Ong Nái Đôm, urang ngak di palei ngak gaok glah lan am Hamu Craok brei thau: Janih biak karei di palei ngak gaok glah lan am nan lac jalan ngak tabiak gaok glah lan am. Yaom lac hu rilo ndap nda bahrau brei ka bruk ngak lan am, min mikva di palei gaok glah Hamu Craok jeng daok khik cara ngak meng tangin. Yaom lac pandar dom baoh papan payeng tuk ngak tabiak dom baoh kalaok, baoh buk baok jek mbinh, urang ngak di labik ini gilac mek takai di drei piah payeng vin taom dhar ndap nda gaok glah daok ngak, mek tangin tapat, uak piah ngak brei sa goi haluk jeng sa janih ndap tui hatai caong khin di drei.  

Kadha biak karei hu mboh lac dalam ilamu ngak gaok glah lan am Hamu Craok ieu lac di bruk ngak tabiak. Dom urang kamei “Ngak meng tangin, pa-yeng meng taok”. Urang ngak nao kadul likuk, tangin papait tangin mbeik thah, craok suan yava tame yaok ghoi hluk thu hu jeng dom janih ndap nda gaok glah lan am biak gheih ghang.

Bingula angaok dom ndap nda gaok glah Hamu Craok hu ngak oh tui harak gal tapuk siphau, jalan cih bingu hala mboh biak mekre, mboh hu thaik binguk tagei cagaik, kanduh bao, aia kraong, bingu hala phun kayau. Langiu di nan dom bingu hala angaok lan am gaok glah daok pandar gam palak tangin, cakau tangin, pandar sambo mau phun kayau, ilamu pruh thak piah ngak sambo mau ao piah ka lan am hu sambo rilo janih gam mbuan mbiah, jaik taphia, njuan njac gilac ndung bak janih yao klak, sahanak ginreih ndung bak asal ilamo di bhap bani bangsa Cam biak karei, pachreih dui urang biak karei.  

Harei ini, palei Hamu Craok oh lac tok ngak tabiak ndap nda gaok glah lan am pandar dalam sang bo daok peih prong tabiak lan am tui ilamu barau my nghe yau rup patau Apsara, bimon kalan Cam, gaok glah caik buk bingu, pandap phong thuy… Oh lac tok hu pandar rilo dalam negar, lan am Hamu Craok daok pablei tapa rilo darak pasar dunya karei yau Rusia, Amirik, Itali, Japan. Bruk ini brei mboh yaom ilamo di palei ngak di bhum taneh Khanh Hoa angaok dunya.

Dom urang ngak daok di palei ngak gaok glah lan am Hamu Craok urak ini hu ngak tabiak 3 janih ndap nda nan lac janih lan am pandar dalam sang, janih lan am ngak yang bhang saong janih lan am my nghe. Mai meng bruk rivang ma-in mong iek dak harei dak cak rok patagok, dom janih pandap gaok glah lan am labik ini hu meyaih khan dalam prong prang. Bruk nan ngak brei paglaong jien mek tame saong brei mboh yaom ilamo biak karei di urang bangsa Cam.   

Hu mbaok di meng puac abap 12 tal ini,  palei ngak gaok glah lan am Hami Craok hu mong yau sa dalam biak takik dom palei ngak lan am meng kan dalau di bhum taneh Asia Tengara Ndong Nam A daok khik ilamu ngak lan am meng tangin di urang Sa Huỳnh atah di ini labaih kurang jaik 3.000 thun. Langiu di ilamu ngak gaok glah lan am meng tangin gam haong rilo kadha oh ka thau abih jeng ye ilamu bhap bani biak karei, Hamu Craok jeng daok khik palei ngak meng kan tui adat gah amaik ngan haong rilo adat cambat, tanarakun saong ilamo adaoh tamia bhap bani biak karei hu peih ngak yaok thun.

Palei gaok glah lan am Hamu Craok hu jeng labik rivang jirah palei ngak di tinh Khanh Hoa, pachreih rilo tuai damuai mai rivang, ma-in. Labik ini oh lac tha janih ngak lan am blaoh daok pambuak pagam lan am haong bruk adaoh tamia saong mbang menyum meng kan duh ka rilo kapul nyaom tuai damuai mai jirah rivang ma-in dalam nagar jeng ye di angaok dunya.

Ilamu ngak lan am di urang Cam hu UNESCO brei angan je nan brei mboh asal ilamo biak karei di nagar Viet Nam dalam gilang inem krung ilamo dunya, langiu di nan brei ngak pambak prong, ngak brei paglaong akaok saneng di bhap bani saong karja puk palei dalam bruk peih ngak dom bruk ngak piah khik ramik, patagok saong ngak jeng pren khang bahrau ka inem krung. Meng di nan ba brei hatai pachreih piah ka rai rah dam dara pambuak pagam, patui bruk ngak lan am di mukkei amaik ame./.