Mblang sit anak baoh sang meng 2 - 3 m², urak ini jeng sang ging. Tu la-an, mac papah khan ao, radaih, binh gas… taong abih caik dalam labaih oh ka bak 20m². Dalam sang hu 6 urang, min bahrau hu sa bilik duk brei ka ndih daok. Oh hu labik ndih ye lang cieu trun mala tong sang. Raidiuk di baoh sang amuk Lương Thị Phú (umo 74 thun) di hem 146 jalan Vũ Tùng, phuong Gia Định, Ban raya Ho Chi Minh hadei di tuk jao labaih 6m² taneh duh danak dak peih huan brei pasiam ribaong Xuyên Tâm.

Amuk Phú brei thau, dom harei tapa dom bruk ngak mbang daok dang dalam diuk rai di baoh sang oh lagaih kayua ganik ganua, min baoh sang amuk, daok gilac jeng lac sa bruk palih ruah lagaih abih di ban raya chiat jien. Thei jeng sua tangi “Yau Habar oh panduan labik daok?” saong amuk oh javap chalei hu ka panuac sua tangi nan:

“Langik ley, jien halei piah panduan salih nao labik karei. Daok hu dom ye thau dom, bien halei hu ginup jien piah padang atau blei sang daok karei. Sang njuel drei, sang menei jeng oh hu, brei ngak anak meta sa labik di gah angaok. Taong abih dalam sang ndih di ala haluk kayua oh hu bilik ndih. Urak ini raidiuk brei patakik ganik gilac. Ramik sang abih 600 trieu jien ndong, sang nao mesraiy phun jien piah ngak ramik sang piah, hu labik daok. Meyah tabiak langiu ye jien halei blei sang karei, jien bayar brei peih huan mblang taneh bahrau hu 530 trieu dong”.

Atah di nan oh atah, hadei di labaih 20m² taneh breih peih huan, baoh sang ong Nguyễn Hải Dương daok labaih 7m². Njauk ndom mayai lac banah sang daok veik di ong jeng oh karo, mbaok praong abih di sang ong bahrau hu 1m, mbaok ganik abih di baoh sang labaih 50cm, jaik yau oh daok ginup labik piah diukrai yau bhian. Ganik katil, oh lagaih yau nan, min ngan haong ong Nguyễn Hải Dương – urang hu labaih pluh thun daok taphia tapen ribaong njom nerak – danak dak pahacih ribaong Xuyên Tâm ieu lac sa bruk ngak njauk bui sambai.

“Ribaong Barat Xuyên Tâm dahlau diah njom ia nerak biak trak, dom lac jamaok, kalaok blaoh hareik harom nerak tachauk. Ini lac sa dalam dom bruk njom nerak praong abih di labik. Baoh sang dahlak hulin jeng yau dom mikva di ini jeng biak bui sambai tuk mboh jalan mbak dak harei dak ngak jeng. Min bruk bui sambai jeng pagam tui rilo kan kandah. Dahlau diah baoh sang dahlak hulin praong labaih 35m², urak ini tok daok labaik 7m². Raidiuk ganik katil sap janih.

Daok di phuong Gia Định daok yaok rituh baoh sang hadei peih paha hu taneh ala 9m². Rilo baoh sang mbleng mblang tui talei jalan di danak dak, ngak ka bruk pasiam saong bruk diukrai daok biak rilo kan kandah. Tui rahra, dom baoh sang peih paha taong abih hu maong iek piah ramik caga labik daok karei atau daong pah sang daok. Dalam nan, dom baoh sang daok dom met vuong jeng njauk brei ta-eng drei ramik ka pakajap, ta-eng duah jalan piah patui veik bruk diukrai, ngak ka dom baoh sang laik tame bruk biak kan kandah sap janih.

 Ong Nguyễn Hải Dương brei thau khin hu sarak karja daong jeng ye dom bruk taneh daok biak sit, piah dom urang nan kurang hu jan val mblung mabuk patakik kateik geik hadei paeih huan paha taneh.

“Ndom biak, jien bayar ginup hu piah ramik ka pakajap baoh sang, oh labaih hu. Biak kan kandah, meng labik daok tal jien urang brei pah urang ramik sang danaok, jien blei kaya ndap nda ngak ramik sang. Jaik sa ty dong nan jien bayar di danak dak di baoh sang dahlak hukin jaik yau abih, dalam tuk nan jeng daok suh sah ka jien pah sang daok ka dom anek bik. Dom baoh sang dalam sarak peih huan paha patih daok hu ramik caga brei labik daok karei blaoh lac hu daong veik jien pah sang.

Danak dak pakajap ribaong barat Xuyên Tâm hu caong khin brei pa-abih bruk njom neerak dui suai atah rilo thun, pasiam bruk tathuak ia saong pasiam ban raya. Dom rahra daok di ini thau yaom kaom di danak dak nan. Min, bruk urang nan caong khin tuk ini oh lac sa baoh barat ribaong hacih sa-at jang, blaoh daok lac dom jalan langyah njauk lagaih ka dom baoh sang daok gilac dalam dom baoh sang tok hu mblang taneh daok dom met vuong.