Tuk 19 Balai Y te phuong Tam Bình (meng dahlau diah daok dalam TP.Thủ Đức) jeng daok hadah manyek. Anak blah man hinh compute, cu nhan y te bhap bani Lý Hồng Phúc, urang jakar khoa Pacang caga ruak, jeng daok ngak bruk pabak yaok baoh harak gar pasang iek pren yava tagok angaok danak majam. Dalam harei, sa-ai gam haong dom ayut sahabat nao pasang iek jit ruak, duah thau ka sruh jit, pametai anek lang quang saong peih ngak dom bruk ngak y te pacang caga. Tal puac tuk biar harei, tuk ngak salah blaoh bruk ngak di drei, sa-ai Phúc gilac mek tangin tame bruk ngak karei: pabak harak gar pren yava ka bhap babi. Sa-ai Phúc klah rabha:

“Langiu di bruk ngak bhian harei yau ye nao pametai anek lang quang, pambuak bruk haong khu pho dalam bruk pacang caga jit, khaol dahlak akau daok njauk pataom harak gar gah jit ruak, pabak tagok danak bruk tui njauk adat hukum. Dom bruk ngak rah tabiak gam gam. Majam bruk biak glaih glar rilo, daok ni mai tok hu yaok sa ka payeng miat oh pabak tame hu”.

Dom bruk ngak daok rah tabiak di rilo balai y te dalam ban raya HCM tabung glaong dalam 150 harei melam pasang iek pren yava ka taong abih bhap bani thun 2026. Langiu di bruk pasang iek ruak biak harei, dom jabat daok peih ngak bruk pasang iek pren yava ka anek saih, pasang iek ruak piah hu tal labik dhua mikwa saong pasang iek pren yava ka taong abih bhap bani, ngak ka bruk ngak patagok biak rilo.

Tui BS.CKII Nguyễn Đức Lập, Akaok Balai Y te phuong Tam Bình, hu dom harei jabat ini taduan raok jaik 1.000 mbang urang mai pasang iek. Hadei di yaok mbang pasang iek ruak, dom harak gar njauk pabak brei tagok danak bruk khik iek pren yava ndien tu biak prong, gaok harei mai ngak gam tuk melam piah ka nyu samu tukvak ba tabiak. Yaom lac nan, dom balai y te jeng njauk grap tanat bruk pasang iek ruak yaok harei. Gru jru Lập brei thau: 

“Dalam mbang tabung glaong di ini, khaol dahlak akau jak ba urang jakar, urang ngak takik jang bruk padeih piah pataom tame bruk pasang iek pren yava  ka bhap bani. Hadei di tuk ngak bruk, rilo adei sa-ai daok mai balai y te atau ba harak gar nao sang pabak tagok danak bruk piah ka nyu njauk haong tukvak masa ba tabiak”.

Piah jhul samar tukvak masa ba tabiak brei ka mbang ngak di tabung glaong brei ka bruk pasang iek pren yava ka taong abih rahra bhap bani, rilo puk palei oh lac sa janih cang mikva mai tal balai y te blaoh daok peih bruk nao trun tal labik daok, sang bac, pasak padhih piah pasang iek ruak..., gam haong di nan jak ba jang urang jakar daong piah patui ngak bruk pasang iek ruak bhian harei.

Tui PGS.TS.BS Tăng Chí Thượng, Akaok So Y te TP.HCM, yaok mbang pasang iek ruak ye jeng pabak tame harak gar pren yava ndien tu, daong tui iek pren yava tui rai manuac, khik iek ruak man tinh dui atah saong daong ka gru jru dalam bruk duah thau ka janih ruak, piah taong mek ruak. Gah y te jeng daok jhul khang bruk pandar ilamu laik taka sốk, tui iek tukvak pasang iek ruak tui vaktu biak tal yaok puk palei saong patui veik pambuak pagam harak gar pren yava ndien tu ngan haong harak gar taong mek ruak, tui kuhria njauk ngak salah blaoh dalam puac thun ini:

“Kham merat saong ba abih pren yava dalam tukvak masa tapa di gah y te padang ngak hu harak gar pren yava ndien tu brei ka bhap bani. Taong aboh dom balai y te hu pathram saong pandar ilamu laik taka tame bruk khik iek pren yava bo so y te ba tabiak. Yau nan ye harak gar meda panduan salih tapa harak gar pren yava di bhap bani”.

Hadei di 2 bilan peih ngak danak dak pasang iek pren yava brei ka taong abih bhap bani, TP.HCM hu labaih 1 trieu manuac urang hu mai pasang iek pren yava saong peih ngak harak gar pren yava meng jammriak ndien tu. Oh lac sa janih daong brei drah samar duah mboh ruak kik, danak dak daok brei dak padang bruk khik iek pren yava gam gam brei ka bhap bani, yam tal bruk ngak iek glang pren yava meng di gah ala./.