Yaok thun, tame bilan hajan lac baoh sang sa-ai Kor Văn Công, daok di palei Sơ Ma Long, xã Ia Hiao, tinh Gia Lai jeng daok duh hatai huac kanda ka ia kraong Yun tagok glaong. Baoh sang tong daok di tapen kraong, dalam tuk ia nduac dak harei dak mbang tame dalam. Dom harei ini, bruk duh hatai nan rah rah hu caik sa gah. Baoh sang sa-ai jaik hu panduan mai tal baoh sang bahrau di Labik daok bahrau bhum gaok bala palei Điểm 9, atah di labik klak dalau labaih 2km. Baoh sang praong jaik 60m², daning hu padang khang kajap, hu bilik tuai, bilik ndih, labik iar pahacih rup saong caic anak sang, likuk. Sa-ai Ksor Văn Công An brei thau ka hatai bui sambai tuk baoh sang bahrau si salah blaoh:

“Dahlak mboh labik bahrau ini praong laneing lanoi jang, lagaih ka nao mai, jalan praong jang, gheih ghang. Baoh sang praong, sang padang chreih takre jang, khang kajap, praong laneing lanoi. Langiu diah ngak ging, anak di ini ngak bilik tuai, daok labik diah ye bilik ndih; hu pala njam, raong menuk ada, limo. Tuk hu labik daok bahrau ka rahra, biak bui sambai.”

 Ini lac danak dak brei labik daok drah samar chip hu tinh Gia Lai pato tacei abih hatai peih ngak. Hadei tuk mek panuac ndom meyai di rahra ka thaik thaot sang, Gah Pasang iek dom danak dak buh jien tame tinh Gia Lai samar chip salah blaoh dom harak gal, peih padang sumu gauk.

Baoh sang sa-ai Ksor Văn Công An dalam 180 baoh sang di dom palei bhian njauk ia dauk, jaleih taneh rah tui ar kraong Yun saong dom ia craoh sit tuh mai kraong Ba, hu caga tal Labik daok bahrau palei Điểm 9, xa Ia Hiao. Labik daok bahrau praong labaih 15ha, yaok baoh sang hu ramik caga 500m² taneh daok, daong labaih 113 trieu dong padang sang gam haong jien ka bruk nao mai, tani tanat raidiuk. Amuk Võ Hoàng Lan, Akaok UB Bhap bini xa Ia Hiao brei thau, dalam thun ini bhum palei kham merat ba 80 dalam taong abih baoh sang bhum mbuan glut jaleih tal labik daok bahrau:

“Xa padang yaok adit ngak bruk haong dom bilik, dom gah jabat karja saong dom labik hu pambuak tal piah jhul samar tukvak ngak, ba mikva tame labik daok bahrau. Yaok harei tui iek, thau ka bruk, roh duah di labik, jhul tagok ngak bruk haong gah pasang iek danak dak piah buh jien tame dom binah karei ka aval drah abih, daong mikva sahnang salamat dahlau bilan hajan.”

Jaik nan di xa Ia Tul, sa labik rahra bahrau praong 22ha di palei Tơ Khế jeng daok brei drah samar chip salah blaoh piah raok mikva rahra bhum gaok bala. Piah daong rahra nao mai, karja jak ba kapul ndoan vien, urang kamei dalam kapul hu mbaok tame meng tayah sang, pajeng ba kaya kan. Bo Pato Tacei bol lin tinh Gia Lai jeng jak ba 224 urang jakar, bol lin hu mbaok tame daong rahra taoh talaih, pajeng ba saong padang gilac labik daok karei. Dai ta Nguyễn Xuân Sơn, Phaok Akaok Bo Pato Tacei Bol lin tinh Gia Lai brei thau, labik daok pataom tame ka urang ngak, srap gap tukvak, kham merat salah blaoh bruk panduan rahra dahlau di tuk ia sua tuh mai ngak ka mbung mabuk srau kadau:

“Dom harei ini hajan gam gam, bruk talaih brei ka bruk nyu gaok kan kandah saong tukvak salah blaoh njauk suai atah. Bo pato tacei tinh Gia Lai caong khin bhum palei patagok urang padang sang hu ilamo. Kham merat di Bo pato tacei lac dahlau harei 30/10, ye 207 baoh sang rahra brei hu mai labik daok bahrau, tani tanat raidiuk.”

Meng Ia Hiao, Ia Tul mai tal labik daok di dom bhum laman lamuac, tinh Gia Lai dak harei dak yam ba rahra tabiak truh labik mbuan njauk ia dauk, glut jaleih tal labik daok salamat. Ini oh tok lac bruk padang sang, panduan rahra, blaoh daok lac jalan langyah srap gap pacang caga bala meng aval, meng atah, pacang khik bruk diuk rai saong brei kein lagaih piah rahra tani tanat brei ka raidiuk suai atah./.