Di labik jirah rivang bhap bini mbon Ako Dhông, phuong Buon Ma Thuot, tinh Dak Lak labik kong caing gam haong dom kadha adaoh tamia bhap bini hu dui pachreih rilo tuai damuai mai rah rivang dalam dom harei akaok thun bahrau. Sa-ai kamei angan Freya, tuai damuai mai meng Amirika, brei thau, thaik thaot that hijao, langik pandao gam haong bruk chreih chrai bui sambai di rahra saong ilamo di labik lac dom asal kadha caik brei bruk chreih takre karei.

 “Khol dahlak raok tuai jirah biak chreih chrai bui sambai tuk hu daok di ini saong mboh yau bilan padeih pandiak nan, bruk blaoh khol dahlak langiem oh bhian randap kayua baoh sang khol dahlak daok di Amirika, langik la-an dalam dom harei akaok thun bahrau. Kayua yau nan ye, khol dahlak hulin biak bui sambai tuk mai rah rivang di bilan ini. Di Amirika, grauk urang bhian pataom gauk mbang manyum rilo jang, daok di ini, mboh yau hu bruk pataom gauk saong mbang menyum chreih sambai gam haong baoh sang jang dut haong ayut cuai saong urang karei”.

Tui tuai damuai dalam negar, Dak Lak jeng lac labik mai rah rivang dalam harei bilan akaok thun piah pagam haong bruk padeih padei, duah thau ka langik ceik glai saong duah thau ka ilamo bhum taneh. Sa-ai Nguyễn Ngọc Chân, urang daok di ban raya Ho Chi Minh brei thau, dom mbang nao yau nan daong dom anek sa-ai hu ilamo saong ba drei tame rah rivang.

 “Dalam dom harei bilan akaok thun bahrau ye dua kamuan sit hu padeih bac, nan baoh sang dahlak nao tal Buon Ma Thuot lac labik pala rilo kophi di Viet Nam, khin ka dua kamuan nao duah thau ka ilamo, thau ka ilamo di bhum palei jeng yau ka taneh riya labik dhua, ka dom kamuan thau hu bhum Tay Nguyen ngak yau habar”.

Dalam ilamo di urang bangsa Randaiy, bruk mbang menyum kaya bhap bini, maong iek adaoh tamia me-in kong caing saong pambuak haong dom urang nghe nhan hu ba mai ka tuai damuai dom mbang rah rivang chreih takre. Meng dom yaom kaom hu dahlau, mikva dalam mbon palei dak harei dak patagok jirah rivang meng ilamo bhap bini.

Tui ong Y Nuel Niê, ong taha mbon palei Ako Dhông, dom thun jaik ini, bruk jirah rivang bhap bini hu mikva dalam mbon palei sangka buh jien tame ngak, ngak meng dom bruk pagam bruk rah rivang sinh thai saong ilamo. Dalam thun bahrau, mban pasang iek jirah rivang bhap bini di mbon palei peih ngak veik dom ndap nda saong danak dak piah paglaong asar siam bruk duh tuai damuai.

 “Dom ndap nda, dalam nan hu lac kaya mbang rilo jang dut haong thun 2025, dom bruk karei ka ragam ragu jeng brei salih ka bahrau jang. Dalam mbon palei drei ye yaok bilan hu dom danak dak ragam ragu oh mek jien piah duh ka tuai damuai jirah rivang”.

Ngan haong dom gah ngak mbang pablei salih di Dak Lak, patagok jirah rivang pagam haong sinh thai dan saong ilamo bhap bini ieu lac sa jalan karo kajap. Amuk Nguyễn Thị Ngọc Anh, Kongti Co phan jirah rivang sinh thai – bhap bini Ko Tam, phuong Tân Lập, brei thau, jirah rivang sinh thai – bhap bini oh tok ba mai jien mek tame, blaoh daok pamaong tal bru pacang khik alam langik, patagok hu bruk lagaih di gah ngak nong – raong glang di tinh:

“Kayua lac labik jirah rivang sinh thai, ilamo bhap bini nan khol dahlak hulin pataom tame bruk pasiam thaik thaot labik, srap gap dom kaya tamo ka njam patam baoh karaoh meng raong glang, pala drak piah duh ka kaya mbang. Kayua khol dalak hulin srap gap dahlau saong raong glang di labik nan taong abih dom harei raya tet, yaom kaom hu khol dahlak hulin khik tamo oh salih, jeng yau oh buh tabiak yaom jien halei dut haong harei bhian”.

Patagok ilamo bhap bini saong bruk lagaih dalam yaok bruk ba drei tame, jirah rivang Dak Lak daok dak harei dak pachreih hu hatai tuai damuai. Dalam dom harei akaok thun bahrau, kayua sap caing, ragam tamia xoang saong hatai chreih sambai hu jeng bruk lagaih dui pachreih ka jirah rivang bhum palei./.