Harei halei jeng yau nan, meng tuk 17, mblang baha Bâng Cro Chắp Thmây gilac danei yava tagok sap ragu bhap bini bangsa Khmer. Urang peih padang jeng labik me-in ragam ilamo bangsa nan lac sa-ai kamei Lâm Thị Hậu, urang bangsa Khmer daok di xa Tân Hưng, huyen Long Phú, tinh Soc Trang klak, ini lac xa Tân Thạnh, ban raya Can Tho.

Sa-ai Hậu brei thau, sa-ai chreih takre seni ragam bhap bini bangsa Khmer meng sit, tuk praong tagok, sa-ai caong khin hu pambak praong ragam tamia bhap bini bangsa tal dom rai rah adei sit, kayua ini oh lac sa janih bruk ilamo senit amia, blaoh nyu daok ieu lac, sa bruk hadah mbaok meta di anek bangsa.

“Tuk adei bac megru blaoh tal bac univesiti dai hoc gah ilamo di ban raya Ho Chi Minh, adei caong khin tuk gilac mai bhum palei drei piah daong khik ilamo. Meng akaok meti adei pato tamia ka dom anek naih di sang, hadei nan ye adei hu likau acar dang akaok baha piah peih sa tal bac pato saong jak ba dom adei piah hu mbaok tame tal bac magru, blaoh di nan dak harei dak dui pachreih hu rilo adei mai bac pasram ragu ragam tamia.

Yaok biar harei, tal bac magru tamia oh mek jien di baha Bâng Cro Chắp Thmây daong brei ka dom adei sit thau tani tanat jang jeng ye tahu anit ranam rilo jang brei ka ilamo bangsa, anit ranam ragam ragu tamia bhap bini di bangsa drei. Hu meng 20 tal 30 adei uranaih, rilo abih lac mada hu labaih 50 adei mai tui bac magru yaok harei. Oh hu tapuk pato, oh hu mblang tamia praong gheih lagaih, meng sa labik mblang dalam sang baha, sa baoh lua saong biak rilo hatai chreih takre di dom adei anek saih urang bangsa Khmer dalam tal bac. Sa-ai kamei Lâm Thị Hậu pato dom adei ka dom ragam tamia bhap bini yau ye Romvong, Saravan, Lăm Leo,... Chreih chrai, bui sambai saong hu sa ragam ragu tamia Rô-băm. Adei HUỳnh Thảo Nhi chreih chrai bui sambai ndom meyai lac:

“Adei bac tamia hu labaih 2 thun paje. Adei mboh sa-ai Lâm Thị Hậu ba tagok mang ka tal tamia bhap bini Khmer, adei mboh takre saong likau tame bac haong gauk!.”

Oh lac labik khik ramik ilamo seni nghe thuat bhap bini, tal tamia di sang baha Bâng Cro Chắp Thmây kayua sa-ai Hậu pato daok lac sa labik pambuak bhap bini. Meng dom var harei magru bac, dom adei hu khang hatai, ranit ranam jang ilamo bangsa drei tapa yaok bruk sit. Tal bac daok daong ka dom adei hu mblang me-in siam mekre dalam tuk padeih bilan he hadei sa thun bac. Ong Acar Thạch Thươl, dang akaok sang baha Bâng Cro Chắp Thmây, brei thau:

“Sang baha peih tal pato bac piah daong khik ramik ilamo bhap bini di bangsa Khmer. Tamia romvong, lăm leo, saravan… dom ragam tamia saong ragu ragam kong caing ngu am Khmer, pato dom adei tamia, dom adei me-in piah harei hadei hu me-in di dalam harei raya harei adat.”

Hadei di 3 thun pato tamia, tal bac jeng padang hu kapul tamia piah nao tamia di dom danak dak gheih dalam dom harei raya harei adat di urang bangsa Khmer, yau ye harei Tet Chôl Chnăm Thmây, harei Sene Đôn-ta, harei pok akhan ao Kathina…. Oh lac sa janih di bhum palei, kapul tamia daok hu brei da-a raok nao me-in di langiu tinh. Sa-ai Lâm Thị Hậu, brei thau:

“Meng akaok meti ye peih tal pato ye ruah hu 15 urang piah padang kapul tamia, hu tukvak ye nao tamia di harei raya adat. Urak ini ye dom adei ini jeng tapa daong sang baha piah daong pato dom adei sit anek kamuan urang Khmer tamia.

Meng dom biar harei hu rilo hatai chreih takre di baha Bâng Cro Chắp Thmây, seni tamia Khmer daok hu patui veik tapa yaok rairah, hu rilo hatai anit ranam bhum srok palei saong ndung bak ilamo bangsa./.