Daok jaik 1 bilan tra, Raya Óoc Om Bóc – pakacah Gaiy Ngo Ban raya Can Tho thun 2026 hu peih ngak, di dom baoh sang baha Khmer, bruk srap gap ka bilan pakacah gaiy Ngo daok hu dom kapul kacah samar drah srap gap. Dom baoh gaiy Ngo bahrau hu ngak salah blaoh, hu dom thaik cih, bingula biak gheih, ndung bak ilamo urang bangsa Khmer. Ngan haong dom sang baha oh ka padang gaiy bahrau, bruk pasiam gaiy klak jeng hu brei ngak samar chip.

Tui mikva urang bangsa Khmer, baoh gaiy Ngo hu maong yau sa yang sanak ginreih, pandar dalam raya adat saong hu paling yang praong prang dahlau tuk trun ia. Yaok baoh baha bhian hu ruah sa anek athur ngak lambaok vakil, hadei di nan ba thaik binguk rup nan tagok gaiy Ngo yau ye “yang gaiy”. Bruk palih ruah athur ginreih gaok mai daok pagam haong angan sang baha atau labik hu angan dalam sap Khmer. Athur ginreih meda hu kav ine girai, yang ciim Krud, yang ula Naga, lamein, rimaong… Yaok drei anek athur hu ba tui thaik thaot saong makna karei, brei mboh hatai caong khin ka prein khang, bruk pacang khik thraong daong, patuah jamo saong jai yak.

Di sang baha Phú Giao, athur ginreih di gaiy Ngo lac ine girai hijao. Ine Girai hu brei mboh cambaih di rup gaiy, mboh mekre mboh khang kadang gam ginreih yaok baoh gaiy trun ia. Sang baha urak ini hu 4 gaiy Ngo, dalam nan 1 baoh gaiy daok brei pasiam, 3 baoh gaiy daok veik lac meda hu mbaok tame pakacah. Langiu di anek athur, ngak gheih mata gaiy Ngo jeng ba tui makna je tame yang karei crih. Meyah dahlau diah ngak gheih gaiy Ngo srap gap ka raya adat, mata brei cih biak tani tanat, dreih yau mata ine girai, piah gaiy meda maong mboh jalan nao, plaih ba kan kandah saong ba mai salamat. “Ini lac binah hu makna abih di bruk ngak gheih ka baoh gaiy Ngo. Yaok binah jeng hu ngak biak tani tanat oh sa janih lac caong khin ka bruk ngak gheih, blaoh daok brei mboh bruk iek praong, hatai je saong caong khin di mikva bhap bini.

Meng thaik gavang uak drei, dom bingula gheih mekre tal mata saong anek athur ginreih sanak, yaok baoh gaiy Ngo lac sa kadha seni ndung bak suan yava di phum sóc, pagam meng hatai je, tangin gheih ghang saong hatai bhap bini bangsa Khmer.

Yaok bilan raya, dom baoh gaiy Ngo gilac nduac di angaok kraong, ba tui sap hagar chreih chrai saong sap preu di bhap bini rahra. Di yaok baoh gaiy, thaik thaot athur ginreih, dom jalan bingula saong mata hu ngak biak gheih yau inem ilamo bangsa Khmer hu caik veik tapa rilo rairah.