Mai puk Phũm Xoài, xa Châu Phong, tinh An Giang tuai damuai mbuan njauk pachreih meng thaik thaot daneng menyim hu padang di cac marang sang, labik dom urang bangsa Cam gheih tangin daok nduac tangin, menyim jeng dom bingula angan je ba tui ilamo siam gheih praong dalam, pambuak pagam khang catang haong raidiuk adat cambat di bhap bini Islam di bhum akaok halau kraong Cuu Long.

Amuk Sala Mah, palei Phũm Xoài brei thau, meng umo 15 thun amuk menyim hu dom blah khan bai pataih akaok meti, bac megru meng amaik saong amuk mei di drei. Meng kal, yaok urang anek kamei dara Cam jeng thau menyim lac sa bruk hadah mbaok meta. Meng bruk menyim, drei meda hu ngak dom blah khan ma-om, khan ao, sarong, kadung teik,… Daok urak ini, bruk menyim daok duh bruk jirah rivang, meng nan bo khik hu bruk bhap bini saong hu jien mek tame piah pasiam raidiuk baoh sang.

Ong Mohamad, po labik menyim jih dalah Mohamach, palei Phũm Soài brei thau, bruk menyim jih dalah di urang bangsa Cam daok di Bhumsoai Châu Phong hu padang ngak di dom thun akaok di abap XX. Jaman dahlau, yaok baoh sang bhian hu dom daneng menyim, biak chreih chrai bui sambai. Harei ini, gam haong raidiuk urak ini saong bruk meraik di kaya meng ngak kong nan bruk ngak ini kurang jang. Min bruk menyim jih dalah di bangsa Cam Châu Phong jeng hu khik ramik saong patagok kayua dom uảng trak tung tian haong ilamo bhap bini.

Ong Bruce William – tuai damuai jirah mai meng nagar Canada brei thau, mai tal ini hu maong iek anak mata saong ba drei tame menyim nan dom blah khan bai di urang bangsa Cam jeng lac biak mboh chreih takre. Meng dom talei mrai, meng bruk tacei ba di dom urang kamei di ini, khol dahlak hulin meda hu ta-eng tangin menyim jeng dom blah khan bai sit, ngak inem krung dalam luac jalan rivang me-in bhum taneh An Giang di Viet Nam.

Urak ini labik menyim di ong Mohamad hu labaih 18 urang ngak bruk, yaok urang meda menyim meng 3-4 blah khan/harei, yaom pablei kuhria rah tapa labaih 70.000 ndong/sa blah khan hu bingula taginum, ba mai jien mek tame tani tanat meng 4-6 trieu dong/urang/bilan.

Tukvak di meng anak tal, ong Mohamad brei patui bruk buh jien tame, peih praong labik menyim khan bai pataih jih dalah, gam piah duh tuai damuai jirah mai rivang me-in, ba drei tame, gam parilo dom kaya ndap nda, brei bruk ngak tani tanat ka urang kamei bangsa Cam, daong khik bruk ngak bhap bini saong pambak tabiak dom ilamo siam gheih di bangsa Viet Nam tabiak dunya.

Piah hu rilo tuai damuai jirah thau tal kaya kan ndap nda khan bai, mikva labik ini daok ba tabiak dom kaya ndap nda di palei Cam tagok mang xa hoi, labik pablei salih online piah pablei tapak. Urang blei chreih takre ye kakei blei kaya, mikva payua tapa jalan buu ndien.

Oh lac sa janih khik bruk, palei Cam Bhumsoai Châu Phong daok lac labik mai tal ka ilamo-jirah rivang ngak meda ngak kaya brei ka ilamo. Tinh An Giang hu pambuak saong daok pambuak padang labik ini jeng bruk jirah rivang bhap bini naih gheih, daong tame danak dak patruh eik patrun kathaot, brei bruk ngak karo kajap ka mikva.

Ong Nguyễn Văn Hợp, Phaok Akaok UB Bhap bini xa Châu Phong brei thau, piah khik ramik, patagok bruk menyim khan bai jih dalah di bhap bini bangsa Cam meng tukvak blaoh tapa, bhum palei saong tinh An Giang tuk halei jeng sangka tal bruk pato bruk ngak ini ka rai rah sit umo; daong, pato pakai ilamo ngak jirah rivang ka rahra jeng yau jhul tagok yaih khan kaya ndap nda khan bai jih dalah tabiak darak pasar, pamaong tal patagok palei ngak bruk tui jalan karo kajap.

Njauk ndom mayai tal hu lac, menyim khan bai jih dalah di bangsa Cam daok di xa Châu Phong hu Mentri Ilamo, pahat Padhih saong Jirah rivang hu mbaoh tangin lac Drap ar ilamo oh mboh di meta pakat Negar. Ini lac bruk hadah mbaok meta di bhap bini bangsa Cam Islam saong tinh An Giang, brei kein lagaih daong karja palei saong mikva di ini paglaong ilamo dalam bruk khik ramik, patagok yaom kaom di ilamo bangsa drei.

Tui iek meng harei dang anak, gam haong bruk jum tangin di karja palei saong bruk srap gap, gul pataom, hadah krah di bhap bini, bruk menyim khan bai pataih jih dalah urang bangsa Cam di Châu Phong brei patui patagok saong jeng labik mai tal bhian randap di tuai damuai atah jaik./.