Puac bilan 8, dom mbang hajan tuh trun gam gam di labik padang Sang bac Gam daok gam bac pambuak pakat bhum tapen negar tinh Gia Lai. Di xa Ia Chia, bruk padang di langiu langik rilo mbang njauk brei padeih. Yaok mbang hajan khaong, yaok rituh urang ngak bruk gilac srap gap yaok tukvak piah padang pabak tukvak. Ong Vũ Phúc Tuân – Akaok pato tacei danak dak di xa Ia Chia, tinh Gia Lai brei thau tukvak ngak di danak dak:

“Tui bruk ngak daok kandaong biak praong, Taong Kongti khol dahlak akau daok jak ba urang ngak bruk meng bhum Barak tame mai. Piah mai tal samar, khol dahlak blei harak ve ahaok par biak ba urang ngak kong mai labik padang. Urak ini, bruk ini hu salah blaoh, khol dahlak jak ba 40-50 urang ngak kong meng bhum Barak tame mai. Langiu di nan, khol dahlak pandar ilamo jamraik ngak kong brei pruh ia, pambuak haong urang ngak piah jhul samar tukvak daok ngak, ngak ralo tuk wak jang, hu kein lagaih ka urang ngak kong”. 

Sang bac gam daok gam bac pambuak pakat xa tapen negar Ia O jeng khan brei thau ka bruk ngak daok kandaong suai. Ong Nguyễn Dũng Anh, Phaok akaok pato tacei danak dak brei thau, dom pakat daok theik ndong brei ka hu urang ngak bruk tathak bruk, biak kan si palih ruah meng urang ngak bruk tui yaok tukvak. Gah dang ngak tok pabak tukvak ngak meng dom var malam:

“Urak ini, dom bruk ngak daok veik brei ka hu tathak bruk, yau taok pagam, salah blaoh. Khol dahlak hulin daok pataom tame saong jak ba dom urang ngak bruk malam, ngak tagok ralo tuk piah dil samu. Urak ini, taong abih urang jakar, ky su jeng yau urang ngak bruk jeng kham merat salah blaoh, jao sang bac dahlau tuk peih pakak thun bac bahrau”.

Dai ta Nguyễn Công Ngân – Phaok Chinh uy Su ndoan 320, Quan ndoan 34, pato tacei kapul daong di labik padang xa Ia O brei thau:

“Daok Quan ndoan 34, khol dahlak hulin daong di xa Ia O, hu ngak blaoh bruk daong padang taong abih laaih 3.000m2 daning paga vil sang bac. Truh tapa jalan ngak meng 18/7. Urak ini, kapul khol dahlak patui veik daong gah dang ngak padang dom labik gah dalam sang bac”.

Rilo thun tapa, urang dang akaok UB Bhap bini tinh Gia Lai gam gam pasang iek dom labik padang, ngak bruk saong po buh jien tame piah taoh talaih dom gar tavak karei. Ong Lâm Hải Giang, Phaok Akaok UB Bhap bini tinh Gia Lai, brei mboh tinh oh salih tukvak ngak salah blaoh tui danak dak; caong khin dom labik jak ba rilo abih urang ngak bruk, kaya ndap nda, peih bruk padang hu ilamo saong brei caik dahlau salah blaoh dom banah njauk hu piah duh ka thun bac bahrau.

"Dom labik, gah dang ngak brei thau dil samu tuk peih pakak thun bac di 7 sang bac gam daok gam bac pambuak pakat lac sarak quan lenh, lac sarak menh lenh meng hatai di dom đồng chí. Ngak hagait ngak, khol drei brei truh tapa dom kan kandah, kham merat ngak ka hu dom banah piah duh ka bruk bac megru di dom anek kamuan, piah tame thun bac bahrau, dom anek kamuan hu sang bac bahrau”.

Dahlau di harei peih pakak bac, di dom labik padang Sang bac Pho thong pambuak pakat gam daok gam bac TH&THCS di dom xa tapen negar di tinh Gia Lai, dom labik doak tame tukvak nduac tui tukvak piah salah blaoh dil samu raok yaok ribau anek saih tame thun bac bahrau dalam dom sang bac praong laneing lanoi, samu yau gauk./.