Tukvak jaik di ini, di mblang bein tapen tasik anak mbaok jalan Tue Tinh, phuong Nha Trang, tinh Khanh Hoa bhian peih ngak danak dak ilamo adaoh tamia di jalan mbak hu angan haong kadha “Mai tal bhum taneh drap ar inem krung” kayua dom urang adaoh tamia di Sang ADaoh tamia ilamo meng kan tinh Khanh Hoa peih ngak dalam dom harei roya harei Tet.

 Dom urang adaoh tamia peih ngak dom kadha adaoh tamia, ma-in dom janih ragu ragam ndung bak ilamo bangsa Cam. Di nan, hu sap java ragam saranai, baraneng, ginang, dom ragam adaoh bhap bani urang bangsa Cam saong dom ragam tamia lai la-ar di bhap bani Cam… Taong abih hu ba mai ka urang mong iek sa mejam ilamu gam din dang pang biak bingi lai la-ar.

Hu biak rilo tuai damuai mai meng nagar Russia, Cina, Korea,… mboh brak chreih chrai tui dom kadha adaoh tamia ini. Sa-ai Kalganov Vycheslav – urang tuai jirah daok di nagar Russia brei thau: “Ragu ragam, kadha adaoh tamia dalam dom danak dak biak gheih, biak bingi pang, ba mai kadha bui sambai, chreih chrai. Yaom lac khaol dahlak oh thau cambaih laih asal kadha, makna di dom kadha adaoh, ragam tamia, min taong abih manuac urang hu mbaok jeng chat jeng tamia tui kadha adaoh tui ragam tamia”.

Nghe si Uu tu Đỗ Ngọc Tâm – Phaok Akaok Sang adaoh tamia ilamu meng kan  tinh Khanh Hoa brei thau, jabat hu padang ngak rilo danak dak, kadha ndung bak sambo  ban ilamu bhap bani, bangsa di bhum taneh, anek manuac urang di Khanh Hoa, gam haong dom kadha adaoh tuong, kadha adaoh bhap bani tui mbai choi, ilamu bhap bani dom bangsa Cam, Raglai, Ende… Tapa nan, roh duah dom yaom ilamu meng kan laik haong hatai caong khin di urang mong iek saong  labik peih ngak di danak dak. Hatai caong khin di dom urang adaoh tamia nan lac rik daong yaih khan tal tuai damuai dom yaom ilamu meng kan di bhum taneh, palei negar. Ini jeng lac jalan ngak piah iek prong pok glaong ilamu adaoh tamia di ong akaok ong akei caik mai.

Nghe si Uu tu Bích Thủy – urang dalam kapul  Mbai Choi khu V, daok dalam Pasak Ilamo tinh Khanh Hoa brei thau, dalam dom harei peih kapul nyaom mbai choi thun bahrau anek sak athaih ye pachreih hu biak rilo urang mai mong iek, dalam nan hu rilo tuai damuai langiu negar. Yaok mbang hu urang tuai negar langiu tame ma-in, dom urang dalam kapul clup thei thei jeng kham merat ba mai kadha bui sambai, kadha siam gheih di abih.

Dalam jalan nduac ilamu adaoh tamia urak ini, dom yaom ilamo meng kan jeng meblah mek hu labik dang biak karei. Urang mong iek, abih di nyu lac urang mong iek negar langiu tuk halei jeng caong khin hu mong hu iek, duah thau ka ilamo meng kan di Khanh Hoa. Kayua yau nan ye, dom jabat peih ngak ilamo di tinh Khanh Hoa jeng khin hu jalan peih ngak, dak padang dom kadha piah gam khik hu yaom, asal ilamo meng kan, gam ndung bak suan yava di rai diuk harei ini, laghaih haong hatai caong takre di tuai damuai./.