Di Pasak Ngak bruk rahra – Kadung jien Daong uranaih Binh Duong (phuong Thuận An, Ban raya HCM – dahlau diah lac Ban Thuận An, tinh Binh Duong), 71 urang metui mejua, jaoh jo, ruak gila hu mbaok meng aval piah taduan harak brei angan saong kat can cuoc rahra.

Pan di tangin kat can cuoc bahrau, ong Nguyễn Hữu Lộc drut druai brei thau, hadei di paklaoh talak diuk, ong cakak harak ho khau mai pagam di sang urang randap. Tal tuk urang nan pablei sang, ong laik tame bruk oh hu labik tut angan labik daok. Harak chung minh nhan dan klak oh daok pandar hu min oh meda hu ngak gilac, ngak ka ong daok dalam bruk “oh hu harak gal ka rup drei” luac 20 thun tapa. Urak ini, tuk karja hu harak gal njauk hukum, ong bui biak sambai.

"Hu labik drei likau ngak min urang oh pah, hu harak gal brei ka rup drei urang meng pah. Urak ini drei mboh bui sambai lo. Thau dhar phol cei anai gru dalam pasak hu daong.”

Gah likuk bruk bui sambai nan di dom urang metui mejua tuk taduan mek hu kat can cuoc ieu lac sa bruk ngak gandi gandang kham merat taoh talaih kan kandah di karja palei saong jabat pan bruk pasang iek.

Ong Bùi Văn Thuyết, Yam ndok Pasak Ngak bruk rahra – Kadung jien Daong uranaih Binh Duong brei thau, luac labaih 10 thun tapa, yaom lac hu rilo mbang pambuak haong dom jabat kajar chuc nang, min dahlau diah bruk salah blaoh harak gal jaik yau laik tame kan kandah kayua tavak ka harak gal. Bruk lagaih tok hu mai meng dom adat hukum hu taoh talaih saong lagaih jang. Pasak hu srap gap pambuak haong Kong an Ban raya HCM, gam haong Kong an phuong Thới Hòa dan saong Kong an phuong Thuận An samar chip padang harak gal, pasang duah saong ngak tantu urang gauk gan dalam sang.

Bruk ba abih hatai tame bruk ngak biak khang catang, kapul kong an dua bhum palei hu ba mai dom “baoh yamein” akaok meti: 35 bruk di labik Thới Hòa, Ban raya HCM saong 71 urang di labik Thuận An hu kat can cuoc rahra. Ndom ka jalan meng anak, ong Bùi Văn Thuyết ndom lac:

 "Urak ini Pasak karja jeng daok dom urang bahrau hu taduan, daok dalam luac jalan ngak tantu khau tin piah pabak can cuoc rahra. Hadei di tuk Pasak ngak tantu khau tin blaoh ye brei pambuak haong Kong an dua bhum palei di Thuận An saong Thới Hòa ngak bruk pabak harak can cuoc rahra ka dom urang.”

Taong yaom ka dom bruk bahrau hu lagaih di sarak karja, Trung ta Nguyễn Văn Hùng –Phaok Akaok Kong an phuong Thuận An ndom mayai lac, bruk salih dalam adat pabak harak gal lac “anek kiar” daong bhum palei samar drah talaih kan tavak:

 "Bruk pabak can cuoc urak ini “lagaih” jang dut saong dahlau. Gam saong dom urang karei oh hu kein lagaih brei ka bruk tut angan labik daok, oh hu kein lagaih tut angan labik daok anak meta ye jeng hu brei pabak angan jie rahra saong jeng hu pabak harak can cuoc rahra. Ini lac sa bruk bahrau di Karja dalam bruk pasang iek menuac urang dalam kein lagaih urak ini.”

Anak mata hu biak nao, bruk ngak brei ka gauk gan dalam sang ka dom urang karei crih ini lac sa “kadha tah katih” biak kan ngan haong kapul canh sat di labik. Rilo meng lac dom urang khan lac hu daok di rilo labik, khau tin oh ginup, lahik glo akaok kanal hadar atau oh hu du lieu khik piah.

Bruk pabak can cuoc ka dom urang metui mejua oh lac brei mboh bruk hu makna dalam bruk pasang iek rahra tui jalan “oh luai ka thei daok gilac gah likuk”, blaoh daok brei mboh bruk pambuak bruk abih hatai tian di kapul Kong an, Pasak Ngak bruk rahra saong gah Y te Ban raya HCM./.