Dong Nai daok peih dom danak dak padang khang ha tang pakat negar. Bruk peih paha mbaok taneh lac sa bruk praong “pandiak” mbuan ngak srau kadau, min ngan haong kadha “Karja jaik taphia rahra, duh ka rahra”, karja dom pakat jeng ngak catang jang, tani tanat jang. Urang dang akaok pakat uy, karja tapak duh rahra saong ndom meyai, pang rahra ndom, langyah tani tanat dom hatai sahaneng, caong khin di rahra. Meng bruk nan, bruk thau ka rahra jeng daong taoh talaih dom tavak, ngak jeng bruk sa hatai glaong dalam rahra.

Bruk dakvah jak ba oh lac padeih di bruk peih paha mbaok taneh blaoh daok lac prein ngak khang jhul tagok bruk daok dang mbang ngui. Meng hu bruknjak ba gheih dom gah ril daong ka danak dak “Sang daok anit ranam ka mikva drei”, tukvak 2021-2025, Dong Nai brei oh daok baoh sang taik tahak hu labaih 2.000 baoh sang. Amuk Đặng Thị Lan, xa Lộc Ninh, oh padauk hu hatai bui sambai tuk sang klak hu pasiam: “Baoh sang mbang tui sarak karja, meng dahlau hu Karja brei caik dalam harak hu daong alin baoh sang anit ranam, tal ini suai lo nan baoh sang klak oh kajap. Dahlak jeng ngak harak likau pasiam saong hu brei 50 trieu piah pasiam sang daok. Karja sangka yau nan, baoh sang jeng chreih chrai”.

Praong abih di nyu nan lac, hadei pagam haong Binh Phuoc, Dong Nai hu jalan tapen negar atah labaih 258km. Ngan haong labik tapen negar, jak ba dakvah gheih dui hu mikva bangsa takik saong urang hu angan je  gam haong gauk pacang khik tapen negar di Taneh ia.

Tui Thuong ta Nguyễn Anh Đức, Dang akaok Mban Pato tacei Bol lin Bien phong tinh Dong Nai, labik sangka iek praong brei lagaih ka urang jakar naih joi ka ilamo, thau tani tanat sap bangsa takik, bhian “jaik taphia rahrabhum taneh” piah thau ka rahra. Rilo danak dak hu makna hu peih ngak yau ye: “Paglaong takai yam adei nao sang bac – Anek raong Balai Bien phong”, daong 118 anek saih, “Daong urang kamei tapen negar” saong “Sang daok ka urang kathaot tapen negar”. Thuong ta Nguyễn Anh Đức ndom meyai lac: “Brei thau cambaic hatai sahaneng saong caong khin di bol bhap rahra, meng nan ba tabiak asal kadha hu siam lagaih “Danak dak abih rahra ba drei tame pacang khik taneh ia negar, an ninh tapen negar dalam jaman bahrau”. Gam haong di nan sangka ka dom baoh sang kathaot, baoh sang kan kandah, daong dom urang nan patakok kinh te – xa hoi”.

Tukvak thun 2021-2025, dalam tinh Dong Nai hu 12.615 mbang dakvah “Jak ba gheih” hu brei angan, jeng “kadha pambak tabiak” dalam bhap bini. Bruk “gheih” ini daok brei mboh cambaih laih dalam bruk ngak tantu tui kadha “Rahra thau, rahra biai, rahra ngak, rahra pasang iek, rahra taduan”, khik kajap dom sarak jeng hu ngak meng hatai kham merat saong hatai caong khin di rahra.

Ong Hà Anh Dũng, Phaok Akaok bhian hu mbaok di Uy mban MT Negar Viet Nam tinh Dong Nai ndom lac: Prein khang ba mai jak jeng, patagok di bhum palei oh sa janih daok di dalam Sarak Ndang bo lac bruk sa hatai ka bhum palei. Ini lac bruk gul pataom “banrik” – lac sa bruk makna piag abih jalan ngak, sarak hu ba tame ngak lagaih: “Dahlak sahaneng lac, glaong jang di abih, Mat tran Negar dom pakat tuk halei jeng brei hu ngak siam bruk di drei, ngak yau habar hu jeng sa talei pambuak khang kajap jang, brei ka hatai je tal bol bhap rahra. Meng di nan pamaong tal sa jalan ngak lac ngak habar piah Dong Nai peih siaok par, ngak habar ka rahra Dong Nai trei sir jang, abih urang haniem phol, sang halei jeng chreih chrai bui sambai”

Jak jeng di bruk jak ba dakvah gheih di Dong Nai hu brei mboh "Prein khang saong bruk patagok karo kajap brei hu meng hatai rahra”. Pandar prein khang “biak banrik” ini, gam haong bruk kham merat saong ngak bruk tantu, DongNai daok brei bruk khang kajap trei sir, haniem phol ka labaih 4,5 trieu rahra dalam tinh./.