Mai pasang iek ruak di Pasak Y te Phú Hòa, sa-ai kamei Lê Thị Bích Loan, daok di palei Phú Thạnh, xa Phú Hòa 2, tinh Dak Lak tut angan di jamraik ta-eng duh bruk, daok ieu lac kiosk y te hadah krah, caik di labik raok tuai. Janih khin ba ma QR di the BHYT atau CCCD tame bruk bah pasang, jamraik ta-eng puac khau tin menuac urang, daong sa-ai patakik bruk khan khau tin saong mek taka so danak di smart phone. Sa-ai Loan mboh lac, bruk ngak di angaok jamraik biak mbuan, meng urang sit tal urang praong thun jeng meda hu pandar hu.

“Drei mboh jamraik ini lac biak mbuan ngak ka urang ruak, khau tin cambaih laih. Drai oh ka taha umo, min dom cei anai taha jeng pandar hu. Hu jamraik ini ye mek taka danak samar jang, oh njauk cang suai, lahik mbang pasang iek di drei atau urang urang mai dahlau njauk pasang iek hadei, urang mai hadei njauk pasang iek dahlau”.

Bac si Lương Văn Phước, Yam ndok Pasak Y te Phú Hòa brei thau, siam lagaih lac cambaih laih meng puac bilan 7 tal ini, pasak gam haong nan peih bruk pasang iek prein yava dalam rahra, hu labaih 3.500 mbang urang hu pasang iek ruak.

“Meng tuk peih jamraik ini ye bruk pasang iek urang ngak bruk hu laneing jang, dhalau diah ye brei caga rilo urang, urak ini tok khin hu meng 1 tal 2 urang lac hu ngak blaoh bruk nan. Hu kein lagaih piah drei pandar dom urang jakar piah daong ka dom gah karei pasang iek ruak, njauk ndom tal lac labik pasang iek prein yava dalam rahra daok peih ngak. Tok khin raok di ini urang meda paglaong tagok labik pasang iek ruak, klak tapa tukvak bah pasang jamraik di dom khoa jabat bilik”.

Amuk Huỳnh Thị Son, Bi thu Ndang uy xa Phú Hòa 1, tinh Dak Lak brei thau, gam haong halau prein kadung jien, tukvak tapa bhum palei hu taduan hu rilo bruk daong meng gah rik daong rahra. Jamraik tut angan pasang iek di Pasak Y te Phú Hòa kayua Agribank Dhar gah Phú Yên alin brei lac sa dalam dom bruk nan.

“Dalam tukvak meng blaoh, xa Phú Hòa 1 taduan hu rilo bruk daong, klah rabha, daong di dom kongti, dom gah ngak mbang pablei salih di bhum, njauk ndom tal lac bruk salih taka so. Ini jeng lac bruk daong njauk hu, daong pahu halau prein ka xa Phú Hòa 1 dalam bruk salih taka so di taong abih gah”.

Tui So Y te Dak Lak, salih taka so daok peih ngak meng ruak hakik, harak prein yava ndien tu tal bruk bayar oh pandar jien mbaok saong dom lagaih duh ka bruk pasang iek taong ruak. Tukvak 2026-2030, Dak Lak hu njauk hatai ka jalan ramik caga jaik 484 ty dong ka 7 danak dak y te taka so. Gam haong gah buh jien tame di Karja, tinh jeng pachreih jak ba halau prein rahra piah pabak, paglaong jitvu di dom tal pakat njauk lagaih. Tal ini, Kiosk y te hadah krah urak ini hu peih ngak di 15/36 labik pasang iek ruak dalam tinh.

Halau prein jak ba rahra salih ka buh jien tame di Karja, min meda pabak tame dom hatai caong cambaih laih di labik. Ngan haong dom kaya saong halau prein njauk lagaih ka hatai caong khin di labik, siam lagaih salih taka so meda brei mboh tapa kaya cambaih laih. Yau di dom labik y te di tinh Dak Lak, siam lagaih brei mboh tapa bruk kaya ndap nda hu ba tame pandar hu daong rilo rahra patakik bruk ngak saong tukvak daok cang.