Javap calei anak Quoc hoi biar harei kabroi 12/11, Thu tuong Lê Minh Hưng ndom lac Rajaei daok dui ba khang catang dom jalan langyah phun jien kuhria ngak bruk dalam thun, jien padai piah ba tagok cakrok GDP thun 2026 truh tapa tanut 10% saong pasang iek 10% saong pasang iek palai lam phat vil tanut 4,5%. Thu tuong ndom khang lac. Rajaei hu cakak trun dom danak dak meng kadung jien Trung uong trun daok labaih 3.000 danak dak hu makna, hu bruk pambak tabiak. Gam haong paok jien hu oh mek jien je, patrun jien je labaih 256 ty dong, urang dang anak Rajaei pagun sanya bruk tani tanat yaom jien, salih dil samu urang jakar sit umo plaih nyaik bruk ngak saong daong prein patagok ka tukvak 2026-2030. 

TPHCM daok duah pataom, roh duah dom jalan khik iek di labik saong pacang lubang dar tui kapol nyaom liet si di Bein bingu Ilimo Lê Thị Riêng, phường Hòa Hưng, ba tame harak gal ho so dak angan inem krung saong ramik pasiam paga di labik piah pahadar 80 thun Harei Thương binh - Liet si  (27/7/2027). Labik ini di Kubo Đô Thành meng dahlau diah, pambuak pagam haong bruk mesruh metak, var klak rup drei ka urang jakar, urang lin dalam mbang mesruh metak pacang kol Mỹ, daong taneh ia. Ini lac bruk sajarah dakrai - ilimo, rik tame pato pakai bruk ranam taneh ia saong jalan diukrai “Menyum ia hadar tal halau ia” .

Harei kabroi 12/11, So Pato Megru Ban raya Can Tho peih mbang taom mbaok pahadar 44 thun Harei Gru pato Viet Nam (20/11/1982 - 20/11/2026). Ini lac bingun dom lambaok vakil brei mboh hatai thau dhar phol, iek praong dom cei gru, anai gru daok kham merat harei malam, buh prein tame ka bruk “pala menuac urang”. Taduan saong pok meyaom dom bruk jak jeng rik daong di kapul urang gru pato, bingun ini, Gah padang peih ngak alin Huan chuong Lao dong pakat Ba di Po Negar alin 28 cei anai gru pato; 4 hala dok pakacah naih joi di UB Bhap bini Ban raya Can Tho ka 4 kapul.

So Noi vu TPHCM khan lac, darak pasar urang ngak TPHCM hu meng labaih 45.000 – 50.000 bruk ngak di puac thun 2026 saong jaik Tet Nguyen dan 2027. Dom gah khin palih ruah ralo lac gah ngak mbang pablei salih, pablei kaya, pablei online, ngak tabiak kaya kan; ngak bruk meng mac jamraih, urang ky thuat; padang ngak; logistics, gilang khik piah, pablei tabiak negar langiu saong jitvu. Piah pachreih urang ngak bruk  puac thun, doanh nghiep brei payar jien bilan  meng 8 tal 10 trieu dong sa bilan ka urang ngak bruk meng tangin takai; 10 -15 trieu  dong sa bilan ka urang ky thuat.

Harei kabroi 12/11, ia sua tagok glaong, ngak ia dauk di rilo labik daok rahra di xa Hòa Thịnh, tinh Dak Lak. Meng bruk srap gap peih ngak jalan pacang caga tui asal kadha “4 di labik”, bhum palei khik kajap salamat ka menuac urang, patakik khat lahik kayua ia sua ngak tabiak. Rilo jalan saong labik daok rahra di bhum dhaong biar xa Hòa Thịnh njauk ia dauk, jalan mbak klaih klaoh di sa labik. Anak tuk ia sua tagok, karja xa Hòa Thịnh hu peih bruk panduan menuac urang nao tal labik salamat. Njauk ndom tal lac, 14 baoh sang plaih ia sua bhap bini bahrau salah blaoh, ba tame pandar meng akaok bilan 11 hu paglaong siam lagaih, jeng labik pandaok salamat ka rahra dom labik daok rahra.

Hadei tukvak khik iek catang  bruk taduan raok sinh vien dunya pih trun kan ndah dalam negar, Australia paglong tanut palih  ruah saih bac dunya di thun anak tal min bruk palih ruah brei ngak catang jang. Dom sang bac dai hoc di Australia hu palih ruah labiah 161 ribau saih bac dunya mai bac dalam thun 2027 , tagok 11% dut saong thun dahlau.

Han Quoc brei thau dom tuai damuai negar langiu mai tal negar ini hu mbang akaok meti patruh tapa tanut 20 trieu mbang dalam sa thun. Ini lac bruk glaong abih mek hu hadei 14 thun, kuhria meng tuk taduan hu 10 trieu mbang tuai damuai di thun 2012 saong lac bruk ngak hu brei mboh gah jirah rivang Han Quoc hu yam tapa sa tukvak patagok bahrau. Piah raok salam 20 trieu mbang tuai damuai jirah rivang dunya, Han Quoc daok tagok jalan kuhria peih dom danak dak pahadar, dom mbang ndom meyai haong dom lambaok gah jirah rivang, ngak dom danak dak pathau khan di papar sap papar binguk, harak mbao, salam uan di dom mblang kapal ahaok par pakat dunya…

Kapal gilai  SS United States, pajeng tuai damuai nao grauk bhum tathik hu meng kan, birau kram di tathik  Florida, Mỹ padeih abih tukvak dui atah labaih 7 pluh thun piah piah salih tapa ngak jeng karang san ho praong abih di dunya. Atah labaih 302 met, atah jang gilai Titanic, SS United States lac gilai nao angaok tathik  Đại Tây Dương samar abih dalam mbang sirah akaok meti di thun 1952./.