20 thun dahlau, tuk bahrau padang diuk pasang, ong Lý Tiên saong amuk Sơn Thị Thanh Hòa, daok di puk B1, xa Tân Long daok dalam baoh sang kan kandah, oh hu taneh ngak mbang pala drak. Raidiuk baoh sang rilo meng lac patui tame jien ngak apah, jien mek tame oh tani tanat. Anak raidiuk yau nan, karja palei hu sangka, maong iek daong baoh sang mesraiy phun jien piah patagok bruk ngak mbang. Amuk Hòa khan lac:

"Thun 2013 ye hu Karja brei mesraiy 20 trieu, dahlak hulin mek 15 trieu blei kabau daok 5 trieu padang var ro."

Pilih kabao ngak padang mbang ngui, tui ong Tiên, ini lac jalan nao lagaih brei ka sang danaok di drei. Kayua dahlau nan, ong hu phun ilamo raong kabao, thau ka athur raong, gam haong nan halau kaya mbang jeng mbuan si duah.

"Dahlau diah, dahlak hulin hu raong blaoh, nan tuk hu daong, dahlak hulin ruah kabao raong peih mbang ngui, piah meda raong anek bik bac megru saong pandar ka raidiuk sang danaok di drei."

Meng hu ilamo, gam haong bruk tari taring, kham merat di diuk pasang, tapol kabao di baoh sang dak harei dak patagok rilo. Hu tuk, taong abih hu tagok labaih sa pluh drei. Piah srap gap halau kaya mbang, baoh sang di diuk pasang ong meda hu pablei dom drei kabao piah hu jien pandar.

Oh karei di baoh sang ong Tiên, amuk Hòa, meng phun jien daong di Karja, rilo baoh sang Khmer kan kandah daok di xa Tân Long jeng palih ruah hu bruk ngak mbang njauk lagaih piah uak drei tagok. Naih gheih yau baoh sang amuk Danh Thị Hồng, daok di palei A2, xa Tân Long, ngan haong bruk raong glang pabui. Urak ini, langiu tapol pabui mek ralo, amuk daok raong iek dahlau dua drei pabui nac piah pamanek, patakik jien buh tame. Maong tame rai pabui bahrau raong labaih dua bilan, amuk Hồng chreih chrai brei thau:

"Meng raong pabui patak pataom padang hu sang, blaoh raong anek bik bac megru. Anek praong bac tal 12 ye padeih bac paje, bahrau nao ngak hu dom bilan blaoh di Vung Tau, daok anek kamei ye daok bac tal 12."

Tui ong Thạch Hương, Akaok Kapul Urang ngak nong xa Tân Long, hadei di pagam jabat karja, mikva bangsa Khmer hu labaih 20% rahra dalam xa. Rahra rilo meng lac diukrai meng bruk ngak nong, dalam nan pala padai, raong glang saong raong ikan hadang lac dom bruk hu ngak rilo.

"Dalam tukvak mai meng anak daok tal gam haong Kapul Urang ngak nong xa brei patui pasang duah dom bruk ini saong taong yaom lagaih ka asar siam, siam lagaih di bruk hadei buh jien tame piah hu jalan peih praong. Gam haong nan, hu jalan patui veik daong dom baoh sang hu ginup kein lagaih saong hu hatai caong mesraiy phun jien di Gilang pariak Sarak piah patui veik patagok bruk ngak, ngak habar paglaong raidiuk di rahra harei hadei."

Mai meng phun jien hu daong camreip, meng bruk tari taring, bom ciuk rambah saong kham merat uak drei tagok, rilo baoh sang Khmer di xa Tân Long, ban raya Can Tho hu dak harei dak padang hu bruk ngak mbang duah jien, pasiam jien mek tame, tani tanat raidiuk. Patui di nan jeng brei mboh, tuk phun jien sarak hu brei njauk urang, pagam haong bruk kham merat di rahra saong bruk daong di karja palei, brei jeng bruk daong prein hu makna daong mikva patagok kinh te, uak drei tagok patruh kathaot karo kajap./.