Tui urang ma-in hu angan Amư Nhân, sa di dalam dom urang dak dalikal biak gheih di palei Baoh Hadeng daok ieu lac Phú Nhuận, xa Ninh Phuoc, tinh Khanh Hoa, kadha adaoh bhap bani gam saong urang Cam nan lac jalan aia tasau amaik raong ba hatai saneng tapa rilo rai rah. Panuac abih sap adaoh pambuak pam rai diuk lot ini saong rai diuk di lot diah, ndung ba tui yaom dak rai sajarah, hatai jia saong jalan diuk rai meng dom rai ini mai. Piah thau cambaih laih ka urang bangsa Cam, ka bein ilamo Champa hadah, meda ndom lac oh hu jalan nao halei bo nyu siam gheih jang nan lac tui pang alat ragam di bhap bani.

NSƯT Amư Nhân brei thau: “Jaik abih panuac adaoh meng kan mai di urang Cam jeng hu pok meyaom bruk rik daong di dom urang nao dahlau brei ka bruk peih praong mlang taneh, dak padang puk palei. Panuac daoh pato Bhap bani gul pataom gauk sangka bruk li-ua drak, kuac rok ribaong kraong ba aia tame hamu, pala kapah menyim jih dalah, raong glang anek athur ba mai rai diuk trei sil, haniem phol brei ka bhap bani… Gam haong panuac adaoh, capi kanhi saong ginang, baraneng nan lac alat ragam oh kurang hu di dalam bruk ngak adat cambat tanarakun di urang bangsa Cam meng kan mai...”

Tui dom urang roh duah, ragu ragam urang bangsa Cam hu diuk gam gam dalam bhap bini biak karei, gam lac suak yava di rai diuk bhian harei, gam lac panuac ndom mayai biak ginreih gheih dalam bruk ngak adat cambat tanarakun. Nao gam haong dua jalan nduac ragu ragam ini ngak jeng asal ilamo biak karei di bhap bani urang bangsa Cam.

Yam tame dalam bruk ngak adat cambat, yaok panuac daoh hu jeng panuac ndom akhar huruh biak gheih ghang, bingi pang, ngak jalan pambuak bruk nao mai di anek manuac ngan haong dom po yang. Nyu nan lac oh njauk binah piah pachreih tui ka dom bruk ngak adat cambat, blaoh nyu daok lac sa asal kadha biak siam gheih, jalan piah mek hu bruk njauk hatai haong gauk, brei thau ka hatai caong khin di anek manuac tal dunya po yang po mebang.

Yau dalam harei ngak Rija Nưgar – adat ngak yang akaok thun likau brei ka angin siam hajan lagaih, sap ginang, saranai halai gam haong panuac adaoh di ong Meduen ngak jeng ar thak gam iek prong gam cheih chai, bak hatung hatai ralai pagam haong po yang. Atau dalam harei mbang Katê pahadhar tal ong akaok ong kei saong dom urang buh brei pren yava rilo ka bangsa hu pok ngak jeng po yang, ragu ragam hu dak jeng yaok kadha karei brei ka yaok adat. Pasak di van ngak adat nan lac binah adaoh iew po yang di ong Kadhar ngan haong mbaik kanhi dua talei, khan gilac ka damneiy saong pok meyaom dom rik daong di po yang nan…

Yam tabiak rai diuk, kadha adaoh bhap bani yau panuac drut druai, yau hatung hatai di urang bangsa Cam ngan haong taneh riya langik tasik. Dom ragam daoh hu paneh tabiak meng dom bruk ngak yaok harei, hu jeng talei pambuak bruk panduan jao ilamo meng rai ini tapa rai diah. Nan daok ieu lac dom panuac adaoh thaok brah tui sap lasung juak, ngak brei dom glaih glar jeng kadha bui sambai; nan lac kadha daoh mek hajan ba brei hatai caong khin ka sa bruk ngak mbang hu…

Abih di nyu, rai diuk mayut mayau di urang bangsa Cam hu brei mboh biak gheih ghang saong drut druai tapa kadha adaoh dam dara. Ini lac tukvak piah ka dom urang likei dam saong kumei dara ndom glai haong gauk, kanar hadar gauk tapa dom panuac daoh biak bingi pang, bak asal ariya...

Rilo thun tapa, jalan diuk rai bahrau gam saong dom bruk meblak gauk di dom bruk ngak daoh tamia bahrau daok jhul ragam daoh bhap bani Cam tame dalam labik jua gandang. Langiu di dom harei roya jeng daok hu peih ngak, dom bruk adaoh tamia meng kan dahlau dak harei dak takik jang. Dom urang gheih tangin prong thun, dom “drap ar diuk” daok pal khik inem krung dak harei dak takik jua nao. Dalam tuk nan, rai rah dam dara, mai meng rilo makna, bo oh daok mbak carak haong sap kanhi, ngan haong ragam ginang, paranưng…

Anak bruk si lahik nao, dom kham merat pal khik saong pamedeih gilac kadha daoh bhap bani Cam daok hu truac tagok, yaom lac daok biak rilo kan kandah. Rilo bruk roh duah, teik tuak, cih vak sap yava ka dom kadha adaoh bhap bani, kadha tamia hu peih ngak. Tal bac pato tacei ragam ragu meng kan saong kadha adaoh bhap bani Cam jeng hu peih tabiak. Dom urang gheih tangin prong thun, meng hatung hatai di drei, daok kham merat “ba apui” ka rai rah dam dara./