan Hiệp, xa Bắc Bình, tinh Lam Dong, kayua gru Lư Đồng Triển dang pato.

Gru Lư Đồng Triển, urang labaih 20 thun pato pasram magru sap Cam ka dom adei anek saih, tal ini gru jeng hu gah pato megru ba mai pato di rilo sang bac karei di gauk, mada lac di halei gru Triển jeng ngak siam bruk pato magru di drei.

 Tui Gru Triển, tui jalan pato ka dom adei thau puac, thau cih wak akhar huroh bangsa, yaok tukvak bac gru pato jeng khik kajap pato 4 ilamo bac magru: pang, ndom, puac, vak ka dom adei. Bruk pato sap Cam oh lac daong ka bruk bac sap Viet bo cagar veik daok daong anek saih mboh hadah mbaok meta saong thau tanat jang dalam bruk khik ramik ilamo bangsa drei:

“Baoh sang dom adei takik sangka tal, rilo meng lac bac di tal bac, nan dom adei pabak ilamo jeng suai.”

Thun bac 2025-2026, Sang bac Tieu hoc Phan Hiệp hu labaih 500 urang anek saih, hu 20 tal bac, rilo meng lac anek kamuan bangsa Cam. Sang bac patui bruk khik tani tanat bruk pato saong bac sap Cam ka dom adei hu 2 tukvak bac dalam sa adit, pabak hatai caong sap bangsa. Langiu gru Triển, daok hu 3 gru pato karei ba drei tame pato sap Cam.

Di Sang bac Tieu hoc Phan Hiệp, xa Bắc Bình, tinh Lam Dong bruk pato sap Cam jeng sa bruk ngak dalam bhap bini di rilo thun blaoh tapa. Dom rairah gru pato patui bruk di gauk, kham merat khik ramik saong pato sap ndom, akhar vak di bangsa ka anek saih.

Nai gru Văn Thị Kim Nương, Phaok akaok Sang bac Tieu hoc Phan Hiệp brei thau, langiu tukvak bac di angaok tal bac, sang bac daok peih ka anek saih ba drei tame tapak, tame mbang kacah vak akhar huroh Cam yau harei hate…Langiu di nan, dalam yaok tukvak bac, dom gru pato daok caik labaih 5 minit puac tukvak bac piah adaoh dom kadha ranaih adaoh, hari Ariya piah ka adei thau bruk gheih di ilamo Cam. Nai gru Kim Nương brei thau veik:

“Dom gru pato hu mbaok tame pato sap Cam hu daong veik 0,3 jien bilan, kuhria hu labaih 4-5 rituh ribau sa bilan.”

Sap Cam daok dalam kapul sap Malay – Nam Dao. Di Lan Dong, sap Cam biak jaik taphia saong sap di urang Jrai, Randaiy, Cru saong Raglai.

Langiu Sang bac Tieu hoc Phan Hiệp, xa Bắc Bình, urak ini dom sang bac tieu hoc dalam bhum hu rilo urang bangsa Cam di tinh Lam Dong jeng khik tani tanat bruk pato sap Cam.

Po Gru Huỳnh Cứng, Phaok Akaok Kapul Halau Janeng Ahier tinh Lam Dong brei thau, langiu bruk khik ramik saong patagok ilamo siam gheih di urang Cam, bo daok daong ka dom anek kamuan, paglaong ilamo sap bahsa, hu ilamo lagaih jang dalam bruk bac sap Viet:

“Hu bruk sangka di Ndang saong Karja ba akhar huroh Cam tame sang bac, tal tuk ini dahlak hulin mboh jalan ngak ini biak njauk saong dahlak hulin jeng biak mboh chreih chrai. Bruk ba akhar huroh cam tame sang bac piah ka rairah hadei patui veik, meng nan khik ramik ilamo siam gheih bhap bini bangsa Cam.”

Biak nao, bruk pato sap bahsa Cam jeng daok rilo kan kandah, min ngan haong hatai caong pambak tabiak piah khik ramik ilamo bangsa Cam anak bruk gaok kurang, dom rairah gru pato patui bruk di gauk, jeng kham merat khik ramik saong pato sap bahsa bangsa drei ka dom rairah anek saih bangsa Cam./.