Kuhria tal bilan 8 barau blaoh, ban raya Dong Nai buh labaih 552 ti dong kuhria ka mbang huak ndih daok brei ka anek saih di bhum tapen nagar. Hu yau nan blaoh 7 danaok sang bac (dalam nan hu 1 baoh sang bac ngak bahrau dan saong 6 baoh peih praong) hu ngak blaoh, dil ba tame pandar. Tui dom danak dak peih ngak meng thun 2025, tal ini ngak blaoh angaok 90% bruk padang.

Pakat karja palei jeng buh bayar labaih 30 ti dong ngak pasiam jang dom kaya brei ka ging gaok. Tal ini, 100% sang bac Tieu hoc dan saong THCS xa tapen negar hu ganap taka brei mbang huak ka anek saih.

Thun bac ini, Sang bac Tieu hoc saong THCS Lộc An, xa Tân Tiến hu 887/935 anek saih tut tangin tame gam daok gam bac. Ong Dương Văn Thắng, Phaok akaok sang bac brei thau, jabat ini caga baloh ganap ndap nda manuac urang brei ka tame bac:

"Sang bac daok brei paganap taong abih dom janih ndap nda ka ngui ka sang mbang huak, sang daok di dom adei anek saih. Labik sang ging jeng ganap ging gaok, hu papan jeng ye ndap nda kaya ngui brei ka anek saih. Hadei di bac blaoh page, dom adei tapa huak kreih pandiak blaoh gilac tame sang bac padeih padei”.

Anai gru Nguyễn Thị Thúy Hà, Akaok sang bac Tieu học Đắk Á, xa Bù Gia Mập bui sambai brei thau lac, sang bac hu 506 anek saih. Bruk ngak ging gaok brei mbang huak ka dom adei anek saih daong kein lagaih praong ka anek saih daok di bhum atah bayah.

"Dang peih ngak brei ka bruk mbang huak biak lagaih brei ka anek saih hu ganap prein, daong ka adei tame sang bac ganap jang jeng ye daong brei ka bruk bac magru tal tu di bhum palei."

Bruk ngak sang danaok gam bac gam daok mbang huak di bhum taneh atah bayah di taneh tapen nagar lang yah hu ralo kadha brei ka rahra bhap bini. Dalau diah, meng labik daok sang danaok nao tal sang bac biak atah ngak ka amaik ame anek saih tavak ralo daong ba dalam harei. Bruk anek saih daok mbang huak kreih pandiak daong hu ralo ka urang ngak amaik ame anek saih sanang hatai bruk hik ngak mbang. Ong Điểu Lý, palei Đắk Á, xa Bù Gia Mập sambai hatai mboh taco jeng hu nao bac di sang gam daok gam bac:

"Yaok harei nao ngak, kreih pandiak gilac nduac mai raok kamuan biak tawak, abih tukwak. Ini hu sang bac padang hu labik padeih padei mbang huak kreih pandiak, mbiah tal ia hrei tame ceik malam meng raok anek bik biak lagaih. Hu hatai iek glang di Ndang, Kraja sang Sang bac dalam bruk iiek glang sahneng kuhria ka anek saih daong amaik ame nyu sang hatai ngak mbang di bhum taneh atah bayah."

Piah ka bruk daok di sang bac mateh harei brei ka nyu tani tanat glaong jang, urang pan akaok di xa tapen negar tuk halei jeng iek glang taong yaom breik ngak ka siam makre.

Di xa Lộc Tấn, hadei di pataom 3 sang bac tieu hoc (Lộc Tấn A, Lộc Tấn B, Lộc Thiện) jeng Sang bac Tieu hoc Lộc Tấn, pakat karja palei ba abih prein brei ngak sampurna tani tanat dom janih di sang bac gam daok mateh harei brei ka labik pasak asal, 2 phân hiệu dan saong Sang bac THCS Lộc Tấn. Ong Hoàng Mạnh Thường, Bi thu Ndang uy xa Lộc Tấn ndom mayai lac, asal kadha di sang bac oh sa janih "hu war mbang huak" blaoh “war huak njauk ganap kaya kan ka prein yava":

"Tuk ging huak mbang mateh harei tame bruk, Ndang uy patacei UB Bhap bini xa pambuak bruk saong Balai Y te dan saong dom gah karja pakhang bruk bhian iek glang. Bruk ngak ini brei ka siam makre jang brei ka war huak mbang jeng ye brei siam karo ka ndap nda kaya kan bruk mbang huak, daong ka anek saih mbang huak ganap, mbang huak siam karo brei ka prein yawa daong ka amaik ame nyu sanang hatai ngak mbang."

Bruk dang ngak dalau di gah pato magru saong karja palei di anak thun bac bahrau 2026-2027 oh lac sa janih ba mai hatai sambai ka urang ngak amaik ame, anek saih blaoh nyu daok dak padang takai khang kajap brei ka gah bac magru hu yaom di bhum taneh tapen nagar./.