Akaok Mban Tacei ba jalan pacang caga bol lin Pakat negar payua Sarak tal dom tinh, ban meng Da Nang, Quảng Ngãi, Gia Lai, Đắk Lắk, Khánh Hòa saong dom metri pambuak dom jalan  pacang caga ribuk ka 13. Tui Pasak Kuhria mboh dahlau pakat negar, ribuk ka 13 samar, khang catang tuh tame baoh taneh. Yau nan ye gah Pei dom tinh Quảng Ngãi, Gia Lai, Đắk Lắk (di bhum Tây Nguyên klak) pataom tame dom jalan pacang caga ribuk, khik tani tanat ka bhap bini saong ha tang, oh caik ka bala rah tabiak bo oh thau. 

Dalam dom harei akaok bilan 11 ini, rilo palei di Bhum taneran kraong Cuu Long daok dauk dalam ia kayua ia ndik gam hajan ribuk. Piah takik khat lahik, karja dom bhum palei brei caga jalan pacang caga ia ribuk dauk dalam, njauk ndem tal lac di dom labik di pasak di Ban Can Tho, tinh Vinh Long saong labik bhum kreh kraong Tien saong kraong Hau di tinh Dong Thap. Tui nan, pachreih bhap bini bhian tabiak hamu piah sumu dom bruk pacang mbuan glut jaleih, talah ar pacang ribaong kraong hu siam lagaih.

Harei ini 6/11, ia ndik tagok di TPHCM glong abih tal tanut pakat III. Di Balai pabah kraong Phú An, bala Nhà Bè ia ndik meng 1,77-1,80 m. Balai pabah kraong Thủ Dầu Một ia glong meng 1,88-1,90m. Hadei tuk tagok glong, ia trun suai dalam harei 8.11. Ia tagok saong dang glong tal harei 11/11. Ini lac mbang ia tagok glong abih dalam thun, yau nan ye brei kuhria caik hatai tuk langik hajan praong gam ia ndik ngak dauk dom labik biar dhaong, tapen kraong ba tal radiuk bhap bini gaok kan kandah.

UBND Ban Cần Thơ peih ngak danak dak khik brei tani tanat darak pasar dom janih pandap pandar yaok harei, jhul pakhang bruk pablei salih, Tet Nguyen dan 2026. Dom kapol nyaom hu mbaok tame danak dak kaya mbang dalam nan hu brah, mì, dom jnaih baoh manuk ada, ikan, njam patam,  baoh kayau; dom kaya mbang Tet; ia yamen, mbia, ahar keo…; dom janih sam se ngak huak…Kuhria abih tih tui jien labaih 4.108 ti dong.

Kapol ngak pahala Huệ Giác (Ban raya Hồ Chí Minh) pambuak haong UB MTTQ Viet Nam xã Tri Tôn, tinh An Giang birau alin pandap ka urang sang kathaot, jaik kathaot, baoh sang dalam sarak karja di xa. Hu jaik 1.000 paok pandap hu alin brei bhap bini, yaok paok yaom 400.000 dong. Kuhria abih tui jien jaik 400 trieu dong. Di var alin kaya kan, urang jakar bhum palei ini payua panuac dhar phol ralo tal kapol urang ngak pahala Huệ Giác saong dom urang daong brei piah ka mikva pak ini hu tani tanat raidiuk, siam mekre yam tapa kan kandah…

Dom urang metai kayua ribuk Kalmaegi di Phiippin tagok 114 urang saong 127 urang karei lahik hadei ribuk ia sua ngak tayak tayaic dom labik di bhum Kreh negar ini. Di tinh Cebu, labik gaok kan kandah ralo abih, yaok ribau baoh sang daok dalam gluh baok, radaih tableik cuah trun saong jalan mbak ah-mah. Karja pak ini daok ba jalan brei ramik dom pambuk patau kayau jaleih, duah daong manuac gaok bala saong daong bruk ngak pahala. Ini lac ribuk ka 20 tuh tame taneh ia ini dalam thun ini.

Mentri Jalan mbak pajeng ba di Mỹ khan brei thau  cakak trun 10%  dom mbang par  di 40 mblang kapal haok  praong dalam negar ini kuhria meng tuk Quoc hoi oh brei tapa dom sarak hukum jien padai lien bang thun 2026. Bruk ba tabiak nan brei cakak trun mbang ahaok par lac sa dalam dom bruk birau abih kayua rajaei My kareik pambang  tui nan brei mboh patagok rilo kan kandah di dua đảng Quoc hoi My. Kuhria tal tuk ini, rajaei Mỹ kareik pambang 37 harei, lac mbang kareik pambang suai lavik abih meng lavik mai dalam sajarah dakrai “ Palei hala dok bingu”, ngak cuang kandah tal rilo bruk karei.

Australia ba tabiak adat hukum taong bhat birau dom kol duis pachreih tui danak daka vu khi pametai palai pajua di Triều Tiên. Australia mboh lac, pakauk dom urang nao mai kayua pambuak tal dom bruk yau co klaik jien dien tu saong pandar jien nan blei dom mac jamraih bol lin atau dom ndap nda ngak đạn siu yau đồng. Panuac khan nan brei mboh bruk haduh hatai di Australia ka dom bruk ngak suan pandar kong nghe khaw tin saong urang pandauk mbaok  bo taneh ia ini lac Trieu Tien pandar ngak./.