Di to 42, phuong 2 Mbao Loc, tinh Lam Ndong, dom daneng menyim njauk klaak var urak ini hu padang ngak gilac di kreh sang tol, labik aia hadah nyu pacang tapa angaok yaok gar marai. 20 urang daok dalam nyaom menyim jih dalah harei harei jeng daok ngak, urang prong abih hatai pato tacei, uranaih tari tareng bac megru yaok bingu hala. Labaih 2 thun tapa, baoh sang tol meng kan oh lac tok labik nyaom pataom ma-in bui di bhap bani blaoh daok lac labik peih ngak bruk ngak meng kan, meyaih khan pandap panda brei ka tuai damuai dalam saong langiu puk palei. Meng labik mbuan si lahik nao, mai meng phun jien saong hu bruk daong di gah ilamo, padhih saong rivang ma-in, menyim jih dalah hu brei mboh ka hatai kham merat pasiam veik ilamo tui jalan ngak njauk, taphia di nan lac pren khang piah daong ka bhap bani patagok.

Tui So Ilamo, padhih saong rivang ma-in tinh Lam Ndong, Danak dak Khik ramik, patagok yaom ilamo meng kan siam gheih di dom bangsa takik pambuak pagam haong patagok bruk rivang jirah ma-in (iew panak lac Du an 6), daok dalam danak dak jalan ngak pakat negar tuvak 2021-2025, hu ngak brei pasiam veik, khik ramik saong patagok ilamo meng kan pambuak pagam haong rivang sirah ma-in. Tapa nan daong grap tanat rai diuk bhap bani bangsa saong palaghaih cak rok patagok bruk ngak mbang kinh te – xa hoi di puk palei.

Jabat hu peih ngak rilo bruk ngak khik ramik saong yaih khan inem krung ilamo oh mboh di meta: padang ngak gilac roya Nhô Phú (adat likau angin siam hajan laghaih piah pala hagait hu nan), roya Nhô Dơng (adat likau hajan) di xa Ndam Rong 4; padang ngak 3 bruk ngak ilamo meng kan di bhap bani bangsa takik pambuak pagam haong patagok rivang sirah ma-in; patabiak 3 akaok tapuk siphau ndom ka ilamo dom bangsa. Taphia di nan daong roh duah, pasiam veik saong cak rok patagok dom yaom ilamo oh mboh di meta mbuan si lahik nao yau kadha daoh ragam tamia bhap bani, menyim pet saong lan am ngak meng tangin.

Di Ndak Nong saong Binh Thuan klak, Danak dak 6 hu daong phun jien pacang caga trun pakat dom inem mek dak rai sajarah pambuak pagam haong bruk mesruh metak pacang cakak kaol Prang di bhap bani M’nông kayua N’Trang Lơng pal akaok; pasiam veik inem mek ilamo Cam; khik ramik saong patagok dom roya meng kan naih gheih di bhap bani bangsa takik pambuak pagam haong pataom mek, dak padang dom janih pandap panda rivang sirah ma-in. Danak dak jeng peih dom tal tacei pato ilamo ngak lan, adaoh kadha daoh ragam tamia bhap bani, dak pak saong alat ragam meng kan di urang Cam, K’ho. Langiu di nan daong pathau khan, meyaih khan yaom ilamo naih gheih di dom bangsa takik, pambuak pagam haong bruk rivang sirah ma-in, duah thau ka pren khang saong palih ruah dak padang pandap panda biak karei brei ka yaok labik.

Vaktu masa meng 2020 - 2025, Danak dak 6 hu yaih khan biak prong dom yaom ilamo meng kan naih gheih di dom bangsa. Mai meng phun jien danak dak jalan ngak pakat negar, Danak dak ba mai baoh jeng siam mekre hu mboh di meta, pambak biak siam tal rai diuk rahra, jhul patagok bruk ngak mbang kinh te – rah ra, pasiam bruk paprong gul pataom taong abih bangsa, ngak brei khik kajap salamat ka puk palei.

Amuk Nguyễn Thị Bích Ngọc, Phaok akaok So Ilamo, Padhih saong Jirah rivang ma-in tinh Lam Ndong brei thau, Du an daok ngak brei patagok akaok saneng, hadah mbaok hadah meta ka asal ilamo di bhap bani bangsa takik, pachreih mikva khik ramik, patagok saong pambak prong dom yaom ilamo meng kan dalam rai diuk harei bahrau. Urak ini, So Ilamo, Padhih saong rivang sirah ma-in pambuak bruk haong dom puk palei patui veik peih ngak dom bruk ngak nyaom pataom ilamo meng kan, padang ngak gilac roya pambuak pagam haong cak rok patagok rivang sirah ma-in, meyaih khan prong prang inem krung dom bangsa. Langiu di nan, dak padang saong pambak prong dom bruk ngak mek hu baoh jeng sim mekre, pambuak pagam haong rivang sirah ma-in, ngak brei patagok bruk ngak mbang kinh te -  rah ra saong ba brei phun jien mek tame tani tanat ka bhap bani./.