Yaom lac hu danao ia praong Trị An, Labik khik Alam langik – Ilamo Dong Nai, Bein pakat negar Cát Tiên, 121 inem mek sarjarah gam haong ilamo gheih karei di 41 bangsa adei sa-ai, jirah rivang Dong Nai dui pachreih labaih 5 trieu mbang tuai damuai min jien tame daok biak takik. Kuhria rah tapa tuai damuai tok daok pandaok labaih 1 harei haong tanut pandar kuhria rah tapa tok labaih 800.000 ndong.

Anak mata, tuk mblang kapal ahaok Long Thành raok 25 trieu mbang tuai/thun, meyah tuai damuai bahrau yam trun di ahaok lac aval drah nao tal Ban raya HCM atau Lam Dong… Dong Nai lac lahik sa kein lagaih ka kinh te biak praong. Amuk Nguyễn Hương Giang, Yam ndok dui ba Mang luoi Rồng Xanh Dalam dunya ndom lac, Dong Nai njauk brei pandar kein lagaih lac ban raya praong ngak kong piah pataom tame dahlau abih ka tuai damuai ngak mbang pablei salih:

"Sa janih blaoh Dong Nai njauk peih ngak lac pataom tame urang tuai damuai ngak mbang pablei salih (atau daok hu ieu lac Mice). Ini lac kein lagaih di bhum raya. Khol dahlak njauk ngak dom bruk ba drei tame, kaya ndap nda njauk lagaih, dui pachreih tuai damuai ini piah nao tal Dong Nai ngak mbang saong brei rilo tukvak jang ka bhum palei salih ka blaoh bruk nao Sai Gon atau par nao negar.”

Di gah ngak kong, ong Nguyễn Huy, urang ilamo gah AI ndom lac, Dong Nai hu rilo inem mek pakat negar karei crih gam haong dom asal kadha ilamo karei, meda ngak jeng prein pambak tabiak labik saong dunya. Khin yau nan, bhum palei brei jhul khang bruk salih taka so, ngak taka so dom du lieu piah ba tabiak dom nen tang.

"Ba drap ar, kaya kan, asal kadha tagok labik taka so daok hu ngak tabiak, meng nan gam jhul tagok haong ilamu bangsa truyen thong, mang xa hoi piah jhul nyu tabiak praong jang, pambuak pagam haong truyen thong, mang xa hoi saong dom bruk yaih khan pakat negar. Tuk tuai damuai duah thau ka Viet Nam, dom urang nan mboh sa Dong Nai. Dalam Dong Nai hu ginup dom asal kadha ye yau sa mang xa hoi sit ba urang nao tal bhum palei”.

Piah ba jirah rivang jeng mbaik gang khang kajap ka bruk ngak mbang blei saih saong patagok ngak kong gah ilamo, Dong Nai pataom tame ngak 4 kadha: Jhul khang salih taka so taong abih piah padang labik mai tal hadah krah; Pandar AI, yau biak saong kopi taka so piah ngak taka so lagaih dom drap ar ilamo; Pataom tame pato pakai, paglaong ilamo urang ngak bruk jirah rivang ka sa khối pasang iek gam haong gah ngak mbang pablei salih; padang saong brei mboh angan je labik rivang me-in Dong Nai praong dalam di darak pasar dalam negar saong dunya. Ong Nguyễn Khắc Vĩnh, Phaok Yam ndok So Ilamo, Pahat Padhih saong Jirah Rivang ban raya Dong Nai brei thau:

"Tukvak meng anak daok tal, khol dahlak hulin brei ngak cambaih saong ngak taka so taong abih baoh kadha inem mek, drap ar ilamo, salah blaoh harak labik jirah rivang hadah krah piah tuai damuai mbuan tame duah. Gam haong di nan, salih khang meng bruk yaih khan yua meng dahlau tapa yaih khan taka so pa-ait tame langyah du lieu tuai damuai. Ba thaik thaot, kaya kan ilamo, jirah rivang Dong Nai tagok dom tali taka so. Pamaong tal jalan kuhria ba jirah rivang Dong Nai tabiak atah, ba kinh te Dong Nai patagok samar.”

Bruk srap gap salih drei meng jalan sahaneng tal bruk ngak, meng ha tang tal ilamo ngak kong daok hu maong yau lac “anek kiar” daong ka ban raya Dong Nai khang hatai peih tabiak bambang Long Thanh, ngak lagaih caong takre khik takai yaok trieu tuai damuai yaok thun.