Ong Nguyễn Thành Tài, umo 65 thun, daok di palei 3 brei thau, bhap bani Long Son thau lac, bruk ngak kong ieu lac sa bruk njauk ngak, min kadha prong abih nan ieu lac jalan ngak patagok. Njauk ndom mayai lac di nyu, Long Son oh sa janih hu pren khang brei ka bruk ngak mbang patagok bruk ngak mbang blei salih blaoh daok hu yaom ilamo biak karei, meng jalan diuk rai di bhap bani, hatai jia di ugama Ong Trần tal dom harei roya meng kan. Nan lac kadha ngak jeng suan yava di bhum taneh ini. Tuk Long Son patagok, dom yaom ilamo nan njauk daok hu khik ramik saong hu jneg mbaok meta ka sa ban bahrau. Ong Tài ndom lac:

"Bhap bani caong khin Long Son oh lac patagok bruk ngak mbang kinh te saoh blaoh daok lac labik piah ka bhap bani hadah mbaok hadah meta saong pambuak pagam. Hadei di ba pataom bhap bani caong khin tuk dom khu ngak, kinh te cak rok, rai diuk di bhap bani hu tani tanat, ngak ka mbaok meta Long Son dak harei dak siam gheih jang jeng yau khik ramik ilamo bangsa dak harei dak siam jang".

Daok ong Trần Văn Mùi, umo 60 thun, daok di palei 9, ye ndom yau ini, bhap bani Long Sơn caong mong lac dalam tukvak masa dak danak saong cak rok, binah hijao saong glai klo – langik tasik njauk hu khik ramik yau sa drap ar hu yaom glaong, yaom tamo njauk hu khik ramik caik ka rai rah hadei:

"Ngan saong bhap bani Long Son ye glai saong binah hijao oh lac sa janih caik ka nyu gheih mekre blaoh daok lac sa binah rai diuk, nan lac bruk sron mbon saong jeng lac hala suot pacang khik khaol dahlak anak dom panduan salih di langik taisk. Kayau yau nan ye khaol dahlak caong mong, juai salih dom yaom nan piah mek cak rok patagok bruk ngak mbang kinh te".

Atah di pasak Ban raya HCM jaik 80km, xa Long Son hu mblang taneh labaih 90km², mbluak abih gam 1.800 ha glai ia mbak saong pren khang cak rok patgok bruk ngak mbang kinh te tasik, hu labik dang biak prong yau sa jalan tapen pacang khik ar tasik, sa labik sinh thai, pacang khik alam moi truong saong lac pren khang brei ka gah kaya mbang saong rivang jirah ma-in.

Dom thun jaik di ini, Long Son hu jalan ngak piah jeng labik cak rok patagok bahrau mai meng jalan pambuak pagam haong jalan raya cao toc Bien Hoa – Vung Tau, Jalan nagar 51 saong pabah lamnge dunya Cai Mep - Thi Vai, rik daong biak prong tame jalan cak rok patagok kinh te, ban ngak kong saong rivang ma-in khang kajap di Ban raya HCM.

 Tui akaok UBND xa Long Sơn Nguyễn Trọng Thụy, dom pambak di bruk salih pandon khi hau, bruk cak rok patagok khang di kinh te so … ye caong khin bruk duah thau cambaih laih labik dang di Long Son hu makna biak prong piah ba tabiak jalan cak rok patagok, khik ramik he sinh thai saong grap tanat bruk ngak mbang khang kajap brei ka bhap bani, Ong Thuỵ brei thau:

"Glai pambuak pagam haong kraong aia ieu nan lac sa janih thaik binguk biak karei di Long Son, gam haong di nan jeng pambuak pagam haong dom bruk ngak mbang ngak huak meng kan mai di bhap bani daok pak ini, jeng lac pren khang ka bruk rivang ma-in. Kayua yau nan ye dalam bruk ramik pasiam danak dak quy hoach mbang ini hu rilo panuac brei thau lac cak rok patagok Long Son min tapi njauk khik ramik, pataom mek dom pren khang di Long Sơn, oh patagok tapa tanut ngak pambak oh siam tal bruk ngak mbang ngak huak di bhap bani di labik daok".

 Dalam quy hoach danak dak patagok xã Long Son tal ini, njauk khik tamo hatai saneng nan lac oh brei patrun mblang taneh glai duak mbak piah peih praong ngak banraya. Yaom lac bruk hagiat du an halei pambak tal glai jeng njauk mong iek ka nyu tani tanat. Langiu di nan, njauk khik tamo dom labik daok klak saong ilmao di bhap bani labik nan; plaih caga bruk ba pataom taong abih bhap bani tame dom labik daok bahrau ngak ka dom bruk ngak meng kan njauk lahik nao./.