Meng sa mblang iar menei taneh hamu di rahra yaok bilan ia ndik ia sua mai, thun ini, gam haong jalan kuhria di Chi bộ palei Giồng Bàng saong bruk sa hatai di rahra bhap bin, labik mai tal ini hu padang ngak tani tanat, dak harei dak jeng labik jirah rivang ba drei tame di bhum palei. Tapa di nan, bilan ia ndik oh lac hu sa janih ba mai kein lagaih ka kaya kan dalam ia blaoh nyu daok peih tabiak jalan ngak mbang, brei hatai bui sambai ka rahra saong dui pachreih tuai damuai mai tal bhum taneh tapen negar. Ong Lê Văn Lóc, puk palei Giồng Bàng, xa Thường Phước, tinh Dong Thap brei thau:

“Dom thun dahlau jeng hu 1-2 urang tame di ini ngak haong gauk, urak ini dom sa-ai nan panduan nao labik karei abih, hu ;abik blaoh dahlau ye drei ngak, oh klak hu, piah ngak ka bilan ia ndik ia sua hu chreih bui.”

Meng dom bruk ngak akaok meti, bruk jirah rivang bilan ia ndik ia sua di palei Giồng bàng daok dak harei dak salah blaoh, meng pambuak haong dom kongti jirah rivang tal buh jien tame gaiy papan ndong, paglaong asar siam duh ka tuai damuai jirah. Gah likuk bruk ngak ini lac bruk srap gap di chi bộ dalam bruk jak ba, pataom grauk urang tame ngak haong gauk, salih kein lagaih jeng kaya jirah rivang, brei jien mek tame di labik. Ong Thiều Công Dân, Bí thư Chi bộ puk palei Giồng Bàng, xa Thường Phước, tinh Dong Thap brei thau:

“Piah ngak dom bruk yau bruk khik ikan bilan ia sua, bruk ba drei tame bilan ia ndik hu siam lagaih saong jak jeng, ba mai kinh te brei ka rahra, Chi bộ saong Jabat palei peih ngak tal yaok urang ndang. Blaoh pathau khan dalam majam kapul Ndang, tapa dom kapul Zalo, Facebook piah yaih khan thaik thaot, daong tuai damuai thau tal labik jirah rivang, tal rivang me-in, rivang iek. Meng nan ba mai siam lagaih kinh te ka rahra hu mbaok tame bruk ngak.”

Njauk caik hatai hu lac, bruk ngak jirah rivang bilan ia ndik ia sua oh padeih di sa bruk atau sa labik. Tapa luac jalan ramik dak, jak ba urang jakar, dom ilamo lagaih hu patui bruk ngak saong patagok tui jalan bahrau. Di palei 2, xa Thường Phước, urang Bi thu chi bộ hu pagam haong bruk ini patui duah, salih bahrau bruk peih ngak, paglaong asar siam duh bruk saong srap gap pambuak haong dom kapul hu pambuak piah bruk jirah rivang hu peih ngak salamat, siam lagaih. Ong Trần Bình, Bí thư Chi bộ puk palei 2, xa Thường Phước, tinh Dong thap brei thau:

“Thun blaoh hu 1 drei ngak ye nyu oh ka abih hatai, thun ini rilo labik ralo palei ngak ye drei brei hu bruk tani tanat jang, meng labik nan lac drei duh tuai damuai siam jang. Asal kadha dahlau tuk ngak lac khol dahlak hulin jeng likau urang pan akaok, thuong truc Ndang uy, UB Bhap bini xa, Pasak Pabak pakat karja, Jabat Ilamo saong dom labik hu pambuak tal, khol dahlak likau hu langyah ndom meyai. Di ini ye nyu biak karei, lac labik tapen negar, mayah oh hu bruk pambuak di Ndang uy, UB bhap bini saong kapul Balai Bien phong Pabah bambang negar Thường Phước ye khol dahlak oh meda raok tuai jirah hu.”

Meng bruk patagok jirah di bilan ia ndik mai daong rahra ngak salih lek taka so, yaok jalan ngak yaom lac karei gauk min jeng hu bruk yau gauk lac bruk srap gap, bruk ngak saong hatai ngak baoh kreih camin hadah di urang jakar di palei. Biak nao brei mboh, tuk urang dang akaok chi bộ jaik taphia haong rahra bhap bini, khin sahaneng, khin ngak saong thau pamedeih bruk samu gauk dalam rahra, dom jalan di ndang hu ngak cambaih laih meng bruk ngak hu lagaih. Ini jeng lac bruk pasiam hatai je di rahra, padang kapul Ndang dak harei khang kajap saong daong pacang khik kein lagaih jalan di Ndang meng di labik./.