Piah ngak brei bui sambai chreih chrai ka tuai damuai, labik rivang ma-in Bàu Trắng U&Me di palei Hồng Lâm, xa Hòa Thắng, tinh Lam Ndong hu pambuak bruk haong dom urang adaoh tamia oh bhian lac urang Cam daok di xa Bắc Bình peih ngak danak dak adaoh tamia bhap bani Cam.

Yaom lac mada bahrau ba tame pandar dalam tukvak masa raya Tet nesak thaik thun 2026 saong dalam dom harei puac adit, jeng ye tuk hu tuai damuai kapul nyaom caong khin, min danak dak adaoh tamia bhap bani Cam caik hu rilo kadha siam gheih dalam yaok urang tuai.

Amuk Nguyễn Thị Hạnh, sa urang tuai mai meng tinh Đồng Nai brei thau, ini lac danak dak adaoh tamia meng kan ndung bak asal ilamo di urang bangsa Cam. Dalam 30 minit min danak dak ba mai biak rilo drut druai.

"Danak dak nan biak gheih, adei mboh nyu ndom tagok hu rai diuk di bhap bani daok pak ini. Danak dak adaoh tamia ini biak siam, biak gheih."

Dahlau di tuk nao duah thau angaok mbuan cuah Bàu Trắng, tuai damuai ba drei tame karam dalam ragam tamia Apsara di urang Cam. Dom ragam tamia gam haong panuac adaoh take, ralai pablak tui gam dom janih alat ragam ragu yau: Ghinang, Baraneng, Saranai… ngak brei chreih hatai urang mong iek.

Ong Phạm Văn Trọng, lambaok labik rivang ma-in di Bàu Trắng U&Me brei thau, langiu di bruk ngak brei ka tuai damuai mong iek saong duah thau ilamo bangsa Cam, Labik rivang ma-in daok caong khin meyaih khan ilamo di urang Cam labik ini.

"Jabat jeng hu pambuak bruk haong dom adei sa-ai di kapul nyaom adaoh tamia ilamo Cam di huyen Bắc Bình klak. Mboh binah rilo tuai damuai negar langiu biak takre, daok tuai damuai Viet Nam oh ka caik hatai rilo. Jeng mai meng nan bo dahlak caong khin pambuak bruk haong dom adei sa-ai di labik ini, ba ilamo di puk palei, palei ngak di puk palei ba tame ini piah peih ngak, piah meyaih khan ilamo di drei, piah ka drei khik hu veik ilamo, ngak brei patagok chreih mekre jang ka tuai damuai dalam dom harei roya, harei Tet."

Pambuak haong bhum taneh bak pandiak saong angin tapa rilo abap, bhap bani Cam gam haong dom bangsa adei sa-ai hu rik daong brei ka ilamo Lam Ndong ndom karei, Viet Nam ndom pataom rilo inem krung biak hu yaom. Nan lac dom ragam tamia Apsara, tamia kadhik ralai pagam haong sap yava di Ginang, Baraneng, Saranai… ngak brei chreih hatai urang mong iek; dom bimon kalan Cam yao klak, yaom lac nao tapa rilo thun bilan tuk siam tuk laghaih min jeng daok khik tamo yaom lingai di nyu… biak karei, ndung bak asal ialmo biak karei.

Ong Trần Đức Dũng, Akaok Mban khik iek inem mek bimon kalan Po Sah Ine brei thau, mai ini, langiu di bruk mong iek dom bruk ngak biak karei di bimon kalan Po Sah Ine, tuai damuai daok mong iek hu dom kadha adaoh tamia kayua dom urang adaoh tamia oh bhian lac urang Cam peih ngak. Langiu di nan, tuk tuai damuai urang jirah nao tui kapul nyaom hu caong khin ka bruk peih ngak gilac dom adat cambat tanarakun di urang Cam yau: Rija Negar, Rija harei…, ye jabat jeng hu pambuak bruk peih ngak dalam di mblang bein inem mek.

"Tukvak tapa, khaol dahlak jeng hu pambuak bruk haong dom kong ty ba tuai jirah rivang ma-in piah dak padang jalan dhua jirah jeng yau ngak tabiak dom ndap nda rivang ma-in piah duh ka tuai damuai. Dalam nan hu dom bruk rivang ma-in, duah thau saong  mong iek dom bruk ngak yau: adaoh tamia bhap bani Cam, blaoh ngak pandap meng kan yau jik pet, ngak gaok glah hu tuai damuai taong yaom biak glaong saong ba mai rilo kadha siam gheih brei ka tuai damuai mong iek duah thau ndap nda rivang ma-in ini dalam melam di labik inem mek bimon Po Sah Ine.

Oh lac tok hu Labik rivang ma-in Bàu Trắng U&Me, Labik inem mek bimon kalan Po Sah Ine bo rilo resort saong dom labik rivang ma-in karei di labik Mui Ne, Tiến Thành, Phan Thiet… jeng palih ruah ilamu meng kan di dom bangsa takik piah ngak brei parilo jang ndap nda rivang ma-in duh ka tuai damuai jirah.

Tinh Lam Ndong urak ini hu labaih 42.000 urang bangsa Cam, diuk rai pataom di labik tinh Binh Thuan dahlau diah. Tukvak jaik di ini, ilamu meng kan di urang Cam hu labik dang biak prong dalam bruk parilo jang ndap nda rivang ma-in. Bruk ngak ka dom inem krung ini jeng ndap nda kaya kan hu mboh biak di anak meta oh lac tok pachreih tuai damuai dalam saong langiu negar bo daok ngak tabiak dom janih ndap nda biak karei brei ka tuai damuai, paglaong bruk pachreih saong ngak brei khang kajap ka gah rivang ma-in tinh Lam Ndong dalam tukvak anak tal./.