Ka oh tame tal baoh sang di sa-ai Mã Châu Xa daok di palei Yang Mau, Yuan iew lac palei Lâm Giang, xa Ham Thuan Bac, tinh Lam Dong, meng akaok jalan khaol dahlak mahit meng atah hu ragam sap ginang gam saong sap yava dhil dhang, ngak ka hatung hatian mboh bui sambai chreih chai, yau hu daok dalam ar thak di harei roya.

Di Anak mblang sang sa-ai, dom anek saih mai megru hu dom anek, kamuan dalam palei daok pathram taong ginang. Langiu di nan lac sa urang likei umo labaih 50 thun, thaik thaok yau urang ban liua, min tuk khan brei thau ka alat ragam meng kan di bangsa Cam gilac meng hatai takre, pachreih brei urang tui pang.

Sa-ai Mã Châu Xa brei thau, gam tui dom alat ragam urang bangsa Cam, thau ma-in thau taong tahau pah ieu lac kan paje, daok thau ngak tabiak nyu mboh daok kan ralo jang. Caong khin urang ngak njauk thau cambaih laih yaok sap yava, yaok ragam taong; yaok janih alat ragam ka labik ma-in, tukvak pandar. Yaok baoh ginang, paraneng njauk luac sa bilan meng blaoh. Ta-eng kadait saranai ye ngak samar jang, dalam sa adit. Jeng mai meng nan, takik urang nao tui megru bruk ngak tabik alat ragam ini.

Urak ini, ong Mã Châu Xa hu pato tacei ka rilo dam dara dalam palei thau ma-in cambaih laih takik sa janih alat ragam meng kan di urang Cam.

Daok ong Đào Tấn daok di palei Ia Mamih, Yuan iew lac palei Bình Minh, xa Bac Binh, tinh Lam Dong, langiu di bruk ngak tabiak dom janih alat ragam, oh jeng ba abih pren yava piah pato tacei ilamu pah Baraneng, yuk saranai ka rilo rai rah anek taco dam dara dalam palei.

Oh sa janih “pal tangin tacei bruk” ong Tấn daok teik tuak taong inum baraih karei ka drei dom sap yava meng ragam paranưng tui yaok kadha meng kan caik veik hu vaik angaok kanduh mbao xi-măng. Tui di nan, anek saih kuan paranưng pah tui dom inem sap yava, meng ragam “Thon-la” chreih chai bui sambai tal ragam “Pang–ki-na” bak asal kadha yaok Yang. Dom asaih hadah krah ye hadei di klau bilan meda pah hu dom kadha mbuan mbiah. Caong khin ka hei jang, njauk tui nyu luac rai.

Ong Đào Tấn brei panuac klah rabha , alat ragam meng kan hu brei mboh hatai sahneng, hatai jia di bhap bani Cam, yau nan min rai rah dam dara urak ini takik thei daok “mbak carak” saong giang caing ragam ragu meng kan di ong amek caik veik. Meyah oh hu urang patui megru, ye bruk pandar dom janih alat ragam Cam meda dak harei dak takik nao saong lavik nao nyu meda oh daok mboh tra di palei urang bangsa Cam ini.

Klau baoh paranưng, ghinang saong kadait saranai oh neh tabiak hu dalam dom harei roya. Yaok baoh ginang, kadait hu pagap yau dom binah “suan yava” di anek manuac. Kadait saranai pagap baoh akaok di anek manuac saong 7 gilaong samu haong dua asak meta, dua gilaong tangi, dua gilaong idung saong cambuai; paranưng pagap yau rup anek manuac, 12 mbaik taik pagap ka 12 drei methak; dua baoh ginang pagap ka dua gah takai, 2 mbaik gei taong ghinang pagap yau dua gah tangin, taik ginang hu 16 talei di dua akaok pagap yau 32 baoh tagei.

Ragu ragam bhap bani urang bangsa Cam oh ka hu tapuk cih vak gilac ka nyu siam mekre, yau nan ye dom urang yau Mã Châu Xa, Đào Tấn pato tacei ka dom anek, kamuan dalam palei pathram tui dom ragam ginang meng kan caik veik dalam piah pandar dalam bruk ngak adat cambat tanarakun di puk palei.

Dalam ilamo meng kan di bhap bani urang bangsa Cam, paranưng, saranai saong ginang oh kurrang hu. Abih di nyu lac sapp yava din dang di dom janih alat ragam ini hu jeng “alat ragam yang ganreih” dalam hatai saneng, hatai jia di bhap bani urang bangsa Cam, dalam đom manyai harei roya, atau uan raok akaok thun bahrau...

Tui So Ilamo – Padhih saong rivang ma-in tinh Lam Dong, anak bruk alat ragam meng kan di urang urang bangsa Cam mbuan si lahik nao, gah ilamo daok peih ngak dom bruk ngak parang ma-in dom janih alat ragam meng kan di Pasak Parang iek ilamo Cam, Inem mek bimon Pa Sah Ine dalam dom harei necar yaok adit saong dom harei rroya dalam thun piah duh ka bhap bani puk palei saong tuai damuai urang mai rivang jirah iek. 

 Urak ini, So Ilamo – Padhih saong Rivang ma-in tinh Lam Ndong jeng daok padang ngak Danak bruk pato tacei alat ragam meng kan di urang Cam di pak 9 xa hu rilo bhap bani urang bangsa Cam.  

Amuk Lư Thái Tuyên, Phaok akaok Muyim tinh Lam Dong brei thau, tapa bruk parang ma-in alat ragam meng kan di Pasak parang iek ilamo Cam saong Inem mek bimon Pa Sah Ine hu mboh tuai damuai saong bhap bani jeng njauk hatai saong gah ilamo jeng daok kuhria dahlau meda daa dom urang gheih tangin mai ini dang ngak tabiak dom janih alat ragam di dua labik hu khan di angaok.

Gam tui ilamu daok pal daok khik, dom urang gheih tangin yau ye ong Mã Châu Xa, ong Đào Tấn… daok ba abih pren yava piah rik daong, saneng duah saong pato tacei ka rai rah dam dara piah pambak prong hatai takre ragu ragam urang bangsa Cam. Gait nan lac dom urang daok khik apui ka dom bruk ngak ilamo, khik ramik asal ilamo di bangsa drei./.